វៀតណាម៖ព្រះអង្គម្ចាស់William ទាញសញ្ញាអាសន្នចំពោះការជួញដូរសត្វព្រៃខុសច្បាប់
នៅក្រុងហាណូយ វៀតណាម ថ្ងៃព្រហស្បតិ៍នេះ ព្រះអង្គម្ចាស់អង់គ្លេស William បានចូលរួមសន្និសីទអន្តរជាតិ ស្តីពីសត្វព្រៃ និងបានសំដែងការបារម្ភចំពោះការជួញដូរសត្វព្រៃខុសច្បាប់ ដែលអាចនឹងអោយប្រភេទសត្វមួយចំនួនដាច់ពូជ ក្នុងពេលឆាប់ៗបាន។ ការសិក្សាស្រាវជ្រាវចុងក្រោយ បានបង្ហាញថា ៧ឆ្នាំចុងក្រោយនេះ ដំរីនៅអាហ្វ្រិក បានថយចុះ៣០ភាគរយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
គេឃើញមានតំណាងប្រទេសជាង៤០ បានចូលរួមសន្និសីទអន្តរជាតិស្តីពីសត្វព្រៃ នៅក្រុងហាណូយ វៀតណាម ថ្ងៃព្រហស្បតិ៍នេះ។ វៀតណាម ជាប្រទេសដែលមានសកម្មភាពជួញដូរសត្វព្រៃគួរអោយព្រួយបារម្ភ។ ព្រះអង្គម្ចាស់អង់គ្លេសWilliam បានរំលឹកឡើងវិញ ពីភាពយឺតយ៉ាវនៃការចាត់វិធានការ ទប់ស្កាត់ការជួញដូរសត្វព្រៃ។
ម្សិលមីញនេះ ព្រះអង្គម្ចាស់William បានធ្វើដំណើរទៅសាលារៀនមួយកន្លែង នៅហាណូយ ដើម្បីលើកឡើងពីសារៈសំខាន់នៃការអភិរក្សសត្វព្រៃ។ គេវាយតម្លៃថា ទីផ្សារជួញដូរសត្វព្រៃក្នុងពិភពលោក គិតជាទឹកប្រាក់គឺ មានដល់ទៅជាង១៨ពាន់លានអឺរ៉ូ ក្នុងមួយឆ្នាំៗ។ ចិននិងវៀតណាម មានតំរូវការខ្ពស់ ដោយសារជនជាតិចិននិងវៀតណាម ចូលចិត្តបរិភោគសត្វប្លែកៗ ដូចជាពង្រូល រឺក៏យកផលិតផលសត្វព្រៃ ទៅប្រើក្នុងការព្យាបាលបែបបុរាណ។ រដ្ឋាភិបាលវៀតណាមទទួលស្គាល់ថា ការជួញដូរសត្វព្រៃ ការជួញដូរភ្លុក រឺក៏ស្នែងរមាស ពិតជាបានកើនឡើង ក្នុងពិភពលោកមែន។
ក្នុងឱកាសសន្និសីទសត្វព្រៃនេះ អង្គការក្រៅរដ្ឋាភីបាល Traffic បានចុះផ្សាយរបាយការណ៍ស្តីពីសត្វខ្លា ក្នុងពិភពលោក។ យោងតាមអង្គការ ក្នុងមួយសប្តាហ៍ មានសត្វខ្លា២ក្បាល ត្រូវបានគេសម្លាប់ រឺក៏យកទៅជួញដូរ។ អង្គការក្រៅរដ្ឋាភីបាល Traffic ចោទថា អាស៊ីអាគ្នេយ៍ ពិសេសថៃ ឡាវ និងវៀតណាម មិនសូវជាចាត់វិធានការអ្វីធុំដុំទេ ដើម្បីទប់ស្កាត់បញ្ហានេះ។ កសិដ្ឋានចិញ្ចឹមខ្លា ក៏នៅតែបើកទ្វារ នៅតាមថៃ រឺក៏ចិន។ អង្គការក្រៅរដ្ឋាភិបាលនានាសង្ឃឹមថា សន្និសីទនៅក្រុងហាណូយ អាចដាក់សម្ពាធអោយរដ្ឋាភិបាលនៅអាស៊ី ចាត់វិធានការបិទកសិដ្ឋានចីញ្ចឹមខ្លា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ