កម្ពុជាស្នើរបៀបវារៈអាស៊ានគ្មានសង្គ្រាមស៊ីវិលទៅក្នុងកិច្ចប្រជុំអាស៊ាន
កម្ពុជាបានស្នើរបៀបវារៈមួយចំនួនទាក់ទងនឹងបញ្ហាសន្តិសុខក្នុងតំបន់ទៅកិច្ចប្រជុំកំពូលអាស៊ានដើម្បីពិភាក្សា។ ប្រធានបទសំខាន់មួយនោះគឺ តំបន់អាស៊ានគ្មានសង្គ្រាមស៊ីវិល។ លោកខៀវ កាញារីទ្ធបានថ្លែងថា ការរៀបចំកិច្ចប្រជុំអាស៊ានឆ្នាំនេះ គឺជាមោទនភាពរបស់ជាតិខ្មែរទាំងមូល។
ចុះផ្សាយនៅថ្ងៃ៖
ស្តាប់ - ០១:៤២
អ្នកនាំពាក្យរដ្ឋាភិបាលកម្ពុជាលោកខៀវ កាញារីទ្ធបានថ្លែងអោយដឹងថា កម្ពុជាបានស្នើរបៀបវារៈមួយចំនួនទៅក្នុងកិច្ចពិភាក្សានៃកិច្ចប្រជុំកំពូលអាស៊ាន ដែលក្នុងរបៀបវារៈទាំងនោះ របៀបវារៈសំខាន់មួយគឺ តំបន់អាស៊ានគ្មានសង្គ្រាមស៊ីវិល។ លោកខៀវ កាញារីទ្ធបានមានប្រសាសន៍អោយដឹងយ៉ាងនេះនៅព្រឹកថ្ងៃអង្គារនេះ ក្នុងវេទិកាជាមួយអ្នកកាសែតដែលរៀបចំដោយក្លឹបអ្នកកាសែតកម្ពុជា។ ជាវេទិកាដែលនិយាយអំពីការរៀបចំកិច្ចប្រជុំអាស៊ាននៅចុងសប្តាហ៍នេះ។
ក្រៅពីរៀបរាប់អំពីដំណើរការនៃការងារមណ្ឌលព័ត៌មានសម្រាប់សម្រួលដល់ការយកព័ត៌មាននៃអ្នកកាសែតនោះ លោករដ្ឋមន្ត្រីក្រសួងក៏បានបង្ហើបអំពីរបៀបវារៈសំខាន់មួយចំនួនដែលអាចត្រូវពិភាក្សានៅក្នុងកិច្ចប្រជុំនៃមេដឹកនាំនៃប្រទេសអាស៊ានផងដែរ។ ជារបៀបវារៈដែលទាក់ទងច្រើនទៅនឹងសន្តិសុខក្នុងតំបន់។ បើតាមការពន្យល់របស់លោកខៀវ កាញារីទ្ធ កម្ពុជាបានផ្តល់សារៈសំខាន់ដល់ការទប់ស្កាត់សង្គ្រាមស៊ីវិលនៅក្នុងតំបន់អាស៊ាន ពីព្រោះកម្ពុជាមានពិសោធន៍អាក្រក់ក្នុងបញ្ហានេះ។ ហើយពេលបច្ចុប្បន្ននេះ ប្រទេសសមាជិកអាស៊ានមួយចំនួនក៏កំពុងជួបប្រទះនឹងសង្គ្រាមស៊ីវិលនេះដែរ។
ក្រៅពីបញ្ហានេះ ក៏មានរបៀបវារៈផ្សេងទៀតដូចជា អាស៊ានគ្មានអាវុធនុយក្លេអ៊ែរ ការសម្របសម្រួលអោយប្រទេសមហាអំណាចដោះស្រាយបញ្ហាសន្តិសុខក្នុងតំបន់ជាដើម ពិសេសបញ្ហាជម្លោះសមុទ្រចិនខាងត្បូង។
កម្ពុជានឹងទទួលមេដឹកនាំកំពូលនៃប្រទេសមហាអំណាចក្នុងពិភពលោករួមមានអាមេរិក ចិន ឥណ្ឌា និងរុស្ស៊ីជាដើមនៅក្នុងរយៈប៉ុន្មានថ្ងៃខាងមុខនេះ នៅក្នុងក្របខណ្ឌនៃកិច្ចប្រជុំអាស៊ាន និងកិច្ចប្រជុំពាក់ព័ន្ធជាច្រើនទៀត។ បើតាមប្រសាសន៍របស់លោកខៀវ កាញារីទ្ធ រហូតដល់ពេលនេះ មានអ្នកកាសែត១៨៥០នាក់ហើយដែលបានចុះឈ្មោះយកព័ត៌មានស្តីពីកិច្ចប្រជុំកំពូលអាស៊ាននេះ។ ជាកិច្ចប្រជុំដែលតម្រូវអោយមានការត្រៀមពង្រឹងសន្តិសុខយ៉ាងខ្លាំងបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ