ស្លាប់៥នាក់ និងរបួសជាង៥០នាក់ ក្នុងភេរវកម្មបំផ្ទុះរថយន្តនៅក្រុងបេរូត
នៅប្រទេសលីបង់ថ្ងៃសុក្រនេះ មានមនុស្សយ៉ាងហោច៥នាក់ បានស្លាប់ និងជាង៥០នាក់ទៀតរងរបួស ក្នុងអំពើភេរវកម្មបំផ្ទុះរថយន្តមួយ នៅកណ្តាលក្រុងបេរូតនៅពីមុខទីស្នាក់ការនាយករដ្ឋមន្ត្រីលីបង់។ លោកម៉ូហាម៉ាត ឆាតា ជាទីប្រឹក្សាជិតដិតនឹងអតីតនាយករដ្ឋមន្ត្រី សាអាត ហារីរី ក៏បាស្លាប់ក្នុងភេរវកម្មនេះដែរ។ អតីតនាយករដ្ឋមន្ត្រីហារីរី បានចោទទៅកាន់ក្រុមអេស្បូឡានិកាយស៊ីអ៊ីត ដែលគាំទ្រប្រធានាធិបតី ស៊ីរី បាស្ហារ អាល់អាសាដ ថាបានបង្កអំពើភេរវកម្មនេះ។ ប្រធានាធិបតីបារាំងបានចេញមុខថ្កោលទោសអំពើបំផ្ទុះរថយន្តនេះថា ជាអំពើដ៏កំសាក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
គ្រាប់បែកដែលភេរវជនប្រើក្នុងការបំផ្ទុះរថយន្ត នៅកណ្តាលទីក្រុងបេរូត ប្រទេសលីបង់ ថ្ងៃសុក្រនេះ មានទំងន់ពី៥០ ទៅ៦០គីឡូក្រាម។ ភេរវកម្មបំផ្ទុះរថយន្តបានសម្លាប់មនុស្សជាច្រើន នាក់ ក្នុងនោះក៏មានទីប្រឹក្សារបស់អតីតនាយករដ្ឋមន្ត្រី សាអាត ហារីរី ផងដែរ។ អតីតនាយករដ្ឋមន្ត្រីហារីរី បានចោទទៅកាន់ក្រុមអេស្បូឡានិកាយស៊ីអ៊ីត ដែលគាំទ្រប្រធានាធិបតី ស៊ីរី បាស្ហារ អាល់អាសាដ ថាបានបង្កអំពើភេរវកម្មនេះ។ លោកហារីរីលើកឡើងទៀតថា បណ្តាជនជាប់ចោទក្នុងអំពើភេរវកម្មជាជនដដែលៗ ជាជនបានរួចផុតពីសំណាញ់ច្បាប់។
ក្នុងការចោទប្រកាន់ពីអសកម្មភាពនៃតុលាការ អតីតនាយករដ្ឋមន្ត្រី សាអាដ ហារីរី ចង់សំដៅទៅលើតុលាការពិសេសលីបង់ ដែលបានកាត់ទោសជនដៃដល់ក្នុងឃាតកម្មសម្លាប់ឳពុករបស់លោក គឺលោក រ៉ាហ្វ៊ិក ហារីរី កាលពីឆ្នាំ២០០៥។ កាលណោះ សកម្មជនអេស្បូឡា៥នាក់ បានជាប់ទោសចោទប្រកាន់ដោយតុលាការពិសេសលីបង់ ប៉ុន្តែ ក្រុមអេស្បូឡាបានបដិសេធមិនព្រមនាំជនទាំងនោះទៅកាន់តុលាការ។ តុលាការនៅឡេតឆេនដាំ ស្ថិតនៅជាយក្រុងឡាអេ នឹងកាត់ទោសជនជាប់ចោទ៤នាក់ ក្នុងចំណោមជនទាំង៥នាក់នេះ នៅថ្ងៃ១៦មករាខាងមុខ។
ភេរវកម្មបំផ្ទុះរថយន្តក្រុងបេរូត ថ្ងៃសុក្រនេះ បង្ហាញច្បាស់ថា ការតវ៉ាប្រឆាំងនយោបាយរបស់រដ្ឋាភិបាលស៊ីរី នៅលីបង់ ចាប់ពីពេលស៊ីរីជួបសង្គ្រាមក្នុងខែមិនា ឆ្នាំ២០១១មក ជាការតវ៉ាដែលផ្តល់ផលអាក្រក់ដល់លីបង់។ លោក ម៉ូហាម៉ាត ឆាតា ជាទីប្រឹក្សាអតីតនាយករដ្ឋមន្ត្រី ហារីរី ដែលបានបាត់បង់ជីវិត ក្នុងភេរវកម្មនេះ ធ្លាប់ជាអ្នកប្រឆាំងរបបដឹកនាំស៊ីរី។ រីឯអតីតនាយករដ្ឋមន្ត្រីហារីរី ក៏ដូចគ្នាដែរ។ លោកហារីរី ធ្លាប់បានអំពាវនាវអោយប្រជាជនលីបង់បរិហារអំពីការសម្លាប់មនុស្សនៅស៊ីរី។
គិតចាប់ពីឆ្នាំ២០០៥មក គិតទាំងលោកឆាតា ដែលបានស្លាប់នៅថ្ងៃសុក្រនេះ មានអ្នកនយោបាយលីបង់៩រូប ហើយដែលបានស្លាប់ក្នុងអំពើភេរវកម្ម។ អ្នកសារព័ត៌មានមាននិន្នាការប្រឆាំងរបបដឹកនាំស៊ីរី ប៉ូលិស ទាហានដែលជិតដិតនឹងអតីតនាយករដ្ឋមន្ត្រីហារីរី ច្រើននាក់ទៀត ក៏ជាជនរងគ្រោះនៃភេរវកម្មនៅលីបង់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ