ក្រុមឧទ្ទាមអេស្បូឡាប្រកាសសងសឹកអ៊ីស្រាអែលដែលបានវាយប្រហារទីតាំងខ្លួន នៅលីបង់
នៅថ្ងៃពុធនេះ ក្រុមឧទ្ទាមអេស្បូឡា និកាយស្ហ៊ីអ៊ីត បានប្រកាសគំរាមថា នឹងសងសឹកអ៊ីស្រាអែល ដែលបានទំលាក់គ្រាប់បែកនៅទីតាំងក្រុមអេស្បូឡាមួយកន្លែង ក្នុងទឹកដីលីបង់។ នេះជាលើកទី១ហើយ ដែលអ៊ីស្រាអែលបានវាយប្រហារចលនាអេស្បូឡា នៅលីបង់ គិតចាប់ពីអ៊ីស្រាអែល បានធ្វើសង្គ្រាមជាមួយក្រុមអេស្បួឡាក្នុងឆ្នាំ២០០៦មក។ ការគំរាមនេះបានបង្កអោយមានការបារម្ភពីសន្តិសុខក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
កាលពីដំបូងឡើយ ក្រោយមានការចុះផ្សាយពីសារព័ត៌មានមួយចំនួន ទាក់ទងនឹងការ វាយប្រហាររបស់អ៊ីស្រាអែល ក្រុមឧទ្ទាមអេស្បូឡា បានបដិសេធថា គ្មានការវាយប្រហារអ្វីមួយមកលើទីតាំងខ្លួន នៅលីបង់ កាលពីយប់ថ្ងៃចន្ទកន្លងទៅទេ។ ប៉ុន្តែ នៅថ្ងៃពុធនេះ ក្រុមអេស្បូឡា បានប្រកាសគំរាមសងសឹកអ៊ីស្រាអែលជាសត្រូវសួរពូជរបស់ខ្លួនជាង៣០ឆ្នាំមកនេះ និងបានទទួលស្គាល់ថា ទីតាំងរបស់ខ្លួនមួយកន្លែង នៅតំបន់ចាន់តា នៅព្រំដែនលីបង់ជាប់ជាមួយប្រទេសស៊ីរី ត្រូវបានរងការទំលាក់គ្រាប់បែកពីសំណាក់អ៊ីស្រាអែល។ ក្រុមអេស្បូឡាគំរាមថា ខ្លួនមិននៅស្ងៀមនោះទេ ហើយនឹងជ្រើសយកឱកាស និងទីកន្លែងសមស្របដើម្បីតបតទៅអ៊ីស្រាអែលវិញ។
ក្រុមអេស្បូឡាបានលើកឡើងថា ដោយសារព្រះជួយ គ្មានសកម្មជនប្រយុទ្ធក្រុមខ្លួនណាម្នាក់រងគ្រោះដោយសារការទំលាក់គ្រាប់បែកនេះទេ។ កាលពីថ្ងៃចន្ទ ប្រភពព័ត៌មានផ្នែកសន្តិសុខលីបង់បានគូសបញ្ជាក់ថា មានការទំលាក់គ្រាប់បែកតាមយន្តហោះចំនួន២ ទៅលើទីតាំងមួយរបស់ក្រុមអេស្បូឡា នៅព្រំដែនជាប់ជាមួយស៊ីរី។
គួររំលឹកថា ក្រុមអេស្បូឡា និកាយស្ហ៊ីអ៊ីត ត្រូវបានបង្កើតឡើង ក្នុងឆ្នាំ១៩៨២ ដើម្បីតបតទៅនឹងការឈ្លានពានរបស់អ៊ីស្រាអែលនៅលីបង់។ អាមេរិកបានចាត់ទុកក្រុមនេះថា ជាក្រុម ភេរវជន។ នៅលីបង់ ចលនាអេស្បូឡា ជាចលនាតែមួយគត់ ដែលនូវរក្សាបាននូវឧបករណ៍និងលក្ខណៈប្រយុទ្ធរបស់ខ្លួន ក្រោយសង្គ្រាមស៊ីវិលបានបញ្ចប់ក្នុងឆ្នាំ១៩៩០។ ក្រុមអេស្បូឡាមានទីតាំងខ្លួនច្រើនកន្លែង នៅភាគខាងត្បូងលីបង់ និងនៅជាយក្រុងបេរូត។ កាលពីឆ្នាំ២០១៣ ក្រុមឧទ្ទាមនេះបានទទួលស្គាល់ថា សកម្មជនរបស់ខ្លួនរាប់រយនាក់ បានចុះទៅជួយប្រធានាធិបតីស៊ីរី បាស្ហា អាល់អាសាដ ក្នុងការប្រយុទ្ធជាមួយពួកឧទ្ទាម។
គិតចាប់ពីអ៊ីស្រអែលធ្វើសង្គ្រាមជាមួយចលនាអេស្បូឡា ក្នុងឆ្នាំ២០០៦មក នេះជាលើកទី១ហើយ ដែលអ៊ីស្រាអែលបានទំលាក់គ្រាប់បែកវាយប្រហារក្រុមអេស្បូឡា។ អ៊ីស្រាអែលធ្លាប់បានលើកឡើងថា មិនអនុញ្ញាតអោយស៊ីរីផ្តល់អាវុធអោយក្រុមអេស្បូឡានោះទេ។ ទាក់ទងនឹងបញ្ហាដែលអ៊ីស្រាអែលបានទំលាក់គ្រាប់បែកប្រឆាំងក្រុមអេស្បូឡានេះ នាយករដ្ឋមន្ត្រីអ៊ីស្រាអែល បេនយ៉ាមីន នេតានីញ៉ាហ៊ូ បានលើកឡើងថា អ៊ីស្រាអែលបានធ្វើគ្រប់យ៉ាងទាំងអស់ ដើម្បីការពារខ្លួន ប៉ុន្តែអ៊ីស្រាអែលមិនប្រាប់ថា តើធ្វើសកម្មភាពអ្វីនោះទេ ក្នុងការ ការពារខ្លួននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ