ហ្កំប៊ី៖ ប្រធានាធិបតីចាញ់ឆ្នោតសុខចិត្តចុះចេញពីអំណាច
ប្រធានាធិបតីចាញ់ឆ្នោតនៅហ្កំប៊ី បានប្រកាសសុខចិត្តចុះចេញពីអំណាច នៅថ្ងៃសៅរ៍នេះ នៅក្រោមសម្ពាធប្រទេសនៅក្នុងតំបន់ ដែលគំរាមប្រើកម្លាំងទ័ពចូលធ្វើអន្តរាគមន៍ ដើម្បីគាំទ្រប្រធានាធិបតីដែលជាប់ឆ្នោត។ ការប្រកាសចុះចេញពីអំណាចនេះអាចជាការបើកផ្លូវ ទៅបញ្ចប់វិបត្តិ ដែលបានកើតឡើង ក្រោយការបោះឆ្នោត កាលពីខែធ្នូកន្លងទៅ។
ចុះផ្សាយនៅថ្ងៃ៖
ស្តាប់ - ០២:១២
លោក យ៉ាយ៉ា ចាម៉េ ដែលឡើងកាន់អំណាចនៅហ្កំប៊ី តាំងពីឆ្នាំ១៩៩៤ តាមរយៈការធ្វើរដ្ឋប្រហារ បានទទួលបរាជ័យនៅក្នុងការបោះឆ្នោតប្រធានាធិបតី កាលពីថ្ងៃទី១ធ្នូ ឆ្នាំ២០១៦។ ពីដំបូង លោកបានទទួលស្គាល់បរាជ័យ មុននឹងប្តូរចិត្តមកវិញ ហើយប្រកាសមិនទទួលស្គាល់ការបោះឆ្នោត ដោយចោទថាជាការបោះឆ្នោតមិនយុត្តិធម៌។ ការបដិសេធមិនផ្ទេរអំណាច ដែលបានរុញច្រានប្រទេសហ្កំប៊ីឲ្យធ្លាក់ចូលទៅក្នុងវិបត្តិនយោបាយដ៏ធ្ងន់ធ្ងរ ចំណែកឯលោក យ៉ាយ៉ា ចាម៉េ វិញ ត្រូវធ្លាក់ក្នុងភាពឯកោកាន់តែខ្លាំងឡើងៗពីថ្ងៃទៅមួយថ្ងៃ។
នៅក្នុងស្រុក រដ្ឋមន្រ្តីជាច្រើនរូប នៅក្នុងរដ្ឋាភិបាលរបស់លោកយ៉ាយ៉ា ចាម៉េ បានចុះចេញពីតំណែង ចំណែកឯនៅក្រៅស្រុកវិញ ប្រទេសក្នុងសហគមន៍សេដ្ឋកិច្ចអាហ្វ្រិកខាងលិចទាមទារឲ្យលោក យ៉ាយ៉ា ចាម៉េ ប្រគល់អំណាចទៅឲ្យប្រធានាធិបតីដែលទើបនឹងជាប់ឆ្នោត។
កាលពីថ្ងៃចន្ទ លោកយ៉ាយ៉ា ចាម៉េ បានធ្វើការព្យាយាមជាលើកចុងក្រោយ ដើម្បីបន្តក្រាញអំណាច ដោយបានប្រកាសដាក់ប្រទេសឲ្យស្ថិតក្នុងភាពអាសន្ន, រំលាយរដ្ឋាភិបាល ហើយបង្ខំឲ្យរដ្ឋសភាអនុម័តច្បាប់ពន្យារអាណត្តិរបស់លោករយៈពេល ៣ខែ។
៤ថ្ងៃក្រោយមក នៅថ្ងៃព្រហស្បតិ៍ ទាហានសហគមន៍សេដ្ឋកិច្ចអាហ្វ្រិកខាងលិចចំនួន ៧ពាន់នាក់ ដឹកនាំដោយសេណេហ្កាល់ និងនីហ្សេរីយ៉ា បានឆ្លងព្រំដែនចូលទៅដល់ក្នុងទឹកដីហ្កំប៊ី ទៅតាមសំណើប្រធានាធិបតីថ្មី ដែលទើបនឹងបានស្បថចូលកាន់តំណែងជាផ្លូវការ នៅក្នុងស្ថានទូតហ្កំប៊ី ប្រចាំប្រទេសសេណេហ្កាល់។ នៅថ្ងៃព្រហស្បតិ៍ដដែលនោះ ក្រុមប្រឹក្សាសន្តិសុខអ.ស.ប បានអនុម័តជាឯកច្ឆន្ទលើសេចក្តីសម្រេចគាំទ្រកិច្ចខិតខំប្រឹងប្រែងរបស់សហគមន៍អាហ្វ្រិកខាងលិចនៅក្នុងការដោះស្រាយវិបត្តិហ្កំប៊ី។
មួយថ្ងៃក្រោយមក នាយសេនាធិការចម្រុះកងទ័ពហ្កំប៊ី ដែលពីដំបូងគាំទ្រលោកយ៉ាយ៉ា ចាម៉េ បានប្រកាសមិនច្បាំងតទល់នឹងកងកម្លាំងអាហ្វ្រិក។ ហ្កំប៊ី ដែលជាកូនប្រទេសតូចមួយ មានប្រជាជនតែប្រមាណជាង ១លាននាក់ ហើយកងទ័ពតែប្រមាណជា ២ពាន់៥រយនាក់ គឺពិតជាពិបាកនឹងតទល់ជាមួយកងកម្លាំងអាហ្វ្រិកទាំង ៧ពាន់នាក់។
ហេតុដូច្នេះហើយបានជាលោក យ៉ាយ៉ា ចាម៉េ សុខចិត្តចុះចេញពីអំណាច ដោយបានប្រកាសតាមទូរទស្សន៍នៅថ្ងៃសៅរ៍នេះថា លោកចុះចេញពីអំណាច គឺដើម្បីបញ្ចៀសកុំឲ្យមានការបង្ហូរឈាមនៅហ្កំប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ