អាមេរិកចាប់ខ្លួនមនុស្សពីរនាក់ដោយចោទថាជាប់ពាក់ព័ន្ធនឹងរដ្ឋប្រហារមិនសម្រេចនៅហ្កំប៊ី
ក្រសួងយុត្តិធម៌អាមេរិកទើបបានចោទប្រកាន់ពលរដ្ឋអាមេរិកពីររូបដើមកំណើតហ្កំប៊ី ថាបានជាប់ពាក់ព័ន្ធនឹងការធ្វើរដ្ឋប្រហារមិនបានសម្រេចមួយនៅប្រទេសហ្កំប៊ីកាលពីថ្ងៃទី៣០ធ្នូកន្លងទៅ។ យោងតាម លោក Eric Holder រដ្ឋមន្ត្រីក្រសួងយុត្តិធម៌អាមេរិក ៖ “ជនជាប់ចោទទាំងពីររូបម្នាក់ឈ្មោះ Cherno Njie,អាយុ៥៧ឆ្នាំនិងម្នាក់ទៀត ឈ្មោះPapa Faal អាយុ៤៦ឆ្នាំ ដែលបានរួមគំនិតក្បថធ្វើរដ្ឋប្រហារដោយអំពើហិង្សាដើម្បីទម្លាក់រដ្ឋាភិបាលមួយនៅឯបរទេសគឺជាការបំពានលើច្បាប់អាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
យោងតាមក្រសួង FBI ពលរដ្ឋអាមេរិកទាំងពីររូបដែលមានដើមកំណើតហ្កំប៊ី បានទិញអាវុធនិងសម្ភារៈយោធានិងបានបញ្ជូនទៅកាន់ប្រទេសហ្កំប៊ី ក្នុងគោលបំណងវាយកម្ចាត់ប្រធានាធិបតីហ្កំប៊ី លោកYahya Jammeh ចេញពីរដ្ឋអំណាច ជាមួយក្តីរំពឹងដែរ ថាពួកគេនឹងបានទទួលជំនួយគាំទ្រពីកងទ័ព ហ្កំប៊ីមួយភាគដែរ។
ក៏ប៉ុន្តែ ការវាយប្រហារប្រឆាំងវិមានប្រធានាធិបតីហ្កំប៊ីនៅថ្ងៃទី៣០ធ្នូ ដោយមានជំនួយពីទាហានធ្វើរដ្ឋប្រហារតែមួយក្តាប់តូចនោះ ត្រូវទទួលបរាជ័យ ដោយទាហានស្មោះត្រង់នឹងលោកប្រធានាធិបតីហ្កំប៊ី បានវាយកម្ចាត់ចេញពីវិមានប្រធានាធិបតី។ គូរបញ្ជាក់ថានៅថ្ងៃធ្វើរដ្ឋប្រហារ ប្រធានាធិបតីហ្កំប៊ីលោក Yahya Jammeh កំពុងស្ថិតនៅក្រៅប្រទេស។
បន្ទាប់ពីរដ្ឋប្រហារមិនបានសម្រេចនៅហ្កំប៊ី Cherno Njie និង Papa Faal បានរត់គេចខ្លួនយ៉ាងរហ័សចេញពីហ្កំប៊ីនិងបានធ្វើដំណើរមកដល់អាមេរិកវិញ។ ប៉ុន្តែនៅពេលមកដល់ទីក្រុងវ៉ាស៊ីនតោន ជនទាំងពីរនាក់នេះ ត្រូវបានប៉ូលិសអាមេរិកចាប់ខ្លួនបាន គឺម្នាក់នៅថ្ងៃទី១មករានិងម្នាក់ទៀតនៅថ្ងៃទី៣មករា។
សូមបញ្ជាក់ថា Cherno Njie ដែលមានមុខរបរជាអ្នកជំនួញរស់នៅរដ្ឋ Texas គឺជាអ្នកផ្តល់ប្រាក់សម្រាប់ការវាយប្រហារនៅហ្កំប៊ី។ ជននេះបាននិយាយបញ្ជាក់ថា ខ្លួនមានបំណងចង់ហ្កំប៊ីក្លាយទៅជាប្រទេសមួយដែលប្រកបទៅដោយលិទ្ធិប្រជាធិបេត្យ។
ចំណែកជនជាប់ចោទ Papa Faal វិញបាននិយាយប្រាប់ពីគំនិតរបស់គេដែលប៉ុនប៉ងធ្វើរដ្ឋប្រហារទម្លាក់ប្រធានាធិបតីហ្កំប៊ី លោក Yahya Jammeh ជាយូលង់មកហើយ ពីព្រោះលោកបានឡើងកាន់រដ្ឋអំណាចក៏ដោយសារការលួចបន្លំសន្លឹកឆ្នោត។
ម្យ៉ាងទៀត Papa Faal ធ្លាប់បានបំរើក្នុងជួរកងទ័ពអាមេរិកអស់រយៈពេលជាច្រើនឆ្នាំកន្លងមកហើយនិងថែមទាំងបានបំពេញបេសសកម្មនៅអាហ្វហ្កានីស្ថានទៀតផង។
ជនជាប់ចោទទាំងពីរូប Papa Faal និង Cherno Njie អាចនឹងត្រូវជាប់ពន្ធនាគារក្នុងម្នាក់ៗរហូតដល់២៥ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ