ជំនួយប្រទេសក្រិកនឹងអាចកើនដល់ ១៣៥ពាន់លានអឺរ៉ូ សម្រាប់រយៈពេល ៣ឆ្នំា
ចុះផ្សាយនៅថ្ងៃ៖
ស្តាប់ - ០៥:៥៨
វិបត្តិសេដ្ឋកិច្ចនៅប្រទេសក្រិក កំពុងបន្តក្លាយជាក្តីបារម្ភរបស់សហភាពអឺរ៉ុប និងពិភពលោកទំាងមូល។ កាលពីម្សិលមិញ លោក Dominique Strauss-Kahn អគ្គនាយកនៃអង្គការមូលនិធីរូបិយវត្ថុអន្តរជាតិ ហៅកាត់ថា FMI និងលោក Jean-Claude Trichet ប្រធានធនាគារកណ្តាល អឺរ៉ុប បានអញ្ជើញទៅកាន់ប្រទេសអាឡឺម៉ង់ ដើម្បីនិយាយបញ្ចុះបញ្ចូលទីក្រុង Berlin ឲ្យសម្រេចចិត្ត ឲ្យបានឆាប់ក្នុងការជួយស្រោចស្រង់វិបត្តិនៅប្រទេសក្រិក។
នៅក្នុងជំនួបជាមួយក្រុមសមាជិកសភាអាឡឺម៉ង់ ប្រមុខអង្គការ FMI លោក Dominique Strauss-Kahn និងប្រធានធនាគារកណ្តាលអឺរ៉ុប លោក Jean-Claude Trichet បានគូសបញ្ជាក់ថា គេមិនត្រូវអូសបន្លាយវិបត្តិក្រិកបានទៀតឡើយ។ យោងតាមលោក Dominique Strauss-Kahn និងលោក Jean-Claude Trichet ប្រទេសក្រិកដែលត្រូវការជំនួយរយៈពេលយ៉ាងតិច ៣ឆ្នំា និងត្រូវការប្រាក់ចំនួន ១៣៥ពាន់លានអឺរ៉ូ។ ក៏ប៉ុន្តែ មូលហេតុសំខាន់ ដែលប្រមុខអង្គការ FMI និងប្រធានធនាគារកណ្តាលអឺរ៉ុបបានអញ្ជើញទៅកាន់ប្រទេសអាឡឺម៉ង់ គឺដើម្បីនិយាយជំនះរដ្ឋាភិបាលទីក្រុង Berlin ពិសេសលោកស្រីនាយករដ្ឋមន្រ្តី Angela Merkel ឲ្យសម្រេចចិត្តឲ្យបានលឿនបំផុត ក្នុងការជួយស្រោចស្រង់វិបត្តិសេដ្ឋកិច្ចរបស់ប្រទេសក្រិក។
សូមជម្រាបជូនថា កាលពីថ្ងៃសុក្រទី២៣មេសាកន្លងទៅរដ្ឋាភិបាលក្រិកបានប្រកាសអំពាវនាវរកជំនួយពីសហភាពអឺរ៉ុបនិង ពីអង្គការមូលនិធិរូបិយវត្ថុអន្តរជាតិក្នុងទឹកប្រាក់សរុប ៤ម៉ឺន ៥ពាន់លានអឺរ៉ូ ក្នុងនោះ ខ្ចីពីអង្គការមូលនិធិរូបិយវត្ថុអន្តរជាតិចំនួន១ម៉ឺន៥ពាន់លានអឺរ៉ូ និងពីសហភាពអឺរ៉ុបចំនួន៣ម៉ឺនលានអឺរ៉ូ។ អង្គការមូលនិធិរូបិយវត្ថុអន្តរជាតិយល់ព្រមឲ្យខ្ចីហើយ តែនៅខាងសហភាពអឺរ៉ុបវិញ មានប្រទេសមួយចំនួន បន្តរារែក ពិសេស ប្រទេសអាឡឺម៉ង់។ អ្វីដែលប្រមុខអង្គការ FMI លោក Dominique Strauss-Kahn និងប្រធានធនាគារកណ្តាលអឺរ៉ុប លោក Jean-Claude Trichet បាននិយាយធានាដល់ក្រុមអ្នកតំណាងរាស្រ្តអាឡឺម៉ង់ គឺលក្ខខណ្ឌមួយចំនួន ទាក់ទងនឹងប្រាក់កម្ចីចំនួន ៨ពាន់ ៤រយលានអឺរ៉ូ ដែលអាឡឺម៉ង់ត្រូវជួយប្រទេសក្រិក។
លោកស្រីនាយករដ្ឋមន្រ្តីអាឡឺម៉ង់ Angela Merkel រងសម្ពាធពីគ្រប់មជ្ឈដ្ឋាន
តំាងតែពីនៅក្នុងសេចក្តីថ្លែងការណ៍លើកដំបូងរបស់ខ្លួន លោកស្រីនាយករដ្ឋមន្រ្តីអាឡឺម៉ង់ Angela Merkel បានបញ្ជាក់យ៉ាងច្បាស់ៗថា អាឡឺម៉ង់អាចជួយប្រទេសក្រិកបាន លុះត្រាណាតែក្រិកមានផែនការសង្គ្រោះឲ្យបានច្បាស់លាស់។ ទោះបីជាមានអន្តរាគមន៍ធានាពីប្រមុខអង្គការ FMI លោក Dominique Strauss-Kahn និងប្រធានធនាគារកណ្តាលអឺរ៉ុប លោក Jean-Claude Trichet ក៏ដោយ ក៏គេនៅមិនទាន់ទទួលចម្លើយជាក់ច្បាស់ណាមួយពីប្រទេសអាឡឺម៉ង់ដែរ។ ប៉ុន្តែ លោកស្រីនាយករដ្ឋមន្រ្តីអាឡឺម៉ង់ Angela Merkel ក៏ដូចជារដ្ឋមន្រ្តីក្រសួងហិរញ្ញវត្ថុ លោក Wolfgang Schäuble បានសន្យាថា នឹងផ្តល់សេចក្តីសម្រេចចិត្តនៅថ្ងៃខាងមុខ។ ជាមួយគ្នានេះ លោកស្រី Angela Merkel នៅតែបន្តអះអាងជាថ្មីម្តងទៀត ថាអាឡឺម៉ង់នឹងចូលរួមជួយស្រោចស្រង់ប្រទេសក្រិច លុះត្រាណាតែ ប្រទេសក្រិកប្រឹងប្រែងធ្វើឲ្យមានតម្លាភាពនៅក្នុងផ្នែកហិរញ្ញវត្ថុរបស់ខ្លួន។
ជារួម មិនមែនថា លោកស្រី Angela Merkel មិនចង់ជួយប្រទេសក្រិក ដែលជាសមាជិកអឺរ៉ុបម្នាក់នោះទេ តែការរារែក ដោយមកពីបរិបទនយោបាយផ្ទៃក្នុង ពីព្រោះនៅថ្ងៃទី ៩ ឧសភាខាងមុខ អាឡឺម៉ង់នឹងរៀបចំការបោះឆ្នោតតំបន់ ហើយគម្រោងនៃការជួយប្រទេសក្រិក ទំាងបក្សប្រឆំាង និងប្រជាជនអាឡឺម៉ង់ភាគច្រើន មិនបានគំាទ្រទេ។ ប្រជាជនអាឡឺម៉ង់ភាគច្រើនរអ៊ូរទំាថា ធុនទ្រាន់នឹងជួយដោះទុក្ខអ្នកដទៃ មិនឈប់ឈរ។ ដូច្នេះ ប្រសិនបើលោកស្រី Merkel ហ៊ានសម្រេចចិត្តភ្លាមៗនោះ គណបក្សរបស់លោកស្រី ច្បាស់ជាចាញ់ឆ្នោតជាមិនខាន។ យ៉ាងណាក៏ដោយ រដ្ឋាភិបាលអាឡឺម៉ង់ចង់ឲ្យមានដំណោះស្រាយឆាប់ៗ ដើម្បីធ្វើយ៉ាងណា កុំឲ្យវិបត្តិក្រិកឆ្លងរាលដាលចូលក្នុងប្រទេសអឺរ៉ុបផ្សេងទៀត។ វិបត្តិសេដ្ឋកិច្ចរបស់ក្រិកនឹងធ្វើឲ្យប្រាក់អឺរ៉ូបាត់បង់ស្ថិរភាព។ អស្ថិរភាពនៃប្រាក់អឺរ៉ូនឹងធ្វើឲ្យប៉ះពាល់ដល់គ្រប់ប្រទេសទាំងអស់ដែលចាយប្រាក់អឺរ៉ូ។
ប្រទេសក្រិកអាចនឹងក្ស័យធន ?
ប្រទេសមួយ មិនអាចក្ស័យធន ដួលរលំដូចរោងចក្រមួយ ឬក៏ក្រុមហ៊ុនមួយ ដែលត្រូវគេរឹបអូសយកទ្រព្យសម្បត្តិ ដោយសារតែរោងចក្រឬក្រុមហ៊ុននោះជំពាក់បំណុលគេវ័នក គ្មានលទ្ធភាពសងគេនោះទេ។ មួយវិញទៀត គ្មានស្ថាប័នអន្តរជាតិណាមួយ ជាអ្នកសម្រេចចិត្ត ពីការដួលរលំ ក្ស័យធនរបស់ប្រទេសណាមួយទេ។ ក៏ប៉ុន្តែ ប្រទេសមួយ ដូចករណីប្រទេសក្រិក អាចប្រឈមមុខនឹងបំណុលដ៏ច្រើនសម្បើម ដែលខ្លួនគ្មានសមត្ថភាពនឹងសងគេ។ ស្ថានភាពដែលប្រទេសក្រិកកំពុងជួបប្រទះពេលនេះ មិនមែនជារឿងថ្មីទេ។ ប្រទេស Argentine ធ្លាប់បានជួបប្រទះកាលពីឆ្នំា ២០០១ ដែលពេលនោះ រដ្ឋាភិបាលគ្មានសមត្ថភាពនឹងសងប្រាក់បំណុលគេ ប្រមាណជា ១០ម៉ឺនលានដុល្លារ។ គេត្រូវរង់ចំារហូតដល់ឆ្នំា ២០០៥ ទើបប្រទេស Argentine និងប្រទេសម្ចាស់បំណុលបានរកឃើញកិច្ចព្រមព្រៀងមួយ ស្តីពីរបៀបសងរំលួស។ បន្តិចម្តងៗ អ្នកវិនិយោគឯកជនក៏ចាប់ផ្តើមមានទំនុកចិត្តលើរដ្ឋាភិបាលArgentineឡើងវិញ។ ករណីប្រទេសក្រិក ក៏មិនខុសគ្នាពីប្រទេស Argentine កាលពី ១០ឆ្នំា មុនដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ