សន្និសីទអន្តរជាតិស្តីពីវិបត្តិស៊ីរីបើកធ្វើនៅស្វ៊ីសជាមួយនឹងក្តីសង្ឃឹមដ៏តិចតួច
ចុះផ្សាយនៅថ្ងៃ៖
ស្តាប់ - ០៤:៥៧
សន្និសីទអន្តរជាតិ ស្តីពីវិបត្តិស៊ីរី បានចាប់ផ្តើមបើកធ្វើនៅថ្ងៃពុធនេះ នៅក្នុងប្រទេសស្វ៊ីស។ សន្និសីទនេះបានបើកធ្វើ នៅក្នុងបរិបទនៃភាពចម្រូងចម្រាសយ៉ាងខ្លាំង ដែលស្ទើរតែមិនអាចបើកធ្វើទៅបាន ជាពិសេស ចំណោទជុំវិញវត្តមានរបស់អ៊ីរ៉ង់ និងការចូលរួមពីសំណាក់ក្រុមប្រឆាំងស៊ីរី។
សំណួរ-តើមានប្រទេសណាខ្លះ ដែលចូលរួមក្នុងសន្និសីទនេះ?
ប្រទេសដែលចូលរួមក្នុងសន្និសីទ ស្តីពីវិបត្តិស៊ីរី នៅពេលនេះ មានសរុបទាំងអស់ ៣១ប្រទេស។ ក្រៅពីស៊ីរី (តំណាងរដ្ឋាភិបាល និងតំណាងក្រុមប្រឆាំង) ដែលជាតួអង្គសំខាន់នៃសន្និសីទ មានប្រទេសសមាជិកអចិន្រ្តៃយ៍នៃក្រុមប្រឹក្សាសន្តិសុខអ.ស.ប (សហរដ្ឋអាមេរិក អង់គ្លេស បារាំង ចិន និងរុស្ស៊ី) និងប្រទេស ២៥ផ្សេងទៀត ដែលភាគច្រើនជាប្រទេសអារ៉ាប់ ឬប្រទេសកាន់សាសនាអ៊ីស្លាម។
ក្រៅពីគណៈប្រតិភូជាតំណាងរដ្ឋ ក៏មានដែរ តំណាងអ.ស.ប គឺលោកអគ្គលេខាធិការអ.ស.ប បាន គីមូន និងតំណាងអង្គការអន្តរជាតិផ្សេងទៀត រួមមាន សហភាពអឺរ៉ុប សម្ព័ន្ធអារ៉ាប់ និងអង្គការសហប្រតិបត្តិការអ៊ីស្លាម (Organisation of Islamic Cooperation)។
គណៈប្រតិភូដែលចូលរួមក្នុងសន្និសីទ ភាគច្រើនដឹកនាំដោយរដ្ឋមន្រ្តីការបរទេស។
សំណួរ-តើអ្វីទៅជារបៀបវារៈនៃកិច្ចប្រជុំនេះ?
ថ្ងៃពុធនេះ គឺជាថ្ងៃបើកសន្និសីទ ដែលមេដឹកនាំគណៈប្រតិភូនីមួយៗនាំគ្នាឡើងថ្លែងសុន្ទរកថាម្នាក់ម្តងៗ។ រហូតទាល់តែដល់ថ្ងៃសុក្រ ទើបកិច្ចចរចាចាប់ផ្តើមបើកធ្វើ ហើយការចរចានេះ នឹងត្រូវធ្វើឡើងតែរវាងភាគីជម្លោះនៅស៊ីរីប៉ុណ្ណោះ ដោយមានលោកឡាក់ ដាប្រាហ៊ីមី ប្រេសិតពិសេសរបស់អ.ស.ប និងសម្ព័ន្ធអារ៉ាប់ ធ្វើជាអាជ្ញាកណ្តាល។
គោលដៅសំខាន់បំផុត នៃសន្និសីទនេះ គឺស្វះស្វែងរកដំណោះស្រាយបញ្ចប់សង្រ្គាមស៊ីវិលនៅស៊ីរី ហើយដំណោះស្រាយនេះ ត្រូវធ្វើទៅតាមគោលការណ៍ ដែលគេបានឯកភាពគ្នា នៅក្នុងសន្និសីទ កាលពីខែមិថុនា ឆ្នាំ២០១២ ដែលគេហៅថា សន្និសីទហ្សឺណែវលើកទី១។
អ្វីដែលគេបានឯកភាពគ្នាក្នុងសន្និសីទហ្សឺណែវលើកទី១ គឺការដោះស្រាយវិបត្តិ តាមរយៈការបង្កើតរដ្ឋាភិបាលបណ្តោះអាសន្នមួយ ដែលមានអំណាចពេញលេញខាងនីតិប្រតិបត្តិ និងដោយមានការចូលរួមពីគ្រប់ភាគីជម្លោះ។ ជំហានបន្ទាប់មកទៀត គឺការរៀបចំធ្វើកំណែទម្រង់រដ្ឋធម្មនុញ្ញ និងស្ថាប័នកំពូលៗ មុននឹងឈានទៅធ្វើការបោះឆ្នោត ទៅតាមគោលការណ៍ប្រជាធិបតេយ្យសេរីពហុបក្ស។
ការបង្កើតរដ្ឋាភិបាលបណ្តោះអាសន្ន គឺជាប្រធានបទចម្បង នៅក្នុងសន្និសីទហ្សឺណែវលើកទី២។
សំណួរ-តើគេមានក្តីរំពឹងថានឹងមានលទ្ធផលអ្វី ពីសន្និសីទនេះដែរឬទេ?
មានមនុស្សតិចតួចណាស់ ដែលរំពឹងថា សន្និសីទហ្សឺណែវទី២នេះនឹងចេញជាលទ្ធផល ដែលឈានទៅរកដំណោះស្រាយបញ្ចប់សង្រ្គាមស៊ីវិលនៅស៊ីរីនេះបាន ពីព្រោះ គេមើលឃើញថា ភាគីជម្លោះប្រកាន់ជំហរផ្ទុយពីគ្នាស្រឡះ ហើយហាក់ដូចជាមិនមានភាគីណាមួយមានឆន្ទៈធ្វើសម្បទានទៅលើចំណុចចម្រូងចម្រាស។
អ្នកខ្លះគេគិតថា កុំថាឡើយនិយាយទៅដល់កិច្ចព្រមព្រៀងបញ្ចប់សង្រ្គាមស៊ីវិល គ្រាន់តែសន្និសីទនេះអាចបើកធ្វើទៅបាន ហើយភាគីជម្លោះស៊ីរីសុខចិត្តអង្គុយទល់មុខគ្នា ជជែកគ្នាបាន អាចរាប់ថាជាជោគជ័យមួយទៅហើយ។
សំណួរ-តើអ្វីទៅជាចំណុចខ្ទាស់ នៅក្នុងដំណោះស្រាយវិបត្តិស៊ីរីនេះ?
ចំណុចដែលចម្រូងចម្រាសខ្លាំង គឺទាក់ទងនឹងបុគ្គលលោកបាស្ហា អាល់អាសាដ។ ក្រុមប្រឆាំងស៊ីរីបានទាមទារយ៉ាងដាច់អហង្ការថា រាល់ដំណោះស្រាយណាក៏ដោយ ត្រូវធ្វើឡើងដោយគ្មានវត្តមានលោកអាសាដ។ លោកអាសាដត្រូវតែចុះចេញពីអំណាច ហើយមិនអាចមានវត្តមាន នៅក្នុងរដ្ឋាភិបាលបណ្តោះអាសន្នបានទេ ពីព្រោះគេអះអាងថា លោកអាសាដមានបាតដៃប្រឡាក់ឈាមប្រជាជនស៊ីវិលស៊ីរីរាប់ម៉ឺននាក់ ដែលស្លាប់ក្នុងវិបត្តិ ៣ឆ្នាំកន្លងទៅនេះ។
រដ្ឋាភិបាលស៊ីរីវិញនៅតែប្រកាន់ជំហរយ៉ាងតឹងរ៉ឹងដដែល គឺលោកអាសាដនឹងមិនចុះចេញពីអំណាចជាដាច់ខាត។ លើសពីនេះទៅទៀត លោកអាសាដខ្លួនឯងផ្ទាល់ ទើបនឹងបានប្រកាស នៅក្នុងបទសម្ភាសន៍ជាមួយទីភ្នាក់ងារព័ត៌មានបារាំង AFP នៅមុនពេលបើកសន្និសីទក្រុងហ្សឺណែវថា លោកមិនត្រឹមតែមិនចុះចេញពីអំណាចទេ ក៏ប៉ុន្តែ ប្រហែលជានឹងបន្តឈរឈ្មោះជាបេក្ខជនប្រធានាធិបតីមួយអាណត្តិទៀត។
អ្វីដែលអាចធ្វើឲ្យក្រុមប្រឆាំងស៊ីរីកាន់តែមិនព្រមទទួលយកវត្តមានរបស់លោកអាសាដទៅទៀត គឺ កាលពីប៉ុន្មានថ្ងៃមុនបើកសន្និសីទ ក្រុមអ្នកស៊ើបអង្កេតអន្តរជាតិ ដែលរួមមានអតីតរដ្ឋអាជ្ញាខាងឧក្រិដ្ឋកម្មសង្រ្គាម និងអ្នកជំនាញខាងសិក្សាអំពីភស្តុតាង ទើបនឹងបានចេញផ្សាយរបាយការណ៍ ដែលអះអាងថា គេមានភស្តុតាង ដែលអាចបញ្ជាក់អំពីឧក្រិដ្ឋកម្មប្រឆាំងមនុស្សជាតិ ប្រព្រឹត្តដោយរដ្ឋាភិបាលរបស់លោកបាស្ហា អាល់អាសាដ។
នៅថ្ងៃពុធនេះ នៅពេលបើកសន្និសីទហ្សឺណែវ លោកចន ឃែរី រដ្ឋមន្រ្តីក្រសួងការបរទេសអាមេរិក បានបញ្ជាក់សាជាថ្មីម្តងទៀតថា លោកអាសាដជាមេដឹកនាំប្រើអំពើឃោរឃៅ ទៅលើប្រជាជនខ្លួនឯង ដូច្នេះ មិនអាចបន្តដឹកនាំប្រទេសស៊ីរីបានតទៅទៀតទេ។ លោកអាសាដនឹងមិនត្រូវមានវត្តមាន នៅក្នុងរដ្ឋាភិបាលបណ្តោះអាសន្នស៊ីរីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ