អាល្លឺម៉ង់ថាអង់គ្លេសអាចត្រូវដើរចេញពីសហភាពអឺរ៉ុបបើនៅតែទាមទារកម្រិតសេរីភាពក្នុងការធ្វើដំណើរ
ចុះផ្សាយនៅថ្ងៃ៖
ស្តាប់ - ០៥:០៩
បណ្តាញផ្សព្វផ្សាយព័ត៌មានអាល្លឺម៉ង់ទើបនឹងបានចុះផ្សាយបើកកកាយអំពីភាពតានតឹង រវាងអាល្លឺម៉ង់ និងអង់គ្លេស ជុំវិញសិទ្ធិសេរីភាពក្នុងការធ្វើដំណើរ និងស្នាក់នៅ រវាងពលរដ្ឋនៃប្រទេសជាសមាជិកសហភាពអឺរ៉ុប ដែលប្រមុខរដ្ឋាភិបាលអង់គ្លេសកំពុងតែទទូចសុំឲ្យធ្វើការកែប្រែ។ នៅក្នុងអំឡុងជំនួបកំពូលប្រមុខដឹកនាំសហភាពអឺរ៉ុប កាលពីពេលថ្មីៗនេះ លោកស្រីអង់ហ្គេឡា មែរកិល ប្រមុខរដ្ឋាភិបាលអាល្លឺម៉ង់បានព្រមានលោកនាយករដ្ឋមន្រ្តីអង់គ្លេសថា ប្រសិនបើលោកនៅតែចចេសទាមទារឲ្យមានការកម្រិតសិទ្ធិសេរីភាពក្នុងការធ្វើដំណើរនេះទៀត អង់គ្លេសនឹងត្រូវដើរចេញពីសហភាពអឺរ៉ុប។
សិទ្ធិសេរីភាពក្នុងការធ្វើដំណើរ គឺជាសិទ្ធិមូលដ្ឋាន ដែលមានចែងនៅក្នុងសន្ធិសញ្ញារបស់សហភាពអឺរ៉ុប ហើយដែលគ្រប់ប្រទេសសមាជិកទាំងអស់មានកាតព្វកិច្ចត្រូវតែគោរព។
យោងតាមគោលការណ៍នៃសន្ធិសញ្ញាសហភាពអឺរ៉ុប ពលរដ្ឋនៃប្រទេសជាសមាជិកសហភាពអឺរ៉ុប (ដែលគេហៅថា "ពលរដ្ឋសហភាពអឺរ៉ុប") មានសិទ្ធិធ្វើដំណើរ ស្នាក់នៅ ធ្វើការ និងប្រកបកិច្ចការជំនួញ ក្នុងគ្រប់ប្រទេសទាំងអស់ ក្នុងសហភាពអឺរ៉ុប ដោយមិនចាំបាច់សុំទិដ្ឋាការ ពោលគឺ ទាមទារឲ្យមានត្រឹមលិខិតឆ្លងដែន ឬអត្តសញ្ញាណបណ្ណប៉ុណ្ណោះ។
ចំពោះការស្នាក់នៅលើសពី ៣ខែ គេត្រូវបំពេញតាមលក្ខខណ្ឌមួយចំនួន ដូចជា ត្រូវមានការងារធ្វើ ឬជានិស្សិតដែលចុះឈ្មោះរៀននៅសាលា ឬត្រូវបញ្ជាក់ពីធនធានផ្ទាល់ខ្លួន ដែលអាចបំពេញតម្រូវការរស់នៅប្រចាំថ្ងៃ ដោយមិនត្រូវជាបន្ទុករបស់រដ្ឋ។
នៅក្នុងការអនុវត្តជាក់ស្តែង ប្រទេសភាគច្រើននៅក្នុងសហភាពអឺរ៉ុប បានលុបចោលលែងឲ្យមានប៉ុស្តិ៍ត្រួតពិនិត្យតាមព្រំដែន ហើយពលរដ្ឋសហភាពអឺរ៉ុបអាចធ្វើដំណើរឆ្លងកាត់ពីប្រទេសមួយទៅប្រទេសមួយ ប្រៀបដូចធ្វើដំណើរឆ្លងកាត់ពីខេត្តមួយទៅខេត្តមួយដូច្នោះដែរ។
អង់គ្លេសនៅតែមានការឆែកឆេរនៅតាមច្រកព្រំដែន ហើយជនបរទេស ដែលមានទិដ្ឋាការ ឬមានសិទ្ធិស្នាក់នៅក្នុងប្រទេសផ្សេងក្នុងសហភាពអឺរ៉ុប ក៏ប៉ុន្តែ មិនមែនជាពលរដ្ឋសហភាពអឺរ៉ុប ត្រូវតែសុំទិដ្ឋាការទើបអាចធ្វើដំណើរចូលទៅក្នុងទឹកដីអង់គ្លេសបាន ពីព្រោះអង់គ្លេសមិនមែនជាសមាជិកសន្ធិសញ្ញា Schengen។
ផ្ទុយទៅវិញ ពលរដ្ឋសហភាពអឺរ៉ុបអាចធ្វើដំណើរចេញចូល ស្នាក់នៅ ធ្វើការ និងប្រកបកិច្ចការជំនួញ ក្នុងប្រទេសអង់គ្លេសបាន ដោយទាមទារឲ្យមានត្រឹមតែលិខិតឆ្លងដែន ឬអត្តសញ្ញាណបណ្ណប៉ុណ្ណោះ។
អ្វីដែលរដ្ឋាភិបាលរបស់លោកដាវីដ កាមេរ៉ន កំពុងទាមទារនៅពេលនេះ គឺចង់ឲ្យសហភាពអឺរ៉ុបកែប្រែច្បាប់ ដើម្បីផ្តល់សិទ្ធិឲ្យអង់គ្លេសអាចកំណត់ចំនួនពលរដ្ឋសហភាពអឺរ៉ុប ដែលអាចចូលមកស្នាក់នៅ និងធ្វើការនៅក្នុងប្រទេសអង់គ្លេស។ រដ្ឋាភិបាលអង់គ្លេសមិនចង់ទទួលឲ្យស្នាក់នៅអ្នកដែលគ្មានការងារធ្វើ ព្រមទាំងចង់កំណត់កូតាអ្នកមានការងារធ្វើ ក៏ប៉ុន្តែ ជាកម្មករគ្មានជំនាញ ឬមានជំនាញតិចតួច។ អង់គ្លេសក៏ទាមទារផងដែរនូវសិទ្ធិកំណត់កូតាសញ្ជាតិ មានន័យថា ក្នុងមួយឆ្នាំៗ អង់គ្លេសអាចកំណត់ថា តើពលរដ្ឋមកពីបារាំងប៉ុន្មាន ពីអាល្លឺម៉ង់ប៉ុន្មាន ពីប្រទេសផ្សេងទៀតប៉ុន្មាន ដែលអាចចូលមករស់នៅក្នុងប្រទេសអង់គ្លេសបាន។
អង់គ្លេសទាមទារបែបនេះ ក្នុងគោលដៅទប់ស្កាត់ការហូរចូលនៃពលរដ្ឋមកពីប្រទេសនៅអឺរ៉ុបខាងកើត ដែលទើបនឹងចូលជាសមាជិកសហភាពអឺរ៉ុប។ ក្នុងចំណោមប្រទេសចំណូលថ្មីនេះ មានប្រទេសខ្លះ ជាពិសេស ប៊ុលហ្ការី និងរ៉ូម៉ានី គឺជាប្រទេសក្រីក្រ ប្រជាជនមិនសូវមានជំនាញ ការងារនៅក្នុងប្រទេសក៏មិនសូវសម្បូរ ហើយប្រាក់ខែមធ្យមក៏មានកម្រិតទាបខ្លាំង បើធៀបនឹងប្រទេសផ្សេង។ ហេតុដូច្នេះហើយបានជាប្រជាជននៅក្នុងប្រទេសចំណូលថ្មីទាំងនេះចេះតែនាំគ្នាចង់រត់ទៅរស់នៅប្រទេសផ្សេង ដោយក្នុងនោះ អង់គ្លេសគឺជាទិសដៅដ៏សំខាន់មួយ ដោយសារតែកម្រិតជីវភាព និងប្រាក់ខែមធ្យមនៅអង់គ្លេសមានកម្រិតខ្ពស់។
នៅក្នុងការធ្វើជំរឿនប្រជាជនអង់គ្លេស កាលពីឆ្នាំ២០១១ គេឃើញមានពលរដ្ឋមកពីអឺរ៉ុបខាងកើតរហូតដល់ទៅជាង ១លាននាក់ កំពុងរស់នៅក្នុងប្រទេសអង់គ្លេស ហើយរដ្ឋាភិបាលអភិរក្សនិយមរបស់លោកដាវីដ កាមេរ៉ន ចេះតែលើកឡើងនូវក្តីបារម្ភថា ការកើនឡើងនៃចំនួនពលរដ្ឋមកពីអឺរ៉ុបខាងកើត ដែលមិនសូវមានប្រាក់ចំណូលខ្ពស់នេះ អាចនឹងក្លាយជាបន្ទុកធ្ងន់ដល់រដ្ឋអង់គ្លេស ជាពិសេស បន្ទុកទៅលើសេវាកម្មសុខភាព និងអប់រំ។
ម្យ៉ាងទៀត នៅអង់គ្លេស គេឃើញថា និន្នាការប្រឆាំងនឹងសហភាពអឺរ៉ុបចេះតែមានការកើនឡើង ហើយគណបក្សនយោបាយដែលប្រឆាំងនឹងសហភាពអឺរ៉ុបចេះតែមានប្រជាប្រិយភាពកើនឡើងពីការបោះឆ្នោតមួយទៅការបោះឆ្នោតមួយ។
ដូច្នេះហើយបានជាលោកដាវីដ កាមេរ៉ន ទាមទារឲ្យសហភាពអឺរ៉ុបធ្វើកំណែទម្រង់ផ្នែកអន្តោប្រវេសន៍នេះ ឲ្យបានមុនឆ្នាំ២០១៧ ដែលពលរដ្ឋអង់គ្លេសត្រូវធ្វើការបោះឆ្នោតប្រជាមតិសម្រេចថា តើបន្តនៅជាសមាជិកសហភាពអឺរ៉ុបតទៅទៀតដែរឬអត់។ ក៏ប៉ុន្តែ ការទាមទាររបស់លោកដាវីដ កាមេរ៉ន ត្រូវបានស្ថាប័នសហភាពអឺរ៉ុប ក៏ដូចជា ប្រទេសសមាជិកមួយចំនួនផ្សេងទៀតបដិសេធយ៉ាងដាច់អហង្ការរួចទៅហើយ ហើយទាក់ទងនឹងបញ្ហានេះ គេឃើញថា អាល្លឺម៉ង់ ដែលជាប្រទេសដ៏មានអំណាចនៅក្នុងសហភាពអឺរ៉ុប ហាក់ដូចជាមានសម្តីធ្ងន់ជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ