ភាពតានតឹងបានផ្ទុះជាថ្មីរវាងអ៊ីស្រាអែល និងស៊ីរីជុំវិញតំបន់ខ្ពង់រាបហ្គូឡាន
ចុះផ្សាយនៅថ្ងៃ៖
ស្តាប់ - ០៦:៥០
នៅយប់ថ្ងៃអង្គារឆ្លងចូលមកថ្ងៃពុធ ទី១៩ មីនានេះ កងទ័ពអ៊ីស្រាអែលបានធ្វើការទម្លាក់គ្រាប់បែកចំនួន ៤ដងបន្តបន្ទាប់គ្នាលើទឹកដីស៊ីរីម្តុំតំបន់ខ្ពស់រាបហ្គូឡាន (Golan) ជាប់ព្រំដែនជាមួយប្រទេសស៊ីរី ពិសេសទម្លាក់លើទីតំាងបន្ទាយទាហានស៊ីរី។ ទង្វើរបស់ទាហានអ៊ីស្រាអែលពេលនេះបានកើតមានឡើង ប៉ុន្មានម៉ោងបន្ទាប់ពីមានព្រឹត្តិការណ៍បំផ្ទុះគ្រាប់បែកមួយគ្រាប់លើរថយន្តមួយរបស់កងល្បាតអ៊ីស្រាអែលក្នុងតំបន់ខ្ពង់រាបហ្គូឡាននៅតាមខ្សែបណ្តាយព្រំដែនរវាងអ៊ីស្រាអែល និងស៊ីរី។ យោងតាមតួលេខផ្តល់ដោយកងទ័ពអ៊ីស្រាអែល ការផ្ទុះនោះបានបណ្តាលឲ្យមានទាហានអ៊ីស្រាអែលរបួសចំនួន ៤នាក់។ តែនៅខាងស៊ីរីឯណោះ មានស្លាប់ម្នាក់ និងរបួស ៧នាក់នៅក្រោមការទម្លាក់គ្រាប់បែកតបវិញរបស់ទាហានអ៊ីស្រាអែល។
ពីដំបូងឡើយ តំបន់ខ្ពង់រាបហ្គូឡាន (Golan) ជាដែនដីរបស់ប្រទេសស៊ីរី។ តែជានិច្ចកាល តំបន់នោះត្រូវបានក្រុមឧទ្ទាមក្នុងប្រទេសស៊ីរីប្រើជាមូលដ្ឋានដើម្បីបាញ់ផ្លោងគ្រាប់រ៉ូកែតលើទឹកដីអ៊ីស្រាអែល។ នៅក្នុងសង្រ្គាមរវាងអ៊ីស្រាអែលទល់នឹងប្រទេសអេហ្ស៊ីប ហ្ស៊កដានី និងប្រទេសស៊ីរីដែលគេហៅថាសង្រ្គាម ៦ថ្ងៃក្នុងឆ្នំា ១៩៦៧ កងទ័ពអ៊ីស្រាអែលក៏បានឆ្លៀតវាយដណ្តើមកាន់កាប់តំបន់ខ្ពង់រាបហ្គូឡានទំាង។ ការកាន់កាប់តំបន់ខ្ពង់រាបហ្គូឡានពីសំណាក់ទាហានអ៊ីស្រាអែលពេលនោះបានអនុញ្ញាតឲ្យអ៊ីស្រាអែលរួចផុតពីការវាយឆ្មក់ពីក្រុមឧទ្ទាម។
ក៏ប៉ុន្តែ រឿងរ៉ាវជុំវិញតំបន់ខ្ពង់រាបហ្គូឡានបានបង្កឲ្យផ្ទុះសង្រ្គាមថ្មីមួយទៀតក្នុងឆ្នំា ១៩៧៣ ដែលគេហៅថាសង្រ្គាម Kippour។ សង្រ្គាមកាលណោះបានអនុញ្ញាតឲ្យទាហានស៊ីរីដណ្តើមកាន់កាប់តំបន់ខ្ពង់រាបហ្គូឡានប្រមាណជា ៦០% មកវិញ។ ក្រោយមក ទាហានអ៊ីស្រាអែលក៏បានរុញច្រានទាហានស៊ីរីចេញពីទីនោះជាថ្មី។ តែក្នុងពេលនោះ ភាគីជម្លោះទំាងពីរក៏បានចុះហត្ថលេខាលើបទឈប់បាញ់គ្នាមួយដោយអ៊ីស្រាអែលយល់ព្រមត្រលប់មកទទួលយកខ្សែបន្ទាត់ព្រំដែនក្នុងឆ្នំា ១៩៦៧។ តែតំបន់ដែលទាហានអ៊ីស្រាអែលបានដកថយត្រូវបានដាក់ជាតំបន់គ្មានកងទ័ព និងស្ថិតក្រោមការឃ្លំាមើលរបស់អង្គការសហប្រជាជាតិតំាងពីឆ្នំា ១៩៧៤ មកដល់សព្វថ្ងៃ។
បច្ចុប្បន្ននេះ តំបន់ខ្ពង់រាបហ្គូឡានដែលមានផ្ទៃដីសរុបជាង ១ ៥០០គីឡូម៉ែត្រក្រឡានោះ មានជាង ១ ០០០គីឡូម៉ែត្រក្រឡាត្រូវបានអ៊ីស្រាអែលដែលជាអ្នកឈ្នះសង្រ្គាមប្រកាសដាក់បញ្ចូលជាដែនដីរបស់ខ្លួនក្នុងឆ្នំា ១៩៨១។ ទង្វើនេះត្រូវបានក្រុមប្រឹក្សាសន្តិសុខអង្គការសហប្រជាជាតិថ្កោលទោសភ្លាមៗ និងមិនដែលបានទទួលស្គាល់ជាលក្ខណៈអន្តរជាតិទេ។ រីឯស៊ីរីដែលជាម្ចាស់ដើម និងជាអ្នកចាញ់សង្រ្គាម បានកាន់កាប់ដែនដីនៅសេសសល់តែប្រមាណជាង ៥០០គីឡូម៉ែត្រក្រឡា។
ស្ថានការណ៍ឡើងតានតឹងខ្លំាង តំាងពីផ្ទុះវិបត្តិផ្ទៃក្នុងស៊ីរីក្នុងឆ្នំា ២០១១
ទោះបីជាមានកិច្ចព្រមព្រៀងឈប់បាញ់រវាងអ៊ីស្រាអែល និងស៊ីរីក៏ដោយ ក៏ស្ថានការណ៍ទូទៅនៅតំបន់ខ្ពង់រាបហ្គូឡាននៅបន្តតានតឹង ក្តៅងំជានិ្ចច។ តែស្ថានការណ៍បានផ្តើមតឹងតែងខ្លំាងតំាងពីមានផ្ទុះវិបត្តិផ្ទែក្នុងនៅស៊ីរីក្នុងឆ្នំា ២០១១ មក។ គឺវិបត្តិផ្ទៃក្នុងស៊ីរីនេះឯងដែលបាន និងកំពុងជះចំហាយអាក្រក់ខ្លំាងណាស់នៅក្នុងតំបន់ដើមបូព៌ាទំាងមូល ពិសេសទៅលើប្រទេសអ៊ីស្រាអែល។ អ្វីដែលអ៊ីស្រាអែលកំពុងបារម្ភខ្លំាង ប្រយ័ត្នប្រយែង និងតាមដានដោយយកចិត្តទុកដាក់ខ្លំាង មិនមែនត្រឹមតែស្ថានការណ៍វិវត្តន៍នៅក្នុងប្រទេសស៊ីរីនៃជម្លោះរវាងប្រជាជនស៊ីរីទេ តែគឺការលូកដៃចូលនៅក្នុងជម្លោះនេះពីសំណាក់តួអង្គខាងក្រៅ ពិសេសគឺក្រុមយុទ្ធជន Hezbollah លីបង់ និងក្រុមជីហាតប៉ាឡេស្ទីន។
គឺក្រុមទំាងនេះហើយដែលជាសត្រូវស៊ីសាច់ហុតឈាមរបស់អ៊ីស្រាអែល និងដែលអ៊ីស្រាអែលត្រូវតែប្រុងប្រយ័ត្នខ្លំាងជាងគេ។ នៅដើមឆ្នំា ២០១៣ ចលនា Hezbollah បានបញ្ជូនយុទ្ធជនរបស់ខ្លួនចំនួន ៥ ០០០នាក់ទៅជួយប្រយុទ្ធជាមួយកម្លំាងរដ្ឋាភិបាលស៊ីរីរបស់លោកប្រធានាធិបតីអាសាដប្រឆំាងនឹងក្រុមបះបោរ។ តែអ៊ីស្រាអែលបានសម្គាល់ឃើញថា ក្រុមយុទ្ធជន Hezbollah បានឆ្លៀតឱកាសនៅក្នុងស្ថានភាពវឹកវរក្នុងប្រទេសស៊ីរី ដើម្បីឆ្មក់វាយប្រហារអ៊ីសា្រអែលនៅតំបន់ខ្ពង់រាបហ្គូឡាន។ យោងតាមអ៊ីស្រាអែល តំបន់ខ្ពង់រាបហ្គូឡាននៅខាងស៊ីរីចំនួន ៧០% កំពុងស្ថិតក្រោមការកាន់កាប់របស់ពួកឧទ្ទាម។
អ៊ីស្រាអែលព្រមានប្រើគ្រប់មធ្យោបាយដើម្បីការពារសន្តិសុខខ្លួន
នៅទាបភ្លឺព្រឹកថ្ងៃពុធ ទី១៩ មីនានេះ ទាហានអ៊ីស្រាអែលបានបើកប្រតិបត្តិការផ្លូវអាកាសទម្លាក់គ្រាប់បែកលើទឹកដីស៊ីរីម្តុំតំបន់ខ្ពង់រាបហ្គូឡាន ដើម្បីឆ្លើយតបនឹងការផ្ទុះគ្រាប់បែកបណ្តាលឲ្យមានទាហានអ៊ីស្រាអែលរបួសចំនួន ៤នាក់។ វិធានការចាស់ដៃរបស់អ៊ីស្រាអែល គឺជាវិធានការព្រមានមួយដែលអ៊ីស្រាអែលតែងតែអនុវត្តន៍ជារឿយៗនៅក្នុងជម្លោះជាមួយប៉ាឡេស្ទីន។ តែអ្វីដែលគ្រប់គ្នាកំពុងបារម្ភខ្លំាងនៅពេលនេះ គឺខ្លាចតែប្រតិកម្មចាស់ដៃរបស់អ៊ីស្រាអែលនៅស៊ីរីពេលនេះ ជាការផ្តើមអុជបញ្ឆេះសង្រ្គាមរវាងអ៊ីស្រាអែល និងក្រុម Hezbollah ជាលើកទី៣។ គួរជម្រាបជូនថា តំាងពីក្រុម Hezbollah បានបញ្ចូលខ្លួនទៅជួយកងទ័ពស៊ីរីកាលពីដើមឆ្នំា ២០១៣ មក ទាហានអ៊ីស្រាអែលធ្លាប់បានលួចវាយប្រហារផ្លូវអាកាសលើឃ្លំាងស្តុកអាវុធ និងគ្រឿងសព្វាវុធទំនើបៗរបស់ស៊ីរីដើម្បីបញ្ជៀសកុំឲ្យពួក Hezbollah ប្រើអាវុធទំាងនេះវាយប្រហារខ្លួន។
ទន្ទឹមគ្នានេះ អ៊ីស្រាអែលក៏ធ្លាប់បានទម្លាក់គ្រាប់បែកលើមូលដ្ឋានរបស់ Hezbollah ក្នុងទឹកដីលីបង់ និងដែលក្រុម Hezbollah ធ្លាប់បានគំរាមសងសឹកវិញនៅពេលដែលឱកាសហុចឲ្យ។ បើយោងតាមទាហានអ៊ីស្រាអែល ក្រុម Hezbollah មានគ្រាប់មីស៊ីល និងរ៉ូកែតសរុបប្រមាណជា ១០០ ០០០គ្រាប់ និងដែលមានជាច្រើនគ្រាប់អាចបាញ់បានចម្ងាយជាង ២៥០គីឡូម៉ែត្រ។ តែអ៊ីស្រាអែលបានព្រមានរួចហើយថា ចម្លើយរបស់អ៊ីស្រាអែលនឹងមិនកម្រិតត្រឹមផ្លូវអាកាសមួយទេ តែតាមគ្រប់មធ្យាបាយទំាងអស់។ ដូច្នេះ បើសង្រ្គាមនេះអាចនឹងផ្ទុះមែន វាមិនប្រាកដកើតមានត្រឹមតែរវាងអ៊ីស្រាអែល និង Hezbollah ទេ តែអ៊ីស្រាអែលនឹងត្រូវប្រឈមទល់នឹងក្រុមសត្រូវទំាងអស់របស់ខ្លួននៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ