យន្តហោះចម្បាំងអ៊ីស្រាអែលវាយប្រហារលើមូលដ្ឋានទ័ពអាកាសស៊ីរី
អ៊ីស្រាអែលបានបើកការវាយប្រហារតាមផ្លូវអាកាសទៅលើមូលដ្ឋានទ័ពអាកាសស៊ីរី កាលពីរំលងអធ្រាតថ្ងៃពុធ ឈានចូលថ្ងៃព្រហស្បតិ៍ម្សិលមិញ។ នេះបើយោងតាមការផ្សាយរបស់ទូរទស្សន៍អារ៉ាប៊ីសាអ៊ូឌីត និងយោងតាមការអះអាងរបស់មន្រ្តីរដ្ឋាភិបាលអាមេរិក។ អ៊ីស្រាអែលវិញបានបដិសេធមិនធ្វើអត្ថាធិប្បាយណាមួយជុំវិញព័ត៌មាននេះទេ។
ចុះផ្សាយនៅថ្ងៃ៖
ស្តាប់ - ០១:៥៥
ទូរទស្សន៍អាល់អារ៉ាប៊ីយ៉ា (Al-Arabiya) របស់អារ៉ាប៊ីសាអ៊ូឌីត បានផ្សាយឲ្យដឹងថា ទីតាំងយោធា ដែលទទួលរងនូវការវាយប្រហារពីសំណាក់យន្តហោះចម្បាំងអ៊ីស្រាអែល កាលពីរំលងអធ្រាតថ្ងៃពុធ គឺជាមូលដ្ឋានទ័ពអាកាស ស្ថិតនៅក្នុងខេត្ត Latakia (ប៉ែកខាងលិចប្រទេសស៊ីរី ជាប់នឹងឆ្នេរសមុទ្រមេឌីទែរ៉ាណេ)។ ការវាយប្រហារនេះធ្វើឡើងសំដៅកម្ទេចមីស៊ីល ដែលគេគ្រោងនឹងបញ្ជូនទៅឲ្យក្រុម Hezbollah នៅលីបង់។
មន្រ្តីរដ្ឋាភិបាលអាមេរិកម្នាក់ ដែលសុំមិនបញ្ចេញឈ្មោះបានប្រាប់ទីភ្នាក់ងារព័ត៌មានបារាំង AFP ថា ពិតជាមានប្រតិបត្តិការទ័ពអាកាសអ៊ីស្រាអែលទៅលើស៊ីរីពិតមែន។ ក៏ប៉ុន្តែ មន្រ្តីរូបនេះបានបដិសេធមិនបញ្ជាក់អំពីទីតាំង និងគោលដៅនៃប្រតិបត្តិការនេះទេ ដោយគ្រាន់តែបានបង្ហើបថា “តាមទម្លាប់ អ៊ីស្រាអែលតែងតែធ្វើការវាយប្រហារតាមអាកាស ទៅលើគ្រឿងសព្វាវុធ ដែលគេបញ្ជូនទៅឲ្យក្រុម Hezbollah”។ ចលនាស្ហ៊ីអ៊ីតលីបង់ Hezbollah ដែលជាសម្ព័ន្ធមិត្តរបស់លោកបាស្ហា អាល់អាសាដ និងអ៊ីរ៉ង់។
ទីភ្នាក់ងារព័ត៌មានអេភី (Associated Press) វិញ បានដកស្រង់ប្រភពពីមន្រ្តីអាមេរិកដែលសុំមិនបញ្ចេញឈ្មោះដែរ ដែលអះអាងថា គ្រឿងសព្វាវុធដែលជាគោលដៅនៃការវាយប្រហាររបស់អ៊ីស្រាអែល កាលពីរំលងអធ្រាតថ្ងៃពុធ គឺជាមីស៊ីលផលិតនៅរុស្ស៊ី។
គួររំឭកឡើងវិញថា កាលពីខែឧសភាកន្លងទៅ អ៊ីស្រាអែលក៏បានបើកការវាយប្រហារតាមផ្លូវអាកាសនៅក្នុងប្រទេសស៊ីរីម្តងដែរ ហើយមន្រ្តីអ៊ីស្រាអែលបានទទួលស្គាល់ថា គោលដៅនៃការវាយប្រហារនោះ គឺដើម្បីកម្ទេចអាវុធ ដែលអ៊ីរ៉ង់បញ្ជូនទៅឲ្យក្រុម Hezbollah។ នៅពេលនោះ លោកបាស្ហា អាល់អាសាដ បានប្រកាសថានឹងធ្វើការតបតវិញ ប្រសិនបើអ៊ីស្រាអែលហ៊ានបើកការវាយប្រហារណាមួយសាជាថ្មីទៀតលើស៊ីរី។
ជុំវិញរបាយការណ៍អំពីប្រតិបត្តិការទ័ពអាកាសនៅស៊ីរី កាលពីរំលងអធ្រាតថ្ងៃពុធនេះវិញ អ៊ីស្រាអែលបានបដិសេធមិនធ្វើអត្ថាធិប្បាយអ្វីទាំងអស់ ពោលគឺ មិនទទួលស្គាល់ ហើយក៏មិនបដិសេធព័ត៌មាននេះដែរ។
ព័ត៌មានស្តីពីប្រតិបត្តិការទ័ពអាកាសអ៊ីស្រាអែលទៅលើស៊ីរីនេះបានកើតមានឡើង នៅក្នុងពេលដែលប្រេសិតពិសេសរបស់អ.ស.ប និងសម្ព័ន្ធអារ៉ាប់ កំពុងស្ថិតក្នុងប្រទេសស៊ីរី ដើម្បីព្យាយាមជំរុញដំណើរការសន្តិភាព តាមរយៈការរៀបចំសន្និសីទក្រុងហ្សឺណែវលើកទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ