រដ្ឋាភិបាលអនុម័តគម្រោងវិនិយោគសាធារណៈរយៈពេល៣ឆ្នាំត្រូវការថវិកាជាង ៥.០០០លានដុល្លារ
កិច្ចប្រជុំពេញអង្គគណៈរដ្ឋមន្ត្រី កាលពីថ្ងៃសុក្រ ទី៥កញ្ញា បានអនុម័តលើសេចក្តីព្រាងកម្មវិធីវិនិយោគសាធារណៈ ៣ ឆ្នាំ រំកិល ឆ្នាំ២០១៥ ដល់ឆ្នាំ២០១៧។ គម្រោងរយៈពេល ៣ ឆ្នាំនេះ ត្រូវការថវិកា ៥.២៤៣ លានដុល្លារអាមេរិក សម្រាប់ ៥០០ គម្រោង ដែលក្នុងនោះ ធនធាន ៦០ ភាគរយ ត្រូវបន្ត សម្រាប់ការវិនិយោគ នៅតំបន់ជនបទ។
ចុះផ្សាយនៅថ្ងៃ៖
ស្តាប់ - ០១:៥៣
ក្រសួងផែនការ បានសហការជាមួយក្រសួងសេដ្ឋកិច្ច និងហិរញ្ញវត្ថុ ឧត្តមក្រុមប្រឹក្សាសេដ្ឋកិច្ចជាតិ និងគណៈកម្មាធិការនីតិសម្បទា និងអភិវឌ្ឍន៍កម្ពុជា ដើម្បីរៀបចំកម្មវិធីវិនិយោគសាធារណៈ ៣ ឆ្នាំ រំកិល ឆ្នាំ២០១៥ ដល់ឆ្នាំ២០១៧។ គម្រោងរយៈពេល ៣ ឆ្នាំ ដែលគណៈរដ្ឋមន្ត្រី ប្រជុំអនុម័ត កាលពីថ្ងៃសុក្រ ត្រូវការទុនសរុបចំនួន ៥.២៤៣ លានដុល្លារអាមេរិក សម្រាប់គម្រោងចំនួន ៥០០ គម្រោង។ ក្នុងនោះធនធាន ៦០ ភាគរយ ត្រូវបន្តអនុវត្ត សម្រាប់ការវិនិយោគនៅតំបន់ជនបទ។ នេះបើតាមសេចក្តីប្រកាស។
សេចក្តីប្រកាសព័ត៌មានពីលទ្ធផលនៃកិច្ចប្រជុំពេញអង្គគណៈរដ្ឋមន្ត្រី បង្ហាញថា គោលបំណងសំខាន់នៃកម្មវិធីវិនិយោគសាធារណៈ ៣ ឆ្នាំ រំកិល ឆ្នាំ២០១៥ ដល់ឆ្នាំ២០១៧ គឺធ្វើការបង្ហាញពីទិន្នន័យគម្រោងវិនិយោគ ដែលមានអាទិភាពខ្ពស់របស់ក្រសួងស្ថាប័ននៃរាជរដ្ឋាភិបាលកម្ពុជា ដែលជាគោលនយោបាយ មានចែងនៅក្នុងយុទ្ធសាស្ត្រចតុកោណ ដំណាក់កាលទី៣ និងផែនទីចង្អុលផ្លូវ សម្រាប់ការអនុវត្តគោលនយោបាយ ដែលមានចែងក្នុងផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ) ឆ្នាំ២០១៤ ដល់ឆ្នាំ២០១៨។ ផែនការយុទ្ធសាស្ត្រនោះ ត្រូវបានអនុម័ត ដោយស្ថាប័ននីតិប្បញ្ញត្តិ កាលពីថ្ងៃទី២៦ ខែមិថុនា ឆ្នាំ២០១៤។
សេចក្តីប្រកាសដដែល លើកឡើងថា គម្រោងវិនិយោគរបស់រដ្ឋាភិបាល រយៈពេល ៣ ឆ្នាំនោះ ត្រូវបានធ្វើឡើង ដើម្បីធ្វើឲ្យសម្រេចបាននូវកំណើនសេដ្ឋកិច្ច (ផសស) ៦ ដល់ ៧% និងអាទិភាពនានា ដែលគាំទ្រប្រជាជនក្រីក្រ និងជនបទ ដូចជា ការអភិវឌ្ឍកសិកម្ម និងជនបទ តាមរយៈការលើកកម្ពស់ផលិតភាព និងពិពិធកម្មកសិកម្ម ដូចដែលបានកំណត់រួចមកហើយនៅក្នុងយុទ្ធសាស្ត្រចតុកោណដំណាក់កាលទី៣ និងផែនការយុទ្ធសាស្ត្រអភិវឌ្ឍន៍ជាតិ ឆ្នាំ២០១៤ ដល់ឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ