មន្ត្រីរដ្ឋាភិបាលកម្ពុជានឹងជួបតំណាងអគ្គលេខាធិការ អ.ស.ប. ស្តីពីតុលាការខ្មែរក្រហម
មន្ត្រីជាន់ខ្ពស់រដ្ឋាភិបាលកម្ពុជា បានឲ្យដឹងនៅថ្ងៃច័ន្ទនេះថា លោក សុខ អាន រដ្ឋមន្ត្រីទីស្តីការគណៈរដ្ឋមន្ត្រី ទទួលបន្ទុកសាលាក្តីខ្មែរក្រហម នឹងជួបជាមួយតំណាងពិសេសរបស់អគ្គលេខាធិការអង្គការសហប្រជាជាតិ លោក បាន គីមូន ដើម្បីពិភាក្សាលើករណីបញ្ហាមួយចំនួន ទាក់ទងនឹងសាលាក្តីខ្មែរក្រហម។ ក្នុងនោះ ការរៃអង្គាស ប្រមូលថវិកា សម្រាប់ដំណើរការសាលាក្តីខ្មែរក្រហម ជាបញ្ហាអាទិភាព។ ក៏ប៉ុន្តែអង្គការសហប្រជាជាតិ បានប្រកាសថា ការចម្រូងចម្រាស នៃការតែងតាំងសហចៅក្រមស៊ើបអង្កេតអន្តរជាតិ សម្រាប់តុលាការខ្មែរក្រហម ក៏ជាបញ្ហាសំខាន់ នៃកិច្ចពិភាក្សានារសៀលថ្ងៃស្អែកផងដែរ។
ចុះផ្សាយនៅថ្ងៃ៖
ស្តាប់ - ០២:៣៩
លោក David Scheffer អ្នកជំនាញពិសេសរបស់អគ្គលេខាធិការអង្គការសហប្រជាជាតិ ទទួលបន្ទុកផ្នែករៃអង្គាសថវិកា សម្រាប់ជួយដល់ដំណើរតុលាការខ្មែរក្រហម នឹងជួបលោក សុខ អាន រដ្ឋមន្ត្រីទីស្តីការគណៈរដ្ឋមន្ត្រី តំណាងរដ្ឋាភិបាលកម្ពុជា សម្រាប់សាលាក្តីខ្មែរក្រហម នៅម៉ោង ៤ រសៀលថ្ងៃទី២៤ ខែមករា ឆ្នាំ២០១២។ នេះបើតាមការបញ្ជាក់របស់លោក ឯក ថា អ្នកនាំពាក្យអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី។
លោក ឯក ថា បានឲ្យដឹងថា លោក David Scheffer បានកាន់តំណែងជំនួសលោក Client Williamson ក្នុងតួនាទីផ្នែករៃអង្គាសថវិកា សម្រាប់សាលាក្តីខ្មែរក្រហម។ ដូច្នេះកិច្ចប្រជុំនៅរសៀលថ្ងៃស្អែកនេះ នឹងនិយាយតែពីការប្រមូលថវិកា ជួយដល់ដំណើរការកាត់ទោសមេខ្មែរក្រហមប៉ុណ្ណោះ។ សាលាក្តីកូនកាត់ ដែលរួមគ្នាបង្កើតឡើងដោយអង្គការសហប្រជាជាតិ បានដំណើរការចាប់តាំងពីឆ្នាំ២០០៦ ដល់ឆ្នាំ២០១១ បានចំណាយថវិកាសរុបចំនួន ១៤៩,៩ លានដុល្លារ។ ក្នុងនោះ ភាគីកម្ពុជា ចំណាយចំនួន ៣៤ លានដុល្លារ។ តែនៅឆ្នាំ២០១២នេះ តុលាការចម្រុះ ត្រូវប្រឈមនឹងកង្វះថវិកា។
មន្ត្រីជាន់ខ្ពស់រដ្ឋាភិបាល បានបញ្ជាក់ថា ការតែងតាំងសហចៅក្រមស៊ើបអង្កេតអន្តរជាតិ នៅតុលាការខ្មែរក្រហម ដែលកំពុងចម្រូងចម្រាស នឹងមិនមែនជាប្រធានបទ ឬក៏ជារបៀបវារៈ នៃកិច្ចពិភាក្សារវាងលោក សុខ អាន និងតំណាងពិសេសអង្គការសហប្រជាជាតិ នារសៀលថ្ងៃទី២៤មករាឡើយ។
យ៉ាងណាក៏ដោយ តាមគេហទំព័ររបស់អង្គការសហប្រជាជាតិ បានផ្សព្វផ្សាយថា លោក David Scheffer មកភ្នំពេញពេលនេះ ដើម្បីជួបជាមួយមន្ត្រីជាន់ខ្ពស់រដ្ឋាភិបាលកម្ពុជា និងមន្ត្រីសាលាក្តីខ្មែរក្រហម ជុំវិញការតែងតាំងសហចៅក្រមស៊ើបអង្កេតអន្តរជាតិ។ ដំណើរការតែងតាំងចៅក្រមអន្តរជាតិ ដែលមិនត្រូវបានរដ្ឋាភិបាល ប្រកាសជាផ្លូវការ ខណៈដែលឧត្តមក្រុមប្រឹក្សានៃអង្គចៅក្រម បានប្រជុំសម្រេច កាលពីសប្តាហ៍មុន ហើយបញ្ជូនសេចក្តីសម្រេចនោះ ទៅកាន់លោកសុខអាន។
ទាក់ទងនឹងតុលាការខ្មែរក្រហម នៅក្នុងសវនាការលើសំណុំរឿង០០២ នៅថ្ងៃច័ន្ទ ទី២៣មករានេះ ចូលដល់ការសួរដេញដោលលើសាក្សីលោក វ៉ាន់ថាន់ ពៅដារ៉ា នាយករងមជ្ឈមណ្ឌលឯកសារកម្ពុជា ( DCCAM ) អំពីការប្រមូល និងចងក្រងឯកសារ សម័យខ្មែរក្រហម។ ការសួរដេញដោលសាក្សីរូបនេះ បន្ទាប់ពីមានការជំទាស់ដ៏ខ្លាំងក្លាពីភាគីអតីតមេខ្មែរក្រហម លោក នួនជា លោកអៀងសារី និងលោកខៀវសំផន ចំពោះឯកសារភស្តុតាង ដែលត្រូវបានប្រើប្រាស់ ដើម្បីដាក់បន្ទុកលើអតីតមេខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ