ប្រមុខរដ្ឋាភិបាលកម្ពុជាបង្ហាញសុទិដ្ឋិនិយមពីកំណើនសេដ្ឋកិច្ច
លោកនាយករដ្ឋមន្ត្រី ហ៊ុន សែន បានសម្តែងនូវមោទនភាពចំពោះកំណើនសេដ្ឋកិច្ចរបស់ប្រទេស ខណៈដែលនៅគ្រប់កាលៈទេសៈលំបាកនៃសេដ្ឋកិច្ចពិភពលោក។ ចាប់តាំងពីឆ្នាំ២០០៩ ដល់ឆ្នាំ ២០១៣ ប្រទេសកម្ពុជាតែងរក្សាបាននូវកំណើនសេដ្ឋកិច្ចវិជ្ជមាន នៅពេលដែលប្រទេសផ្សេងៗមានកំណើនអវិជ្ជមាន។ ការថ្លែងបែបនេះបានធ្វើឡើងខណៈដែលលោកនាយករដ្ឋមន្ត្រី ចូលរួមជាអធិបតីក្នុងសន្និសីទ វិនិយោគអន្តរជាតិនៅព្រឹកថ្ងៃទី០៦ខែតុលានេះ នៅទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៤
នៅក្នុងសន្និសីទវិនិយោគអន្តរជាតិ IBC ប្រព្រឹត្តិទៅនៅសណ្ឋាគារអាំងទែកុងទីណង់តាល់នៅព្រឹកថ្ងៃចន្ទទី០៦ ខែតុលានេះ លោកនាយករដ្ឋមន្ត្រីហ៊ុន សែន បានថ្លែងថាសេដ្ឋកិច្ចប្រទេសកម្ពុជាចាប់ពីឆ្នាំ២០០៩ ដល់ឆ្នាំ២០១៣ កើនជាមធ្យមប្រមាណ៦,៧ភាគរយ បើទោះណាជាមានការធ្លាក់ចុះនៅឆ្នាំ ២០០៩ ដោយសារតែវិបត្តិហិរញ្ញវត្ថុពិភពលោកក៏ដោយ។
លោកហ៊ុន សែន រំលឹកថានៅឆ្នាំ២០០៩ សេដ្ឋកិច្ចកម្ពុជារក្សាបាននូវកំណើនវិជ្ជមានកម្រិត០,១ ភាគរយ ខណៈប្រទេសមួយចំនួនធំមានកំណើនអវិជ្ជមាន។ តែសេដ្ឋកិច្ចកម្ពុជាបានហក់
ឡើងវិញភ្លាមដោយសម្រេចបាននូវអត្រាកំណើនជាមធ្យម ប្រមាណ៧ភាគរយ ពីឆ្នាំ២០១០ដល់ឆ្នាំ ២០១៣។
អ្វីដែលជាការសម្អាងពីកំណើននោះគឺភាពរឹងមាំសេដ្ឋកិច្ច នៃការនាំចេញលើវិស័យ
វាយនភ័ណ្ឌ ទេសចរ និងសំណង់។ប្រមុខរដ្ឋាភិបាលកម្ពុជាលើកឡើងចំពោះមុខភ្ញៀវជាតិនិងអន្តរជាតិជាច្រើនរយនាក់ថា នៅឆ្នាំ២០១៣ កម្បុជាសម្រេចបានកំណើនសេដ្ឋកិច្ច ៧,៦
ភាគរយ។
សម្រាប់ឆ្នាំ២០១៤នេះ និងក្នុងរយៈពេលមធ្យមទៅមុខកំណើនសេដ្ឋកិច្ចកម្ពុជា ត្រូវបានព្យាករណ៍ថា នឹងកើនលើសពី៧ភាគរយដោយសារការរីកចំរើនលើវិស័យថាមពល និងហេដ្ឋារចនាសម្ព័ន្ធរូបវន្តដទៃទៀត រួមផ្សំនឹងការលើកកំពស់សមត្ថភាពប្រកួតប្រជែង ការកែលម្អ កិច្ចសម្រួលពាណិជ្ជកម្ម និងបរិយាកាសវិនិយោគ, នេះបើតាមការថ្លែងរបស់លោក ហ៊ុន សែន។
ទាក់ទងទៅនឹងបញ្ហាអតិផរណាវិញ លោកនាយករដ្ឋមន្ត្រី ថ្លែងថា កម្ពុជាស្ថិតនៅក្នុងកំរិតទាបប្រមាណជា ៣ទៅ៤ភាគរយ នៅឆ្នាំ២០១៤នេះនៅពេលដែលកំរិតអតិផរណានៅក្នុងតំបន់មានកំណើនខ្ពស់។លើសពីនេះបញ្ហាស្ថេរភាពប្រាក់រៀល ភាពរឹងមាំនៃវិស័យធនាគារ ទុនបំរុងអន្តរជាតិបានកើនឡើង៥,២ភាគរយនៅឆ្នាំ២០១៣ ប្រមាណជា៤៥០០លានដុល្លារ ហើយនៅឆ្នាំ២០១៤នេះ បានកើនលើស ៥ពាន់លានដុល្លាររួចជាស្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ