កញ្ឆា និងការស្រាវជ្រាវរកថ្នាំបំបាត់ញៀន
ចុះផ្សាយនៅថ្ងៃ៖
ស្តាប់ - ០៧:៥៤
ចាប់ពីថ្ងៃទី ០១មករា ២០១៤ នៅរដ្ឋកូឡូរ៉ាដូសហរដ្ឋអាមេរិក កញ្ឆា ក្លាយជារបស់ស្របច្បាប់ មានដាក់លក់ និងរកទិញដោយសេរី។ នេះអាចចាត់ទុកថាលើកទីមួយ នៅសហរដ្ឋអាមេរិក ឬនៅលើពិភពលោក ដែលកញ្ឆាត្រូវទទួលស្គាល់ដោយច្បាប់។ ពេលនេះសម្ពាធសង្គម សម្ពាធសេដ្ឋកិច្ច បានទទួលជោគជ័យមែន នៅរដ្ឋកូឡូរ៉ាដូ ប៉ុន្តែផលវិបាកនៃការជក់កញ្ឆាចំពោះសុខភាព ក៏គ្មាននរណាអាចបដិសេធបានឡើយ បើទោះបីជាពេលខ្លះវេជ្ជសាស្ត្រងាកទៅរំពឹងកញ្ឆា ដើម្បីព្យាបាលជំងឺក៏ដោយក្តី។ ទន្ទឹមនឹងការបំផុសបំផុលអំពីគ្រោះថ្នាក់ ក្រុមអ្នកស្រាវជ្រាវកំពុងរកឃើញជាបណ្តើរៗ ថ្នាំប្រឆាំងភាពញៀនជួយសង្គ្រោះអ្នកចង់ផ្តាច់កញ្ឆា។
ជាការកំសាន្ត បែបផ្សេង ! ចង់មានអារម្មណ៍រំភើប រីករាយ ភ្លើនភ្លើន ចង់សាកល្បងស្វែងសុភមង្គលក្នុងផ្លូវអារម្មណ៍ បន្ធូរភាពតានតឹង និងសាកល្បងស្វែងរកអារម្មណ៍ថ្មីប្លែកៗ ឱ្យកាន់តែអណ្តែតអណ្តូង នេះហើយជាចំណង់ដំបូងដែលជំរុញឱ្យចង់ភ្លក្សកញ្ឆា ភ្លក្សគ្រឿងញៀន ! មួយខ្សឺត ពីខ្សឺតដំបូង ហាក់នាំអារម្មណ៍យើង ឱ្យបានជួបនឹងសេចក្តីសុខ សប្បាយមែន ប៉ុន្តែនៅពេលដែលអារម្មណ៍សប្បាយរីករាយសិប្បនិម្មិតរសាត់ បាត់ទៅ តើមានអ្វីនៅបន្សល់ទុកក្នុងខ្លួនទេ ? មាន នោះគឺភាពញៀន ភាពត្រូវការដែលមិនអាចខ្វះបាន នោះការជក់កញ្ឆា ក្លាយជាកង្វះ ជាតម្រូវការមិនអាចខានបាន។
កញ្ឆាជាប្រភេទគ្រឿងញៀនម្យ៉ាងដែលច្បាប់អន្តរជាតិចាត់ទុកថាជាគ្រឿងញៀនខ្សោយ តាំងពីសតវត្សទី ២០ មក ជាហេតុធ្វើឱ្យគេមិនសូវចាប់អារម្មណ៍ខ្លាំង ពីគ្រោះថ្នាក់នៃការជក់វាទេ។ ការពិតកញ្ឆា ឬ ជាភាសាបារាំង Cannabis Marijuana, joint, Haschich, Hach, ឬ Shit អាចបង្កផលវិបាកយ៉ាងច្រើនណាស់ដល់សុខភាព។ កាន់តែឆាប់ចាបផ្តើម (ក្មេង) កាន់តែគ្រោះថ្នាក់ខ្លាំង។
ពាក្យថាខ្សោយ ព្រោះកញ្ឆា ជាគ្រឿងញៀន ដែលមានប្រតិកម្មយឺត ប៉ុណ្ណោះ ! តែនៅពេលបានចូលជ្រាបដល់ក្នុងសពាង្គកាយមនុស្សណាហើយ មនុស្សនោះត្រូវការ ពេលវេលាយូរណាស់សម្រាប់ បំផ្លាញសារធាតុ THCរបស់កញ្ឆានេះវិញ។
បើតាមលោក សាស្ត្រាចារ្យវេជ្ជបណ្ឌិត Pr. Costentin, បណ្ឌិតឱសថសាស្ត្រ នៅ Rouen ប្រទេសបារាំង៖
"នៅពេលដែលសារធាតុសកម្មរបស់កញ្ឆា បានចូលទៅដល់ខួរក្បាល វានឹងធ្វើការវិវត្តន៍ ឥទ្ធិពលពិសេសរបស់វា បានន័យថា សារធាតុនេះមិនរលាយ ឬ មិនត្រូវបានបំផ្លាញ ចោលទៅវិញទេ តែវាទៅរលាយចូលក្នុងខួរក្បាល ហើយសំងំលាក់ខ្លួននៅទីនោះ រាប់ថ្ងៃ រាប់ អាទិត្យក៏មាន។ កញ្ឆាមិនមែនជាគ្រឿងញៀនខ្សោយធម្មតាទេ តែវាជាគ្រឿងញៀនយឺត។ វាមានសកម្មភាពយឺតៗ មកកកប្រមូលផ្តុំគ្នានៅក្នុងខួរក្បាល ដែលជាហេតុធ្វើឱ្យអ្នកជក់ វ័យកាន់តែក្មេង កាន់តែញៀន ខ្លាំងឡើងៗ កាន់តែត្រូវការឡើងៗ ក្លាយជាតម្រូវការ ដែលមិនអាចខានបាន មិនអាចទប់ជាប់។"
ឥទ្ធិពលដែលបង្កឡើងដោយកញ្ឆាមិនមែនជាគ្រោះថ្នាក់ស្រាលសាមញ្ញធម្មតា ដូចការ ដែលគ្រប់គ្នាបានគិតនោះទេ។ ពេលខ្លះ កញ្ឆាផ្តល់គ្រោះមហន្តរាយយ៉ាងខ្លាំងចំពោះ សុខភាព និងសង្គម។ មិនខុសពីបារីទេ ផ្សែងកញ្ឆាក៏មានបង្កប់ទៅដោយសារធាតុពុលពីធម្មជាតិងាយបង្កជំងឺមហារីក។
តើអ្វីទៅជាកញ្ឆា ? គេអាចសម្គាល់អ្នកជក់កញ្ឆាបានដោយរបៀបណា និងមានគ្រោះថ្នាក់យ៉ាងណា ? សូមស្តាប់ប្រសាសន៍លោកវេជ្ជបណ្ឌិត មាស វរិន្ទ
គ្រោះថ្នាក់ចម្បងនៃកញ្ឆាគឺ ការញៀន ! គ្រប់គ្នាបានដឹង បានឮ តែនៅតែចង់ប្រព្រឹត្តទៀត ! នៅលើពិភពលោកយើងនេះ មានមនុស្សមិនតិចជាង ២០លាននាក់ទេ ដែលញៀន ត្រូវការជក់កញ្ឆា។ ចុះបើគេអាចរកឃើញថ្នាំផ្តាច់ការញៀន ជួយខួរក្បាលកុំឱ្យរងឥទ្ធិពលកញ្ឆាបាន ?!
ការសិក្សាមួយ ដែលទើបបោះផ្សាយក្នុងទស្សនាវដ្តីវិទ្យាសាស្ត្រអាមេរិក ក្រុមអ្នកស្រាវជ្រាវពីក្រុងនៃវិទ្យាស្ថានស្រាវជ្រាវក្រុងប័រដូ ប្រទេសបារាំង កំពុងពិសោធន៍ដាក់ឱ្យដំនើរការ ម៉ូលេគុល មួយ មានសមត្ថភាពអាចទប់ស្កាត់ការញៀនវក់វី។ ការសិក្សានេះនឹងអាចត្រូវដាក់ធ្វើចរាចរណ៍គ្លីនិកនៅឆ្នាំ២០១៥។
របកគំហើញថ្មីនេះ នឹងធ្វើឱ្យការជក់កញ្ឆា សាប គ្មានរសជាតិ ដូច្នេះគ្មានប្រយោជន៍អ្វីនឹងត្រូវជក់ឡើយ។ អ្នកស្រាវជ្រាវ បានផ្តោតលើសកម្មភាពរបស់សារធាតុអ័រមូនម្យ៉ាងហៅថា prégnénolone ដែលខួរក្បាលជាអ្នកផលិតឡើង។ អ័រមូននេះមិនអាចបង្ក្រាបឥទ្ធិពលទាំងអស់របស់កញ្ឆា តែយ៉ាងហោចណាស់អាចបញ្ចេញប្រតិកម្មលើផលប៉ះពាល់ដ៏សំខាន់មួយ គឺចំណង់ ដែលបង្កើតភាពញៀន « ការញៀនដែលធ្វើឱ្យខូចការចងចាំ លែងឃ្លាន និងដែលធ្វើឱ្យមនុស្សចេះតែខ្លិល »។ នេះបើតាមការពន្យល់បំភ្លឺរបស់លោកនាយកស្រាវជ្រាវ Pier Vincenzo Piazza។
សម្រាប់អ្នកវិទ្យាសាស្ត្រ កម្មវត្ថុ ថ្ងៃអនាគត គឺផលិតជាគ្រាប់ថ្នាំ។ ហើយអាចចេញវេជ្ជបញ្ជាឱ្យដល់ជនគ្រប់រូប ដែលចង់ផ្តាច់ខ្លួនពីកញ្ឆា។ កញ្ឆា ដែលត្រូវបានគេចាត់ទុកថាជាវត្ថុតម្រូវការបន្ថែមទីពីរបន្ទាប់ពីសុរា។ ការសិក្សាគ្លីនិក នឹងអាចចាប់ផ្តើមនៅរវាង មួយឆ្នាំកន្លះទៀត។ ប៉ុន្តែគោលការណ៍ស្រាវជ្រាវនេះ មិនអាចជួយអ្នកញៀនគ្រឿងញៀនខ្លាំងៗដូចជាកូកាអ៊ីន ឬហេរ៉ូអ៊ីនទេ។
សម្រាប់ពេលនេះ ការស្រាវជ្រាវបានចូលដល់ដំណាក់កាលធ្វើតេស្តសាកល្បងលើសត្វកណ្តុរ។ គេបានចាក់បញ្ចូលជាតិកញ្ឆាក្នុងសត្វនេះ ក្នុងកំរិតច្រើនជាងអ្នកជក់កញ្ឆាជាប្រចាំ ពីបីទៅ១០ដង ទៅទៀត ដើម្បីសាកល្បងមើលប្រសិទ្ធិភាពរបស់អ័រមូន prégnénolone។ ការបង្កើនសារធាតុអ័រម៉ូន prégnénolone ទៅឱ្យខួរក្បាល បានបង្ហាញអ្នកស្រាវជ្រាវមើលឃើញ ការបិទខ្ទប់ឥទ្ធិពលអាក្រក់នៃសារធាតុសកម្មរបស់កញ្ឆា មិនឱ្យសាយភាយបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ