លោកហោ ណាំហុង ពន្យល់ពីសាលដីកាតុលាការក្រុងឡាអេដល់ទាហាននៅព្រះវិហារ
លោក ហោ ណាំហុង រដ្ឋមន្ត្រីការបរទេសបានជួបជាមួយយោធាការពារព្រំដែនព្រះវិហារនៅព្រឹកថ្ងៃសៅរ៍នេះដើម្បីពន្យល់អំពីខ្លឹមសារនៃសាលដីការបស់តុលាការក្រុងឡាអេដែលបានសម្រេចកាលពីថ្ងៃទី ១១វិច្ឆិកា។ នេះជាជំនួបលើកដំបូងរបស់ប្រមុខការទូតខ្មែរជាមួយកងទ័ពនៅតំបន់ព្រះវិហារ បន្ទាប់ពីតុលាការយុត្តិធម៌អន្តរជាតិក្រុងឡាអេបានចេញសាលដីកាបកស្រាយអំពីវិសាលភាពនៃដែនដីខ្មែរនៅជុំវិញប្រាសាទព្រះវិហារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ជិតមួយខែ ក្រោយពីការប្រកាសសាលដីការបស់តុលាការយុត្តិធម៌អន្តរជាតិក្រុងឡាអេ លោកហោ ណាំហុង បានចុះទៅខេត្តព្រះវិហារដើម្បីនៅព្រឹកថ្ងៃសៅរ៍ទី ០៧ ធ្នូនេះដើម្បីជួបជាមួយកងទ័ពដែលឈរជើងនៅតំបន់ព្រះវិហារ។ គោលបំណងនៃជំនួបនេះគឺដើម្បីពន្យល់កងទ័ពឲ្យបានយល់ច្បាស់អំពីខ្លឹមសារនៃសាលដីកាតុលាការក្រុងឡាអេកាលពីថ្ងៃទី ១១វិច្ឆិកា ថាតើតំបន់ណាខ្លះដែលតុលាការសម្រេចថាជារបស់កម្ពុជា និងចំណុចខ្លះទៀតដែលមិនទាន់ច្បាស់លាស់។ នៅចំពោះមុខនាយទាហាន និងពលទាហានជាង ១០០០ នាក់ ដែលបានជួបជុំគ្នានៅឯទីបញ្ជាការដ្ឋានកងអង្គរក្ស នៅចម្ងាយជិត ២០ គីឡូម៉ែត្រពីប្រាសាទព្រះវិហារ លោក ហោ ណាំហុង បានអះអាងថា តំបន់ភ្នំទ្រព្យក៏ជាទឹកដីកម្ពុជាដែរ។
ទាក់ទងនឹងការអនុវត្តន៍សាលដីកានេះ លោក ហោ ណាំហុង បានបញ្ជាក់ថា ភាគីកម្ពុជាបានត្រៀមខ្លួនជាស្រេចដើម្បីចរចាជាមួយថៃស្តីពីការដកទ័ពរបស់ខ្លួនចេញពីទឹកដីកម្ពុជា។ ប៉ុន្តែ គេត្រូវរង់ចាំឲ្យប្រទេសថៃចាកចេញពីវិបត្តិនយោបាយរបស់ខ្លួនសិន។ លោកប្រមុខការទូតក៏បានកោតសរសើរដល់វីរភាពរបស់កងទ័ពដែលបានឈរជើងយ៉ាងរឹងមាំក្នុងការការពារទឹកដី។
គួរបញ្ជាក់ថា តុលាការយុត្តិធម៌អន្តរជាតិក្រុងឡាអេបានសម្រេចកាលពីថ្ងៃទី ១១ វិច្ឆិកាដោយបកស្រាយថា ដែនដីជុំវិញប្រាសាទព្រះវិហារជារបស់កម្ពុជា។ តុលាការនេះក៏បានទាត់ចោលផែនទីឯកតោភាគីរបស់ថៃ ដែលបង្កើតឲ្យមានដែនដី ៤,៦ គីឡូម៉ែត្រក្រឡានៅជុំវិញប្រាសាទព្រះវិហារ។ តាមរយៈសាលដីកានេះ ថៃត្រូវដកទ័ពចេញពីដែនដីជុំវិញប្រាសាទព្រះវិហារ។
ប៉ុន្តែ ដោយសារបញ្ហានយោបាយផ្ទៃក្នុងនៅប្រទេសថៃ ការចរចាគ្នាដើម្បីដកទ័ពត្រូវបានផ្អាក។ គេមិនដឹងថា ពេលណាទើបថៃអាចដោះស្រាយបញ្ហាផ្ទៃក្នុងរបស់ខ្លួនបាននៅឡើយទេ។ ម្យ៉ាងទៀត គណបក្សប្រឆាំងថៃបានប្រកាសរួចជាស្រេចថាខ្លួនមិនទទួលស្គាល់សាលដីការបស់តុលាការអន្តរជាតិនេះទេ។
ទោះជាយ៉ាងណា រដ្ឋាភិបាលកម្ពុជាបានពន្យល់អំពីខ្លឹមសារនៃសាលដីកានេះដល់កងទ័ពនៅសមរភូមិមុខ។ កាលពីពេលថ្មីៗនេះ លោកឧបនាយករដ្ឋមន្ត្រី សុខ អាន រដ្ឋមន្ត្រីទីស្តីការគណៈរដ្ឋមន្ត្រីក៏បានជួបជាមួយមន្ត្រីរាជការ និងមន្ត្រីនគរបាលជាច្រើនដើម្បីពន្យល់អំពីខ្លឹមសារនៃសាលដីកាតុលាការក្រុងឡាអេផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ