រដ្ឋាភិបាល បើកកិច្ចប្រជុំទូលាយ ដើម្បីត្រួតពិនិត្យនយោបាយកំណែទម្រង់របស់ខ្លួន
ដូចការគ្រោងទុក លោកនាយករដ្ឋមន្ត្រី ហ៊ុន សែន បានដឹកនាំកិច្ចប្រជុំបើកទូលាយមួយនៅព្រឹកថ្ងៃពុធនេះ ដើម្បីត្រួតពិនិត្យមើលឡើងវិញនូវគោលនយោបាយកំណែទម្រង់របស់ខ្លួន។ កិច្ចប្រជុំនេះធ្វើឡើងនៅវិមានសន្តិភាពទីស្តីការគណៈរដ្ឋមន្ត្រីដោយមានការចូលរួមយ៉ាងទូលំទូលាយ ពីន្ត្រីរដ្ឋាភិបាល និងមន្ត្រីពាក់ព័ន្ធ។ រដ្ឋាភិបាល ក៏ទើបតែបានបង្កើតក្រុមការងារចុះពង្រឹងការកែទម្រង់ ដល់មូលដ្ឋានផងដែរ ក្នុងន័យផ្តល់ភាពកក់ក្តៅជូនពលរដ្ឋម្ចាស់ឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
បួនខែក្រោយពីបើកប្រជុំគណៈរដ្ឋមន្ត្រីលើកដំបូង រដ្ឋាភិបាលអាណត្តិទី៥របស់លោកនាយករដ្ឋមន្ត្រី ហ៊ុន សែន បានផ្តើមពិនិត្យមើលឡើងវិញអំពីគោលនយោបាយកំណែទម្រង់ស៊ីជម្រៅរបស់ខ្លួន។ ការពិនិត្យមើលកំណែទម្រង់នេះបានធ្វើឡើងតាមរយៈកិច្ចប្រជុំបើកទូលាយមួយនៅព្រឹកថ្ងៃពុធនេះនៅទីស្តីការគណៈរដ្ឋមន្ត្រីក្រោមវត្តមានរបស់លោកនាយករដ្ឋមន្ត្រី ហ៊ុន សែន។
កិច្ចប្រជុំពិសេសថ្ងៃនេះក៏មានការចូលរួមយ៉ាងទូលំទូលាយពីសំណាក់មន្ត្រីរដ្ឋាភិបាល និងមន្ត្រីពាក់ព័ន្ធជាច្រើន។ កិច្ចប្រជុំនេះក៏បានបើកធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន ទើបតែបានចុះហត្ថលេខាកាលពីថ្ងៃទី ២៧ មករា លើសេចក្តីសម្រេចមួយដើម្បីបង្កើតក្រុមការងារចម្រុះចុះមូលដ្ឋានដើម្បីត្រួតពិនិត្យកំណែទម្រង់នានារបស់រដ្ឋាភិបាល។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រីបានប្រាប់វិទ្យុបារាំងអន្តរជាតិក្រោយកិច្ចប្រជុំនោះថា កំណែទម្រង់ដែលរដ្ឋាភិបាលដាក់ចេញនៅពេលនេះមានគោលដៅសំខាន់៣៖ ទី១ គឺការរៀបចំឲ្យមានក្រុមការងារចុះអនុវត្តន៍ដល់មូលដ្ឋាន។ ទី២ គឺការរៀបចំវេទិកាសាធារណៈដើម្បីស្តាប់មតិរបស់ម្ចាស់ឆ្នោត និងទី៣ គឺការបម្រើសេវាកម្មសាធារណៈដល់ប្រជាពលរដ្ឋប្រកបដោយគណនេយ្យភាព។
បើយោងតាមលោកផៃ ស៊ីផាន ក្រុមការងារចម្រុះដែលបង្កើតឡើងដោយរដ្ឋាភិបាលនឹងត្រូវចុះដល់មូលដ្ឋានដើម្បីបំពេញការងាររបស់ខ្លួនចាប់ពីពាក់កណ្តាលខែកុម្ភៈនេះតទៅដើម្បីផ្តល់ភាពកក់ក្តៅដល់ប្រជាពលរដ្ឋម្ចាស់ឆ្នោត។
គួររម្លឹកថា ក្នុងកិច្ចប្រជុំគណៈរដ្ឋមន្ត្រីដំបូងកាលពីថ្ងៃទី ២៥ កញ្ញា ឆ្នាំ ២០១៣ លោកនាយករដ្ឋមន្ត្រី ហ៊ុន សែន បានទទួលស្គាល់ចំណុចខ្វះខាតជាច្រើនរបស់មន្ត្រីរដ្ឋាភិបាលនិងអាជ្ញាធរ ដែលជាហេតុធ្វើឲ្យគណបក្សកាន់អំណាចធ្លាក់ចុះប្រជាប្រិយភាពយ៉ាងគំហុកក្នុងការបោះឆ្នោតសភាអាណត្តិទី៥។ លោកនាយករដ្ឋមន្ត្រីបានព្រមានមន្ត្រីរបស់ខ្លួនឲ្យឆ្លុះកញ្ចក់ដុះក្អែលឲ្យបានស្អាតដោយខ្លួនឯង បើមិនដូច្នោះទេ រដ្ឋាភិបាលនឹងប្រើវិធានការក្តៅ។
យ៉ាងណាក៏ដោយ ក្រុមអ្នកតាមដានស្ថានការណ៍នយោបាយកម្ពុជាជាច្រើននៅមិនទាន់មានជំនឿលើកំណែទម្រង់របស់រដ្ឋាភិបាលដឹកនាំដោយគណបក្សប្រជាជនកម្ពុជានៅឡើយទេពីព្រោះពាក្យកំណែទម្រង់មិនមែនថ្មីថ្មោងទេសម្រាប់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ