ប្រមុខរដ្ឋាភិបាលកម្ពុជាលើកទឹកចិត្តកងទ័ពសមរភូមិមុខ
ក្នុងខណៈពេលរង់ចាំដំណោះស្រាយព្រំដែនជាមួយរដ្ឋាភិបាលថ្មីរបស់ថៃ ប្រមុខរដ្ឋាភិបាលខ្មែរបានលើកទឹកចិត្តកងទ័ពសមរភូមិមុខទាំងអស់ ជាពិសេស ជនពិការក្នុងការប្រយុទ្ធគ្នាជាមួយទាហានថៃនៅព្រំដែនព្រះវិហារ ចន្លោះពីឆ្នាំ២០០៨ ដល់២០១១ ឲ្យមានមោទនភាពក្នុងបុព្វហេតុការពារទឹកដី។ ការលើកទឹកចិត្តបែបនេះបានធ្វើឡើងក្នុងពិធីសម្ពោធមជ្ឈមណ្ឌលអភិវឌ្ឍន៍យោធិនពិការ ក្នុងខេត្តសៀមរាប នៅព្រឹកថ្ងៃអាទិត្យនេះ។ លោកនាយករដ្ឋមន្ត្រីសង្ឃឹមថា រដ្ឋាភិបាលថ្មីរបស់ថៃនឹងមិនលើកទឹកចិត្តទាហានរបស់ខ្លួនឲ្យប្រយុទ្ធជាមួយកម្ពុជាទៀតទេ។
ចុះផ្សាយនៅថ្ងៃ៖
ស្តាប់ - ០២:១៦
លោកនាយករដ្ឋមន្ត្រីហ៊ុន សែន បានស្នើនៅថ្ងៃនេះឲ្យជ្រើសរើសគ្រួសារយោធិន ដែលធ្លាក់ខ្លួនពិការ ដោយសារការប្រយុទ្ធនៅសមរភូមិជាយដែនជាមួយថៃ តាំងពីឆ្នាំ២០០៨ ដល់ឆ្នាំ២០១១ ឲ្យទៅរស់នៅមជ្ឈមណ្ឌលអភិវឌ្ឍន៍ក្នុងខេត្តសៀមរាប។ មជ្ឈមណ្ឌលអភិវឌ្ឍន៍នេះត្រូវបានគេរៀបចំឡើង សម្រាប់យោធិនពិការ។ លោកនាយករដ្ឋមន្ត្រីអះអាងថា គ្រួសារជនពិការទាំងនោះគួរតែមានមោទនភាពចំពោះការបូជាសាច់ស្រស់ឈាមស្រស់ ដើម្បីបុព្វហេតុជាតិ។
កាលពីព្រលប់ថ្ងៃទី២៩កក្កដា ក្នុងពិធីជួបជុំជាមួយនាយទាហាននៅក្នុងក្រុងខេត្តសៀមរាបដែរ លោកនាយករដ្ឋមន្ត្រី ហ៊ុន សែន បានអំពាវនាវឲ្យកងទ័ពទាំងអស់ ដែលកំពុងឈរជើងនៅសមរភូមិប្រាសាទព្រះវិហារ ត្រូវបន្តយកចិត្តទុកដាក់ដល់ការការពារបូរណភាពទឹកដី។
ប្រមុខរដ្ឋាភិបាលកម្ពុជាសង្ឃឹមថា រដ្ឋាភិបាលថ្មីរបស់ថៃដែលនឹងកើតឡើងនៅពេលឆាប់ៗនេះនឹងមិនលើកទឹកចិត្តឱ្យទាហានរបស់ខ្លួនប្រយុទ្ធជាមួយកម្ពុជាដូចរដ្ឋាភិបាលចាស់នោះឡើយ។ ម្យ៉ាងទៀត បញ្ហាព្រំដែនកម្ពុជាថៃពេលនេះបានឈានដល់បរិបទថ្មីហើយ ពោលគឺបញ្ហានេះស្ថិតក្នុងរបៀបវារៈ នៃក្រុមប្រឹក្សាសន្តិសុខអង្គការសហប្រជាជាតិ ក្នុងរបៀបវារៈនៃតុលាការអន្តរជាតិទីក្រុងឡាអេ និងក្នុងរបៀបវារៈនៃសមាគមអាស៊ាន។
យ៉ាងណាក៏ដោយ ព័ត៌មានពីសមរភូមិមុខឲ្យដឹងថា ទាហានថៃបានបន្ថែមបន្លាលួសជាច្រើនទៀតទៅលើបន្លាលួសចាស់ដែលខ្លួនបានដាក់ដើម្បីបិទច្រកចេញចូលមកប្រាសាទព្រះវិហារពីខាងទឹកដីថៃ។ បន្លាលួសថ្មីត្រូវបានបន្ថែម នៅខណៈពេលដែលភាគីទាំងពីរកំពុងត្រៀមដកកងទ័ពចេញពីតំបន់គ្មានកងទ័ព ដែលកំណត់ដោយតុលាការយុត្តិធម៌អន្តរជាតិក្រុងឡាអេ។
កាលពីថ្ងៃទី១៨កក្កដា តុលាការក្រុងឡាអេបានចេញសេចក្តីសម្រេចឲ្យភាគីកម្ពុជានិងថៃដកទ័ពចេញពីតំបន់ព្រះវិហារ។ ក៏ប៉ុន្តែរដ្ឋាភិបាលចាញ់ឆ្នោតរបស់នាយករដ្ឋមន្ត្រីអាភីស៊ីតមិនព្រមអនុវត្តតាមសេចក្តីសម្រេចនេះទេ ដោយទុកឲ្យរដ្ឋាភិបាលថ្មីរបស់គណបក្សភឿថៃជាអ្នកដោះស្រាយវិញ។ យ៉ាងណាក៏ដោយ លោកនាយករដ្ឋមន្ត្រី ហ៊ុន សែន បានបញ្ជាក់ជំហរថា កម្ពុជានៅតែប្រកាន់វិធានការ៤យ៉ាង សម្រាប់ដោះស្រាយបញ្ហាព្រំដែន គឺវិធានការ នយោបាយ ការទូត ផ្លូវច្បាប់ និងចុងក្រោយ គឺវិធានការយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ