លោកអាប់ភីស៊ីតទុកសំណុំរឿងដកកងទ័ពអោយរដ្ឋាភិបាលថ្មី
រដ្ឋាភិបាលថៃរបស់លោកអាប់ភីស៊ីតវេចាជីវ៉ាបានឆ្លើយតបមករដ្ឋាភិបាលភ្នំពេញហើយ ថាគេនឹងទុកការងារអនុវត្តសាលក្រមតុលាការឡាអេអោយរដ្ឋាភិបាលថ្មី។ កម្ពុជាក៏បានជូនដំណឹងនេះទៅរដ្ឋមន្ត្រីការបរទេសឥណ្ឌូនេស៊ី ដែលមានបំណងចង់កោះប្រជុំរដ្ឋមន្ត្រីការបទេសកម្ពុជានិងថៃដើម្បីជជែកអំពីការអនុវត្តសាលក្រមឡាអេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
ប្រធានអាស៊ានរដ្ឋមន្ត្រីការបរទេសឥណ្ឌូនេស៊ីបានទាក់ទងមកលោកហោ ណាំហុងប្រមុខការទូតកម្ពុជាកាលពីល្ងាចថ្ងៃទី២៨កក្កដា ដើម្បីបង្ហាញបំណងចង់កោះប្រជុំរដ្ឋមន្ត្រីការបរទេសកម្ពុជានិងថៃ។ កោះប្រជុំដើម្បីជជែកអំពីការអនុវត្តបញ្ជារបស់តុលាការឡាអេស្តីពីការដកកងទ័ពចេញពីតំបន់ប្រាសាទព្រះវិហារ។
ក៏ប៉ុន្តែនៅក្នុងការទាក់ទងគ្នានោះ លោកឧបនាយករដ្ឋមន្ត្រីហោ ណាំហុងបានប្រាប់ទៅប្រធានអាស៊ានលោក ម៉ារទី ណាតាឡេហ្កាវ៉ា អោយដឹងថា ភាគីថៃសព្វថ្ងៃបានឆ្លើយតបមកកម្ពុជាហើយ ឆ្លើយថាគេទុកការងារសាលក្រមឡាអេនេះអោយរដ្ឋាភិបាលថ្មីជាអ្នកអនុវត្តតែម្តង។
តាមពិត បើតាមការបញ្ជាក់របស់អ្នកនាំពាក្យក្រសួងការបរទេសកម្ពុជា កម្ពុជាបានទទួលការឆ្លើយតបពីរដ្ឋាភិបាលថៃ ចំពោះសេចក្តីព្រាងនៃកិច្ចព្រមព្រៀងទីមួយស្តីពីការអនុវត្តសាលក្រមតុលាការឡាអេដែលកម្ពុជាបានផ្ញើទៅកាលពីថ្ងៃទី២១កក្កដា មុនការបង្ហាញរបស់លោកនាយករដ្ឋមន្ត្រីហ៊ុន សែននៅក្នុងសន្និសីទកាសែត។
នៅក្នុងកំណត់ទូតដែលកម្ពុជាទទួលបាន កាលពីល្ងាចថ្ងៃទី២៧កក្កដា រដ្ឋាភិបាលថៃរបស់លោកអាប់ភីស៊ីតបានឆ្លើយប្រាប់រដ្ឋាភិបាលកម្ពុជាថា គេទុកការងារអនុវត្តសាលក្រមតុលាការយុត្តិធម៌អន្តរជាតិអោយរដ្ឋាភិបាលថ្មី។
រដ្ឋសភាថៃនឹងជួបប្រជុំនៅដើមសប្តាហ៍ក្រោយនេះ ដើម្បីផ្តើមនីតិវិធីបង្កើតរដ្ឋាភិបាលតែម្តង។ រដ្ឋាភិបាលដែលនឹងដឹកនាំដោយលោកស្រី យីងឡាក់ ស៊ីណាវ៉ាត្រា ប្អូនស្រីរបស់អតីតនាយករដ្ឋមន្ត្រីដ៏មានប្រជាប្រិយភាព ថាក់ស៊ីន ស៊ីណាវ៉ាត្រា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ