តំបន់គ្មានកងទ័ពនៅព្រះវិហារ៖ តើខាងណាត្រូវធ្វើអ្វីមុន ដើម្បីចាប់ផ្តើមដកកងទ័ព?
ថ្វីដ្បិតតែកម្ពុជា និងថៃ សុទ្ធតែបានប្រកាសទទួលយកដីការបស់តុលាការអន្តរជាតិក្រុងឡាអេ ក៏ប៉ុន្តែ ភាគីទាំងពីរនៅមិនទាន់យល់ស្របគ្នានៅឡើយទេ អំពីលក្ខខណ្ឌនៃការអនុវត្តសេចក្តីសម្រេចនេះ។ ថៃទាមទារឲ្យមានការចរចាជាមួយកម្ពុជាជាមុន។ កម្ពុជាទាមទារឲ្យមានអ្នកសង្កេតការណ៍មកព្រំដែនជាមុន។ តើខាងណាគួរធ្វើអ្វីមុន ដើម្បីចាប់ផ្តើមដកកងទ័ពបាន?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ការបង្កើតតំបន់គ្មានកងទ័ព ទំនងជាមធ្យោបាយល្អមួយ ដែលអាចបញ្ចៀសការប៉ះទង្គិចដោយប្រដាប់អាវុធរវាងកម្ពុជា និងថៃ។ ក៏ប៉ុន្តែ ការអនុវត្តនៅលើដីជាក់ស្តែង គឺជារឿងស្មុគស្មាញ។
ការណ៍ដែលថៃទាមទារជួបចរចាជាមួយកម្ពុជា មុននឹងដកកងទ័ព មិនមែនជារឿងមិនសមហេតុផលនោះទេ ប្រសិនបើការចរចានោះ ធ្វើឡើងតែទៅលើលក្ខខណ្ឌនៃការដកទ័ព ហើយមិនមែនជាលេសដើម្បីពន្យារពេល។ តើតំបន់គ្មានកងទ័ពមានទីតាំងនៅត្រង់ណាពិតប្រាកដ លើដីជាក់ស្តែង? តើភាគីទាំងពីរនឹងចាប់ផ្តើមដកកងទ័ពនៅថ្ងៃណា? ទាំងនេះសុទ្ធសឹងជាចំណុចដែលភាគីទាំងពីរអាចជជែកគ្នាបាន។
ការណ៍ដែលកម្ពុជាទាមទារឲ្យមានអ្នកសង្កេតការណ៍មកដល់ព្រំដែនជាមុន ទើបចាប់ផ្តើមដកកងទ័ព ក៏ជារឿងសមហេតុផលមួយដែរ ពីព្រោះអ្នកសង្កេតការណ៍ឯករាជនេះ អាចនឹងជួយធ្វើជាសាក្សីថា ភាគីទាំងពីរពិតជាដកទ័ពទាំងអស់ចេញពីតំបន់គ្មានកងទ័ពមែន។
ក្នុងករណីនេះ សំណួរអាចនឹងចោទឡើងថា តើត្រូវជួបចរចាគ្នាមុន ទើបឲ្យអ្នកសង្កេតការណ៍មកព្រំដែន ឬត្រូវរង់ចាំអ្នកសង្កេតការណ៍មកដល់ព្រំដែនជាមុន ទើបចាប់ផ្តើមជួបចរចាគ្នា?
ដំណោះស្រាយជាកញ្ចប់ ដែលបានស្នើឡើងដោយរដ្ឋមន្រ្តីការបរទេសឥណ្ឌូណេស៊ី ក្នុងកិច្ចប្រជុំត្រីភាគីកម្ពុជា-ថៃ-ឥណ្ឌូណេស៊ី នៅទីក្រុងហ្សាការតា កាលពីថ្ងៃទី៩ ឧសភា ២០១១ អាចជាយន្តការដ៏ល្អមួយ ដែលភាគីទាំងពីរគួរតែអាចទទួលយកបាន ក្នុងការអនុវត្តដីការបស់តុលាការក្រុងឡាអេ។ ប្រសិនបើគេប្រើដំណោះស្រាយជាកញ្ចប់នេះ ការបញ្ជូនអ្នកសង្កេតការណ៍ព្រំដែន និងការចរចា អាច ធ្វើឡើងនៅក្នុងពេលដំណាលគ្នា។ នៅពេលដែលភាគីទាំងពីរព្រមព្រៀងគ្នា ហើយចាប់ផ្តើមដកកងទ័ព អ្នកសង្កេតការណ៍ក៏ត្រូវបានដាក់ពង្រាយរួចជាស្រេច នៅក្នុងតំបន់គ្មានកងទ័ព ដើម្បីត្រួតពិនិត្យការដកកងទ័ពនេះ។
ដើម្បីអនុវត្តដំណោះស្រាយនេះ ចំណុចចាប់ផ្តើម គឺរដ្ឋាភិបាលកម្ពុជា និងថៃ ត្រូវចុះហត្ថលេខាលើកិច្ចព្រមព្រៀងទទួលយកយន្តការនេះជាមុនសិន។ កន្លងមក កម្ពុជាធ្លាប់បានប្រកាសរួចហើយថា ខ្លួនរង់ចាំតែរដ្ឋាភិបាលថៃប៉ុណ្ណោះ ក្នុងការចុះហត្ថលេខាទទួលយកដំណោះស្រាយជាកញ្ចប់នេះ។ ដូច្នេះ ឧបសគ្គស្ថិតនៅខាងភាគីថៃ។ បញ្ហាដែលចោទ គឺនៅពេលនេះ ថៃមិនទាន់មានរដ្ឋាភិបាលពិតប្រាកដនៅឡើយ។ រដ្ឋាភិបាលរបស់លោកអាភិស៊ីតគ្រាន់តែជារដ្ឋាភិបាលចាំផ្ទះប៉ុណ្ណោះ។ ចំណែក គណបក្សភឿថៃដែលឈ្នះឆ្នោត ក៏នៅមិនទាន់អាចបង្កើតរដ្ឋាភិបាលបាននៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ