នាយិកា IMF ត្រូវតុលាការបារាំងកាត់ឲ្យជាប់ពិរុទ្ធពីបទ “ធ្វេសប្រហែស”
លោកស្រី គ្រីស្ទីន ឡាហ្កាដ នាយិកាមូលនិធិរូបិយវត្ថុអន្តរជាតិ (IMF) ត្រូវបានតុលាការបារាំង កាត់ឲ្យជាប់ពិរុទ្ធពីបទ “ធ្វេសប្រហែស” នៅក្នុងពេលដែលលោកស្រីកាន់តំណែងជារដ្ឋមន្រ្តីក្រសួងហិរញ្ញវត្ថុបារាំង ក្នុងចន្លោះពីឆ្នាំ២០០៧ ដល់ឆ្នាំ២០១១។ ភ្លាមៗក្រោយសេចក្តីសម្រេចរបស់តុលាការ ក្រុមប្រឹក្សាភិបាល IMF បានប្រកាសថានឹងបើកកិច្ចប្រជុំឆាប់ៗ ដើម្បីជជែកពីជោគវាសនារបស់លោកស្រីឡាហ្កាដ។
ចុះផ្សាយនៅថ្ងៃ៖
ជាប់ពិរុទ្ធ តែមិនជាប់ទោស។ នេះគឺជាខ្លឹមសារ ដែលគេអាចសង្ខេបបាន ពីសេចក្តីសម្រេចរបស់តុលាការយុត្តិធម៌បារាំង ចេញនៅល្ងាចថ្ងៃចន្ទនេះ។
គួររំឭកឡើងវិញថា លោកស្រីគ្រីស្ទីន ឡាហ្កាដ ត្រូវជាប់ក្តីក្តាំនៅតុលាការ ពាក់ព័ន្ធនឹងការដោះស្រាយវិវាទ រវាងរដ្ឋាភិបាល និងអតីតម្ចាស់ក្រុមហ៊ុន Adidas។ ក្នុងឋានៈជារដ្ឋមន្រ្តីក្រសួងហិរញ្ញវត្ថុ លោកស្រីឡាហ្កាដ បានអនុញ្ញាតឲ្យយកវិវាទនេះទៅដោះស្រាយដោយក្រុមប្រឹក្សាអាជ្ញាកណ្តាលឯកជន ក៏ប៉ុន្តែ ក្រោយមក គេរកឃើញថា ដំណោះស្រាយដោយអាជ្ញាកណ្តាលឯកជននេះត្រូវបានធ្វើឡើងដោយមិនត្រឹមត្រូវ ហើយបណ្តាលឲ្យរដ្ឋត្រូវខាតបង់លុយរាប់លានអឺរ៉ូ។
នៅក្នុងសេចក្តីសម្រេចនៅថ្ងៃចន្ទ តុលាការយុត្តិធម៌ ដែលនៅក្នុងក្រុមប្រឹក្សាជំនុំជម្រះមាន ចៅក្រមអាជីព ៣រូប សមាជិករដ្ឋសភា ៦រូប និងសមាជិកព្រឹទ្ធសភា ៦រូប បានទទួលស្គាល់ថា លោកស្រីគ្រីស្ទីន ឡាហ្កាដ ពិតជាមិនបានធ្វើកំហុសអ្វីមែន នៅក្នុងការប្រគល់សំណុំរឿងទៅឲ្យអាជ្ញាកណ្តាលឯកជនដោះស្រាយ នៅឆ្នាំ២០០៧។ ក៏ប៉ុន្តែ តុលាការចាប់កំហុសលោកស្រី នៅត្រង់ថា នៅក្រោយពេលដែលអាជ្ញាកណ្តាលចេញសេចក្តីសម្រេច ដែលធ្វើឲ្យរដ្ឋត្រូវខាតបង់លុយរាប់លានអឺរ៉ូ លោកស្រីគ្រីស្ទីន ឡាហ្កាដ មិនបានព្យាយាមប្តឹងជំទាស់នឹងសេចក្តីសម្រេចនេះ។
ដូច្នេះ សម្រាប់តុលាការ លោកស្រីគ្រីស្ទីន ឡាហ្កាដ ត្រូវជាប់ពិរុទ្ធ ពីបទ “ធ្វេសប្រហែស” ដែលជាបទល្មើសព្រហ្មទណ្ឌ ត្រូវទទួលទោសជាប់ពន្ធនាគាររហូតដល់ទៅ ១ឆ្នាំ និងពិន័យជាប្រាក់ ១ម៉ឺន៥ពាន់អឺរ៉ូ។ ក៏ប៉ុន្តែ ចៅក្រមដែលបានលើកឡើងពីគុណសម្បត្តិមួយចំនួនរបស់លោកស្រី នៅក្នុងពេលកាន់តំណែង បានសម្រេចមិនដាក់ទោសលើលោកស្រីគ្រីស្ទីន ឡាហ្កាដនោះទេ ទាំងទោសពន្ធនាគារ និងទោសពិន័យជាប្រាក់។
សេចក្តីសម្រេចរបស់តុលាការយុត្តិធម៌គឺជាសេចក្តីសម្រេចបិទផ្លូវតវ៉ា ដូច្នេះ លោកស្រីគ្រីស្ទីន ឡាហ្កាដ មិនអាចប្តឹងជំទាស់បាននោះទេ។ សំណួរដែលត្រូវចោទ នៅក្រោយសេចក្តីសម្រេចនេះ គឺទាក់ទងនឹងមុខតំណែងរបស់លោកស្រីជានាយិកាមូលនិធិរូបិយវត្ថុអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ