ក្រោយផ្ទុះរឿងអាស្រូវពុករលួយ រាជានិយមអេស្ប៉ាញកំពុងផុយស្រួយ
ចុះផ្សាយនៅថ្ងៃ៖
ស្តាប់ - ០៥:១៥
នៅក្នុងប្រទេសអេស្បាញ ក្រុមគ្រួសាររាជវង្សបាន និងកំពុងទទួលញំាញីដោយរឿងអាស្រូវពុករលួយចេញពីសមាជិករាជវង្សខ្លួនឯង។ នៅថ្ងៃសៅរិ៍ ទី៩ កុម្ភៈម្សិលមិញ បុត្រីពៅរបស់ព្រះមហាក្សត្រអេស្ប៉ាញយ័ន កាឡូស គឺម្ចាស់ក្សត្រីគ្រីស្ទីណាត្រូវបានចៅក្រមហ្សូហ្សេ កាស្រូកោះហៅទៅសួរចម្លើយទាក់ទងនឹងរឿងអាស្រូវពុករលួយរបស់ស្វាមីគឺលោក អ៊ីណាគី យូដង់ហ្គារីន។ តែលោកស្រីគ្រីស្ទីណាបានឆ្លើយថា លោកស្រីមិនបានដឹងរឿងអ្វីទំាងអស់ និងថា លោកស្រីមានការជឿទុកចិត្តលើស្វាមីលោកស្រីទំាងស្រុង។ យ៉ាងណាក៏ដោយ រឿងអាស្រូវពុករលួយរបស់ម្ចាស់ក្សត្រីគ្រីស្ទីណាពេលនេះបាន និងកំពុងធ្វើឲ្យប្រជាប្រិយភាពរបស់រាជានិយមធ្លាក់ចុះយ៉ាងខ្លំាង ពិសេសគឺប្រជាប្រិយភាពរបស់ព្រះមហាក្សត្រយ័ន កាឡូសតែម្តង។
នៅថ្ងៃសៅរិ៍ ទី៩ កុម្ភៈម្សិលមិញ លោកស្រីគ្រីស្ទីណាបានឆ្លើយនឹងសំណួររបស់ចៅក្រមហ្សូហ្សេ កាស្រូរយៈពេល ១០ម៉ោងជុំវិញរឿងអាស្រូវកេងបន្លំដែលជាប់ទាក់ទងនឹងស្វាមីរបស់លោកស្រី គឺលោកអ៊ីណាគី យូដង់ហ្គារីន។ លោកយូដង់ហ្គារីនដែលជាអតីតជើងឯកកីឡាបាល់បះ និងដែលក្រោយមក បានប្រែក្លាយជាអ្នកជំនួញតាមរយៈការបង្កើតក្រុមហ៊ុនមួយឈ្មោះ « Noos » ក្នុងឆ្នំា ២០០៣។ មួយឆ្នំាក្រោយមក ពោលក្នុងឆ្នំា ២០០៤ ស្ថានភាពគ្រួសាររបស់ម្ចាស់ក្សត្រីគ្រីស្ទីណាក៏ផ្តើមរីកលូតលាស់ខ្លំាង ដោយមានលទ្ធភាពទិញលំនៅដ្ឋានដ៏ស្កឹមស្កៃមួយនៅក្នុងទីក្រុងបាកសេឡូនក្នុងតម្លែ ៦លានអឺរ៉ូ។ គឺនៅពេលនោះហើយដែលលោកអ៊ីណាគី យូដង់ហ្គារីនបានជាប់ចោទពីបទបង្វែរលុយដោយខុសច្បាប់។
រឿងអាស្រូវកាលណោះបានជំរុញឲ្យព្រះមហាក្សត្រយ័ន កាឡូសដែលជាបីតាក្មេកបង្ខំឲ្យលោកអ៊ីណាគី យូដង់ហ្គារីនលាឈប់ពីប្រធានក្រុមហ៊ុន « Noos »។ លោកយូដង់ហ្គារីនក៏បានយល់ព្រម តែនៅបន្តរក្សាតួនាទីជាអ្នកត្រួតពិនិត្យ។ ក្នុងឆ្នំា ២០០៩ គ្រួសារលោកអ៊ីណាគីក៏បានចាកចេញទៅរស់នៅសហរដ្ឋអាមេរិក តែរូបលោកអ៊ីណាគីនៅតែមិនគេចរួចពីសំណាញ់តុលាការដដែល។ ក្នុងថ្ងៃទី២៩ ធ្នូ ឆ្នំា ២០១១ ថ្ងៃដែលប្រទេសអេស្ប៉ាញផ្តើមសវនាការកាត់ទោសរឿងអាស្រូវពុករលួយនានា ចៅក្រមហ្សូហ្សេ កាស្រូក៏បានចោទប្រកាន់លោកអ៊ីណាគីពីបទលួចពន្ធ លួចបង្វែរលុយសាធារណៈ ព្រមទំាងបទល្មើសមួយចំនួនទៀត។ លោកអ៊ីគីណាអាចនឹងទទួលទោសដេកក្នុងគុករហូតដល់ទៅ ១២ឆ្នំា។
ចៅក្រមហ្សូហ្សេ កាស្រូចង់ដឹងពីតួនាទីរបស់ម្ចាស់ក្សត្រីគ្រីស្ទីណា
បើស្តាប់មើលទៅ រឿងរ៉ាវហាក់ដូចជាជាប់ជំពាក់វាក់វិនតែជាមួយស្វាមីលោកស្រី គឺលោកអ៊ីណាគី យូដង់ហ្គារីនទេ ចុះហេតុអ្វីបានជាធ្លាក់មកដល់លោកស្រីនៅពេលនេះ?។ តាមពិតទៅ និងអ្វីដែលចៅក្រមហ្សូហ្សេ កាស្រូចង់ដឹង និងដែលរូបគាត់បានផ្តើមស៊ើបអង្កេតតំាងពីឆ្នំា ២០១០ មកនោះ គឺតួនាទីរបស់ម្ចាស់ក្សត្រីគ្រីស្ទីណានៅក្នុងសំណុំរឿងពុករលួយរបស់ស្វាមី អ៊ីណាគី យូដង់ហ្គារីន។ គួរជម្រាបជូនថា កាលពីខែមេសា ឆ្នំា ២០១៣ ចៅក្រមកាស្រូក៏ធ្លាប់បានចោទប្រកាន់លោកស្រីគ្រីស្ទីណាម្តងហើយពីបទបានប្រើឥទ្ធិពលរបស់ខ្លួនក្នុងនាមជាកូនស្តេចដើម្បីជួយស្វាមីខ្លួនឯងក្នុងការលួចបង្វែរលុយចំនួន ៦លានអឺរ៉ូ។ តែសេចក្តីសម្រេចរបស់ចៅក្រមកាស្រូកាលណោះត្រូវបានតុលាការលប់ចោលភ្លាមៗតាមសំណូមពររបស់មហាអយ្យការដោយចង់រក្សាកិត្តិយសរាជានិយមនៅចំពោះមុខសាធារណៈជនទូទៅ។
តែអ្វីដែលចៅក្រមកាស្រូចង់ដឹងនៅពេលនេះគឺថា តើម្ចាស់ក្សត្រីគ្រីស្ទីណាមានជាប់ពាក់ព័ន្ធនឹងរឿងអាស្រូវលួចបង្វែរលុយចំនួន ៦លានអឺរ៉ូជាមួយស្វាមីដែរ ឬអត់?។ តែលោកស្រីគ្រីស្ទីណាបានឆ្លើយសារភាពថា លោកស្រីមិនបានដឹងរឿងអ្វីទំាងអស់ និងថា លោកស្រីមានជំនឿទុកចិត្តលើស្វាមីរបស់លោកស្រី។ លោកស្រីគ្រីស្ទីណាដែលនឹងត្រូវបង្ហាញខ្លួនជាថ្មីនៅចំពោះមុខចៅក្រមនាថ្ងៃទី៨ មីនាខាងមុខ។
រាជានិយមនៅអេស្ប៉ាញកំពុងចោទជាបញ្ហា !
រឿងអាស្រូវរបស់គ្រួសារម្ចាស់ក្សត្រីគ្រីស្ទណាពេលនេះ បាន និងកំពុងធ្វើឲ្យប្រជាប្រិយភាពរបស់រាជានិយមអេស្ប៉ាញធ្លាក់ចុះយ៉ាងខ្លំាង ពិសេសគឺប្រជាប្រិយភាពរបស់ព្រះមហាក្សត្រយ័ន កាឡូសតែម្តង។ សូមជម្រាបជូនថា តំាងពីប្រទេសអេស្ប៉ាញបានផ្តើមប្រកាន់យករបបរាជានិយមអាស្រ័យរដ្ឋធម្មនុញក្នុងឆ្នំា ១៩៧៥ មក គេមិនដែលឃើញមានសមាជិកក្រុមគ្រួសាររាជវង្សណាម្នាក់ ទោះបីជិត ឬឆ្ងាយទទួលការចោទប្រកាន់ ឬមួយក៏ទទួលការកាត់ទោសអ្វីទេ។ ដូច្នេះករណីរបស់ម្ចាស់ក្សត្រីគ្រីស្ទីណាដែលជាបុត្រីពៅរបស់ព្រះមហាក្សត្រអេស្ប៉ាញយ័ន កាឡូស អាចថាជាព្រឹត្តិការណ៍លើដំបូងមួយនៅក្នុងប្រវត្តិរបស់រាជានិយមអេស្ប៉ាញ។
ក្រៅពីប្រជាប្រិយភាពរបស់រាជានិយមខ្លួនឯងតំាងពី ៤ ទសវត្សកន្លងទៅ ព្រះមហាក្សត្រយ័ន កាឡូសរូបព្រះអង្គក៏ត្រូវបានប្រជាជនអេស្ប៉ាញទូទៅគោរព ស្រឡាញ់ ព្រមទំាងចាត់ទុកព្រះអង្គជាតួអង្គនៅក្នុងស្ថិរភាពនយោបាយ ការធានាលទ្ធិប្រជាធិបតេយ្យ និងក៏ជាអាជ្ញាកណ្តាលនៅក្នុងដំណោះស្រាយក្នុងរឿងនយោបាយដែរ។ តែក្នុងរយៈពេលប៉ុន្មានឆ្នំាចុងក្រោយនេះ ពិសេសតំាងពីមានការផ្ទុះរឿងអាស្រូវពុករលួយចេញពីគ្រួសារបុត្រីពៅរបស់ព្រះអង្គមក ប្រជាប្រិយភាពរបស់រាជានិយម និងរបស់រូបព្រះអង្គផ្ទាល់បាន និងកំពុងធ្លាក់ចុះជាលំដាប់។ ដូច្នេះសម្រាប់ព្រះបរមរាជវំាង រឿងអាស្រូវនេះចប់កាន់តែឆាប់ កាន់តែល្អ។
វាហាក់ដូចជារហ័សពេលដែលគេហ៊ាននិយាយថា របបរាជានិយមនៅអេស្ប៉ាញកំពុងឈានមកដល់ផ្លូវទាល់មួយនោះ។ តែគេក៏មិនត្រូវភ្លេចនិយាយទេថា មានប្រជាជនអេស្ប៉ាញម្នាក់ក្នុងចំណោមពីរនាក់មិនចង់ឃើញមានវត្តមានរបបរាជានិយមបន្តទៀតឡើយ ដោយពួកគេចង់ដាក់ជំនួសវិញនូវរបបសាធារណរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ