រាជវង្សអេស្ប៉ាញស្រអាប់ ដោយបុត្រីជាប់អង្កេតគេចពន្ធ និងលាងលុយកខ្វក់
ការបើកអង្កេតប្រឆាំងនឹងបុត្រីច្បងព្រះមហាក្សត្រអេស្ប៉ាញ ព្រះរៀម អាំងហ្វង់ Christina ពីបទគេចពន្ធ និងលាងលុយកខ្វក់ គឺដូចជាគេយកព្រនង់មកវាយសំពងបន្ថែមលើគ្រួសាររាជវង្សដែលប្រជាប្រិយភាពកំពុងធ្លាក់ចុះទាបស្រាប់ទៅហើយ ឱ្យកាន់តែធ្លាក់ដុនដាបទៅទៀត។ ព្រះមហាក្សត្រ ហ័ន ការឡូស (Juan Carlos) ផ្ទាល់ព្រះអង្គ មានសុខភាពទន់ខ្សោយ ចាស់ជរាខ្លាំង បណ្តាជនអេស្ប៉ាញភាគច្រើនចង់ឃើញព្រះអង្គដាក់រាជ្យទៅឱ្យបុត្រាផង។
ចុះផ្សាយនៅថ្ងៃ៖
ការចោទប្រកាន់លើបុត្រីព្រះមហាក្សត្រ អាចប្រព្រឹត្តទៅបាន ដោយសារការព្យាយាមរបស់ចៅក្រម José Castro ដែលបានតាមដានសំណុំរឿងនេះតាំងពីឆ្នាំ ២០១០ និងបានឆ្លងកាត់ក្រុមប្រឆាំងជាច្រើន ទម្រាំអាចប្រកាសបើកអង្កេត ពីបទលួចគេចពន្ធ និងលាងលុយកខ្វក់នេះបាន។ កាលពីខែមេសា ២០១៣ ចៅក្រមរូបនេះ ធ្លាប់បានចោទប្រកាន់រាជបុត្រី ពីបទប្រើអំណាចនិងឥទ្ធិពលោក ប៉ុន្តែត្រូវបានសាលាឧទ្ធរណ៍សម្រេចលុបចោលទៅវិញ។
អ្វីដែលតុលាការចង់ដឹងនៅពេលនេះ គឺថាតើរាជបុត្រី មានពាក់ព័ន្ធនឹងសកម្មភាពគេចពន្ធ ឬលាងលុយ ជាមួយស្វាមីឬយ៉ាងណា។ លោក Inaki Urdangarin អតីតជើងឯក handball បន្ទាប់មកប្តូរមកធ្វើជាអ្នកជំនួញ ត្រូវជាប់សង្ស័យពីបទលួចបង្វិលលុយសាធារណៈ ជាង៦លានអឺរ៉ូ ក្នុងអំឡុងឆ្នាំ២០០៤-២០០៦ ដែលកាលណោះលោកជានាយកក្រុមហ៊ុនមួយ ចំណែករាជបុត្រីក៏មានភាគហ៊ុនពាក់កណ្តាល និងជាសមាជិកគណៈកម្មការនាយកក្រុមហ៊ុននេះទៀត។
លោក Inaki Urdangarin អាចនឹងត្រូវជាប់ពន្ធនាគារដល់ទៅ១២ឆ្នាំ។ ចំណែករាជបុត្រី ដែលនឹងត្រូវចូលទៅបង្ហាញខ្លួននៅតុលាការនៅថ្ងៃទី ៨ មីនា ២០១៤ បានឱ្យដឹងជាស្រេចថានឹងធ្វើបណ្តឹងឧទ្ធរណ៍។ រាជវាំងបានសម្តែងការគោរពសិទ្ធិតុលាការ ប៉ុន្តែការជាប់អង្កេតនេះ បានធ្វើត្រកូលរាជវង្សកាន់តែចុះខ្សោយ។ ព្រះមហាក្សត្រ ហ័ន ការឡូស ព្រះជន្ម៧៦ឆ្នាំ ទ្រុឌទ្រោមខ្លាំងផ្នែកសុខភាព មានប្រជាប្រិយភាពធ្លាក់ចុះ បណ្តាជនអេស្ប៉ាញ មិនដល់ពាក់កណ្តាលផង គាំទ្ររាជវង្ស ហើយ ៦២% ចង់ឃើញព្រះមហាក្សត្រដាក់រាជ ទៅបុត្រា Felipe ព្រះជន្ម ៤៥ ឡើងគ្រងជំនួសវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ