ប្រជាសហគមន៍ព្រៃឡង់ ជាង១០០នាក់ មកពីខេត្តទាំង៤ រួមមាន ក្រចេះ ស្ទឹងត្រែង ព្រះវិហារ និងកំពង់ធំ បានឡើងមកជួបជុំគ្នា នៅភ្នំពេញ ដើម្បីចែកខិត្តប័ណ្ណនិយាយ អំពីវិសាលភាព និងសារៈប្រយោជន៍ព្រៃឡង់។ ព្រៃឡង់ដែលរដ្ឋាភិបាលបានធ្វើសម្បទានសេដ្ឋកិច្ចអោយក្រុមហ៊ុនឯកជន។ គម្រោងសម្បទានដីនេះបានធ្វើអោយប៉ះពាល់ដល់ជីវភាពប្រជាពលរដ្ឋទាំង៤ខេត្ត ប្រមាណ២សែននាក់។ នៅព្រឹកថ្ងៃព្រហស្បតិ៍នេះ ប្រជាសហគមន៍ព្រៃឡង់បាននាំគ្នាបន់ស្រន់នៅព្រះអង្គដងកើ ហើយបានទៅប្រជុំគ្នាឈរតាមភ្លើងស្តុប៩កន្លែង ក្នុងរាជធានីភ្នំពេញ ដើម្បីចែកខិត្តប័ណ្ណផ្សព្វផ្សាយអំពីធនធានព្រៃឡង់។ ពួកគេត្រូវបានអាជ្ញាធរបំបែក និងចាប់ឃាត់ខ្លួនទៀតផង។អ្នកឆ្លើយឆ្លងព័ត៌មានរបស់វិទ្យុបារាំងអន្តរជាតិ លាង ដឺលុច បានជួបសម្ភាសនជាមួយអ្នកតំណាងសហគមន៍ព្រៃឡង់២រូប គឺលោកស្វាយ ភឿន មកពីខេត្តព្រះវិហារ និងលោកថៃ ប៊ុនលាង មកពីខេត្តក្រចេះ ជុំវិញការតវ៉ាការអភិវឌ្ឍក្នុងព្រៃឡង់។
