ប្រជាសហគមន៍ព្រៃឈើស្វែងរកកិច្ចគាំទ្រដើម្បីការពារព្រៃឡង់
នៅពុធទី ៣០មិថុនា នេះ តំណាងសហគមន៍អ្នកការពារព្រៃឈើ មកពីខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ បានធ្វើដំណើរមកកាន់ទីក្រុងភ្នំពេញ ស្វែងរកការគាំទ្រពីសំណាក់អាជ្ញាធរជំនាញ និងលោកប្រមុខរដ្ឋាភិបាល ហ៊ុន សែន ដើម្បីការពារព្រៃឡង់។ ព្រៃឡង់ ជាប្រភេទព្រៃស្រោង ដែលលាតសន្ធឹងក្នុងខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ។ ក្រុមប្រជាសហគមន៍ក្រីក្រ និងជនជាតិភាគតិច រាប់ម៉ឺននាក់ ចិញ្ចឹមជីវិតប្រចាំថ្ងៃដោយសារការរុករកអនុផលព្រៃឈើ ក្នុងតំបន់ព្រៃឡង់នោះ។
ចុះផ្សាយនៅថ្ងៃ៖
បទអន្តរាគមន៍របស់លី ម៉េងហួរពីទីក្រុងភ្នំពេញ
នៅព្រឹកថ្ងៃ ៣០ មិថុនានេះ តំណាងសហគមន៍ ដែលភាគច្រើន ជាជនជាតិភាគតិច ប្រមាណ ១២០ នាក់ បានលើកគ្នា ទៅដាក់ញត្តិ នៅផ្ទះលោកនាយករដ្ឋមន្ត្រី ហ៊ុន សែន ជិតវិមានឯករាជ្យ ដាក់ទៅកាន់ក្រសួងកសិកម្ម និងនៅរដ្ឋបាលព្រៃឈើ។ លិខិតនោះ គឺគាំទ្រវិធានបង្ក្រាបបទល្មើសព្រៃឈើ ដែលដាក់ចេញដោយលោកនាយករដ្ឋមន្ត្រី។
ក្រុមតំណាងបណ្ថាញសហគមន៍ព្រៃឡង់ មកពីខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ នៅព្រឹកមិញ ក៏បានជួបជុំ ថ្លែងសារទុក្ខម្តងម្នាក់ៗ ជុំវិញបទល្មើសកាប់បំផ្លាញព្រៃឈើ និងការផ្តល់ដីសម្បទានដល់ក្រុមហ៊ុន នៅតំបន់ព្រៃឡង់ ក្នុងខេត្តទាំង៤នេះ។
ក្នុងសន្និសីទកាសែត នៅព្រឹកថ្ងៃពុធនេះ តំណាងសហគមន៍មកពីតំបន់ព្រៃឡង់ បានលើកឡើងថា ការផ្តល់ដីសម្បទានសេដ្ឋកិច្ច-សម្បទានរ៉ែ ការកាប់បំផ្លាញព្រៃឈើ ការធ្វើអាជីវកម្មឈើប្រណិត និងការកាប់រានដីធ្វើកម្មសិទ្ធិក្នុងតំបន់ព្រៃឡង់ កំពុងធ្វើឲ្យប្រជាជនសហគមន៍ នៅជុំវិញតំបន់ព្រៃឡង់ជួបនូវវិបត្តិ និងមានក្តីព្រួយបារម្ភយ៉ាងខ្លាំង។
តំណាងសហគមន៍ព្រៃឈើបានអះអាងថា ព្រៃឡង់ ជាមុខរបរប្រពៃណីរបស់ពួកគេ ក្នុងការប្រមូលផល និងអនុផលព្រៃឈើ បោចវល្លិ៍ ដងជ័រ រកផ្តៅ និងរកឃ្មុំ។ល។ និង។ល។ សម្រាប់ចិញ្ចឹមជីវិតប្រចាំថ្ងៃ។ តែដល់ពេលរដ្ឋាភិបាលប្រគល់ដីព្រៃទាំងនោះ ដល់ក្រុមហ៊ុន គឺប្រជាជន មិនអាចទៅប្រកបរបរក្នុងព្រៃ និងធ្វើស្រែចំការ បានដូចមុនទេ។
ក្រុមតំណាងសហគមន៍មកពីខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ នៅថ្ងៃនេះ បានទទូចសុំដល់លោកនាយករដ្ឋមន្ត្រី ហ៊ុន សែន និងប្រធានរដ្ឋបាលព្រៃឈើ ដើម្បីចាត់វិធានការ ថែរក្សាការពារតំបន់ព្រៃឡង់ និងបន្តការបង្ក្រាបបទល្មើសព្រៃឈើជាបន្តទៀត។
ព្រៃឡង់ គឺជាព្រៃស្រោង ស្ថិតនៅក្នុងតំបន់ទំនាបនៃប្រទេសកម្ពុជា ដែលសេសសល់ នៅតំបន់អាស៊ីអាគ្នេយ៍។ ព្រៃនេះ មានទំហំប្រហែល ៣,៦០០ គីឡូម៉ែត្រក្រឡា ស្ថិតនៅក្នុងខេត្តព្រះវិហារ កំពង់ធំ ក្រចេះ និងខេត្តស្ទឹងត្រែង។ ប្រជាជនរាប់ម៉ឺននាក់ ដែលរស់នៅពឹងផ្អែកលើការរកអនុផលពីព្រៃឡង់ ដែលភាគច្រើនជាជនជាតិដើមភាគតិចកួយ រស់នៅក្នុងភូមិចំនួន ៣៣៩ ភូមិ ហើយក៏មានប្រជាជនរាប់ម៉ឺននាក់ ដែលរស់នៅក្នុងភូមិចំនួន ៤៥០ ផ្សេងទៀត ដែលស្ថិតនៅចំងាយប្រហែល ១០ គីឡូម៉ែត្រ ជុំវិញព្រៃឡង់ ក៏បានចូលទៅរុករកផល និងអនុផល ពីព្រៃឡង់ផងដែរ។
ក្រៅពីផ្តល់ផល និងអនុផល ព្រៃឡង់ក៏មានតម្លៃជាប្រវត្តិសាស្ត្រ ដោយផ្សារភ្ជាប់ទៅនឹងវប្បធម៌ប្រពៃណី ជំនឿសាសនា និងសេដ្ឋកិច្ច ដែលសំបូរទៅដោយជីវចម្រុះ ជាជំរកសត្វព្រៃគ្រប់ប្រភេទ។ តំបន់ព្រៃនោះ ក៏ជាព្រៃទាក់ទាញទឹកភ្លៀង ការពារទឹកជំនន់ និងខ្យល់ព្យុះ និងផ្តល់ប្រភពទឹក ដើម្បីរក្សាលំនឹងទឹកហូរ ផ្តល់ជីជាតិដល់តំបន់ទំនាប តាមបណ្តោយដងទន្លេមេគង្គ សម្រាប់ធ្វើស្រែចំការ និងជួយទប់ស្កាត់ដល់ការប្រែប្រួលអាកាសធាតុថែមទៀតផង។
មន្ត្រីរដ្ឋាភិបាល នៅថ្ងៃនេះ បាបង្ហាញឆន្ទះ ទទួយកនូវរាល់កង្វល់ទាំងអម្បាមាណរបស់ប្រជាជនសហគមន៍ព្រៃឈើនោះ ហើយអះអាងថា រដ្ឋាភិបាល កំពុងតែអនុវត្តវិធានការក្តៅ ដើម្បីបង្ក្រាបបទល្មើសព្រៃឈើ និងដកហូតដីសម្បទានសេដ្ចកិច្ច។
លោកទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី បានលើកឡើងថា រាល់កង្វល់របស់ប្រជាសហគមន៍ព្រៃឈើ នៅក្នុងកាលៈទេសៈនេះ ជាការចូលរួមផ្តល់នូវព័ត៌មានមួយ ដ៏មានសារៈសំខាន់ នៅក្នុងយុទ្ធនាការបង្ក្រាបបទល្មើសព្រៃឈើ។ ម្យ៉ាងទៀត រដ្ឋាភិបាលក៏បានដកហូតដីសម្បទានសេដ្ឋកិច្ចជាហូរហែ ដែលបានប្រព្រឹត្តិផ្ទុយពីកិច្ចព្រមព្រៀង ដូចជា រំលោភបំពានដីសហគមន៍ និងការកាប់រានព្រៃ ទុកដីទំនេរ ជាដើម។ នេះជាវិធានការ ដែលរដ្ឋាភិបាល បាន និងបន្តធ្វើ ដើម្បីកាត់បន្ថយបទល្មើស ដែលជាក្តីកង្វល់របស់ប្រជាសហគមន៍ព្រៃឈើ។
សូមរម្លឹកថា វិធានការណ៍ក្តៅ និងការចាប់រឹបអូសឈើប្រណិត រួមទាំងការបង្ក្រាបបទល្មើសព្រៃឈើ ត្រូវបានលោកប្រមុខរដ្ឋាភិបាលកម្ពុជា ប្រកាសអនុវត្ត ចាប់តាំងពីថ្ងៃផ្លាស់ប្តូរតំណែងប្រធានរដ្ឋបាលព្រៃឈើ កាលពីថ្ងៃទី៦ ខែមេសា ឆ្នាំ២០១០។ ឈើប្រណិតរាប់ពាន់ម៉ែត្រគូប ត្រូវបានរឹបអូស និងឈ្មួញឈើប្រមាណ ១០០ នាក់ ត្រូវបានចាប់ខ្លួន បញ្ជូនទៅកាត់ទោសនៅតុលាការ។ ក៏ប៉ុន្តែនៅក្នុងខែឧសភា និងខែមិថុនាកន្លងមកនេះ វិធានការបង្ក្រាបបទល្មើសព្រៃឈើ ហាក់ដូចជា ស្ងាត់ស្ងៀមបន្តិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ