ប្រជាសហគមន៍ព្រៃឈើបើកយុទ្ធនាការអភិរក្សព្រៃឡង់
បណ្តាញប្រជាសហគមន៍ព្រៃឈើមកពី១៤ខេត្ត បានជួបជុំគ្នា គូរមុខ គូរមាត់ និងបានបែរបន់នៅព្រះអង្គដងកើ មុខព្រះបរមរាជវាំង កាលពីព្រឹកថ្ងៃទី១៨សីហានេះ។ ការជួបជុំរបស់ប្រជាសហគមន៍ព្រៃឈើទាំងនោះ ដើម្បីបន់ស្រន់ និងស្វែងរកការគាំទ្រចំពោះកិច្ចការពារព្រៃឡង់ និងធនធានធម្មជាតិជាច្រើនទៀតនៅកម្ពុជា។ ខិត្តប័ណ្ណនិយាយពីព្រៃឡង់ប្រមាណ ១ម៉ឺនសន្លឹក ត្រូវបានចែកចាយតាមផ្លូវកែង ភ្លើងស្តុបជាច្រើននៅទីក្រុងភ្នំពេញ ក៏ប៉ុន្តែត្រូវអាជ្ញាធររារាំង ហើយសកម្មជនព្រៃឈើជាង ១០០ នាក់ ត្រូវបានចាប់ឃាត់ខ្លួនមួយរយៈ។
ចុះផ្សាយនៅថ្ងៃ៖
ស្តាប់ - ០២:១៣
ប្រជាសហគមន៍ព្រៃឈើជិត ៣០០នាក់ បានជួបជុំអុជធូប និងបន់ស្រន់នៅព្រះអង្គដងកើ មុខព្រះបរមរាជវាំង ដើម្បីសុំឲ្យបារមីដ៏ស័ក្តិសិទ្ធិ ជួយការពារព្រៃឡង់។ ក្រុមប្រជាសហគមន៍ព្រៃឈើទាំងនោះ ក៏បានចុះទៅតាមចំណុចផ្លូវកែង ភ្លើងស្តុប ក្នុងក្រុងភ្នំពេញចំនួន ៩កន្លែង ដើម្បីចែកចាយខិត្តប័ណ្ណ ដល់មហាជនប្រមាណ ១ម៉ឺនសន្លឹក នៅព្រឹកថ្ងៃព្រហស្បតិ៍នេះ។
ក៏ប៉ុន្តែអាជ្ញាធរមូលដ្ឋាន និងប៉ូលិសចរាចរណ៍ បានរារាំង និងចាប់ឃាត់ខ្លួនសកម្មជនព្រៃឈើជាង ១០០នាក់ ក្នុងពេលចែកខិត្តប័ណ្ណ កាលពីព្រឹកមិញនេះ។ ក្រោយការឃាត់ខ្លួន ដើម្បីសួរនាំ និងចុះកិច្ចសន្យាលើក្រដាសស្នាមរួចមក សកម្មជនព្រៃឈើទាំងនោះ ត្រូវបានដោះលែងមកវិញ។ ខិត្តប័ណ្ណ ក៏ត្រូវអាជ្ញាធរដកហូតផងដែរ។
អង្គការសង្គមស៊ីវិលចំនួនបី បានចេញសេចក្តីថ្លែងការណ៍ថ្កោលទោសភ្លាមៗ ចំពោះការចាប់ឃាត់ខ្លួនសកម្មជនព្រៃឡង់នេះ។ សង្គមស៊ីវិលបង្ហាញការព្រួយបារម្ភថាវាជាការថយចុះនៃសេរីភាពបញ្ចេញមតិ និងសេរីភាពរបស់មហាជន។
ខិត្តប័ណ្ណរបស់សកម្មជនព្រៃឈើទាំងនោះ បានលើកបង្ហាញពីអត្ថប្រយោជន៍ និងប្រវត្តិព្រៃឡង់ ហើយបានអំពាវនាវដល់រដ្ឋាភិបាល និងមន្ត្រីពាក់ព័ន្ធ ឲ្យចូលរួមទប់ស្កាត់ការបំផ្លាញព្រៃឡង់ និងបញ្ឈប់ការផ្តល់ដីសម្បទានតំបន់ព្រៃឡង់ ទៅឲ្យក្រុមហ៊ុនឯកជន។
អ្នកស្រី ពុគហុង សកម្មជនមកពីខេត្តព្រះវិហារ បានអះអាងថា ការផ្តល់ដីព្រៃឡង់ឲ្យក្រុមហ៊ុនឯកជនធ្វើឲ្យប៉ះពាល់ប្រជាសហគមន៍ ពិសេស ជនជាតិដើមភាគតិច ដែលមិនអាចចូលទៅរុករកអនុផលព្រៃឈើ ក្នុងព្រៃឡង់បានទៀតឡើយ។
ព្រៃឡង់ ជាតំបន់ព្រៃឈើ ដែលមានស្លឹកឈើពណ៌បៃតងគ្រប់រដូវកាល។ តំបន់ព្រៃឡង់ មានទំហំប្រមាណ ៣.៦០០ គីឡូម៉ែត្រក្រឡា លាតសន្ធឹងក្នុងខេត្ត៤ គឺខេត្តកំពង់ធំ ព្រះវិហារ ក្រចេះ និងខេត្តស្ទឹងត្រែង។
សកម្មជនសិទ្ធិមនុស្ស និងប្រជាសហគមន៍រាយការណ៍ថា ក្នុងរយៈពេលប៉ុន្មានឆ្នាំចុងក្រោយនេះ ព្រៃឡង់បានទទួលរងនូវការកាប់បំផ្លាញព្រៃឈើយ៉ាងធ្ងន់ធ្ងរ ដែលបង្កឡើងដោយ ការផ្តល់ដីសម្បទានសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ