តើបម្រាមជនអន្តោប្រវេសន៍របស់លោកដូណាល់ត្រាំស្របនឹងរដ្ឋធម្មនុញ្ញឬទេ?
ចុះផ្សាយនៅថ្ងៃ៖
ស្តាប់ - ០៤:៣៥
កាលពីថ្ងៃសុក្រ ទី២៧មករាកន្លងទៅ លោកដូណាល់ត្រាំបានចុះហត្ថលេខាលើក្រឹត្យ ហាមឃាត់ពលរដ្ឋមកពីប្រទេសចំនួន ៧ ដែលជាប្រទេសមានប្រជាជនភាគច្រើនកាន់សាសនាអ៊ីស្លាម មិនឲ្យធ្វើដំណើរចូលមកក្នុងទឹកដីអាមេរិក។ ចាប់ពីពេលនោះមក ចលនាប្រឆាំងបានផ្ទុះឡើង ទាំងក្នុងរូបភាពជាបាតុកម្មមហាជន ទាំងការបញ្ចេញមតិប្រឆាំងនៅក្នុងចំណោមសមាជិកសភា និងរហូតដល់តុលាការ ហើយនិយាយពីតុលាការ សំណួរដ៏សំខាន់មួយ ដែលកំពុងចោទឡើង គឺនៅត្រង់ថា តើបម្រាមដែលដាក់ចេញដោយលោកដូណាល់ត្រាំនេះស្របនឹងរដ្ឋធម្មនុញ្ញដែរឬទេ?
នៅសហរដ្ឋអាមេរិក ប្រធានាធិបតីគឺជាអ្នកមានអំណាចកំពូលខាងនីតិប្រតិបត្តិ ហើយការដាក់ចេញនូវវិធានការរឹតបន្តឹងលំហូរជនអន្តោប្រវេសន៍ គឺជាផ្នែកមួយ នៃសិទ្ធិអំណាចរបស់លោកប្រធានាធិបតី ដូណាល់ ត្រាំ។ ក៏ប៉ុន្តែ វិធានការនេះអាចនឹងត្រូវតុលាការកំពូលលុបចោលវិញ ប្រសិនបើចៅក្រមរកឃើញថា វាផ្ទុយនឹងរដ្ឋធម្មនុញ្ញ។ ការរំលោភ ឬមិនរំលោភលើរដ្ឋធម្មនុញ្ញនេះហើយ ដែលជាចំណុចកំពុងតែមានការប្រទាញប្រទង់គ្នាខ្លាំង រវាងក្រុមអ្នកគាំទ្រ និងអ្នកប្រឆាំងនឹងវិធានការរបស់លោកដូណាល់ត្រាំ។
សម្រាប់ក្រុមប្រឆាំង ក្រឹត្យរបស់លោកដូណាល់ត្រាំ ដែលការហាមឃាត់អ្នកកាន់សាសនាអ៊ីស្លាមមិនឲ្យចូលមកក្នុងទឹកដីអាមេរិក គឺជាការរំលោភលើរដ្ឋធម្មនុញ្ញ (First Amendment) ដែលមានចែងហាមឃាត់មិនឲ្យមានការរើសអើងខាងសាសនា។ ក៏ប៉ុន្តែ ក្រុមអ្នកគាំទ្រវិញ រួមទាំងលោកដូណាល់ត្រាំខ្លួនលោកផ្ទាល់ផងបានឆ្លើយការពារថា ក្រឹត្យរបស់លោកមិនមានអត្ថន័យហាមឃាត់អ្នកកាន់សាសនាអ៊ីស្លាមនោះទេ ហើយលោកបានស្តីបន្ទោសដល់អ្នកកាសែតថាជាអ្នកចុះផ្សាយបំផ្លើស ធ្វើឲ្យសាធារណជនមើលឃើញថា វិធានការរបស់លោកគឺជាការដាក់បម្រាមលើអ្នកកាន់សាសនាអ៊ីស្លាម។
ជាការពិត បើគេពិនិត្យមើលទៅលើខ្លឹមសារនៃក្រឹត្យ ដែលលោកដូណាល់ត្រាំបានចុះហត្ថលេខា កាលពីថ្ងៃសុក្រ គេមិនឃើញមានត្រង់ចំណុចណាដែលនិយាយពីការហាមឃាត់អ្នកកាន់សាសនាអ៊ីស្លាមនោះទេ តែជាបម្រាមទៅលើពលរដ្ឋ ដែលមកពីប្រទេសចំនួន ៧ គឺស៊ីរី អ៊ីរ៉ង់ អ៊ីរ៉ាក់ យេម៉ែន លីប៊ី ស៊ូដង់ និងសូម៉ាលី។ ហើយកាលពីពេលកន្លងមក តុលាការកំពូលអាមេរិកធ្លាប់បានចេញសេចក្តីសម្រេចជាច្រើនរួចមកហើយ ដោយបានរក្សាទុកជាស្របច្បាប់នូវបម្រាមចំពោះជនអន្តោប្រវេសន៍ដោយផ្អែកលើជាតិសាសន៍ ឬប្រទេស រួមមានដូចជាបម្រាមលើអន្តោប្រវេសន៍ចិន នៅក្នុងអំឡុងឆ្នាំ១៨៩០ និងបម្រាមទៅលើក្រុមកុម្មុយនិស្តប៊ែលហ្ស៊ិក នៅក្នុងអំឡុងឆ្នាំ១៩៧០ ជាដើម។
គេអាចលើកឡើងនូវទឡ្ហីករណ៍ចម្បងចំនួនពីរ ដើម្បីការពារក្រឹត្យរបស់លោកដូណាល់ត្រាំ។ ទីមួយ ប្រទេសទាំងពីរ៧ ដែលមានចែងក្នុងក្រឹត្យនេះ ថ្វីដ្បិតតែមានប្រជាជនភាគច្រើនកាន់សាសនាអ៊ីស្លាម តែក៏មានអ្នកកាន់សាសនាផ្សេងដែរ ហើយរាល់អ្នកណាដែលកាន់លិខិតឆ្លងដែនមកពីប្រទេសទាំង ៧នេះ បើទោះបីជាកាន់សាសនាអ្វីក៏ដោយ ក៏សុទ្ធតែស្ថិតក្នុងវិសាលភាពនៃបម្រាមក្នុងក្រឹត្យរបស់លោកដូណាល់ត្រាំទាំងអស់។ ទីពីរ គេគួរធ្វើការកត់សម្គាល់ថា មានប្រទេសជាច្រើនផ្សេងទៀត ដែលមានប្រជាជនភាគច្រើនកាន់សាសនាអ៊ីស្លាមនោះ មិនត្រូវបានរាប់បញ្ចូលក្នុងបម្រាមនេះទេ។ ដូច្នេះ គេអាចនិយាយបានថា បម្រាមរបស់លោកដូណាល់ត្រាំ គឺទាក់ទងនឹងប្រទេស មិនមែនសាសនានោះទេ។ ដូច្នេះ វាមិនមែនជាការរំលោភទៅលើរដ្ឋធម្មនុញ្ញនោះទេ។
ក៏ប៉ុន្តែ អ្នកច្បាប់ជាច្រើនបានលើកឡើងថា នៅក្នុងការកំណត់ភាពស្របច្បាប់នៃក្រឹត្យរបស់ប្រធានាធិបតី ចៅក្រមមិនធ្វើការពិនិត្យមើលតែទៅលើពាក្យសម្តីដែលសរសេរនៅលើក្រដាសនោះទេ តែអាចធ្វើការពិនិត្យមើលទៅលើភស្តុតាងផ្សេងទៀត ដែលអាចជាកត្តាកំណត់អំពីស្មារតីនៃក្រឹត្យ ព្រមទាំងចេតនារបស់អ្នកចេញក្រឹត្យ។ នៅត្រង់ចំណុចនេះ សេចក្តីថ្លែងការណ៍មួយចំនួនរបស់លោកដូណាល់ត្រាំអាចនឹងត្រូវចោទជាបញ្ហា។
គេនៅចាំបានថា នៅក្នុងអំឡុងយុទ្ធនាការឃោសនាបោះឆ្នោត លោកដូណាល់ត្រាំធ្លាប់បានប្រកាសយ៉ាងច្បាស់ៗថា លោកនឹងហាមឃាត់អ្នកកាន់សាសនាអ៊ីស្លាមទាំងអស់មិនឲ្យចូលក្នុងទឹកដីអាមេរិក រហូតដល់ពេលដែលមានការបង្កើតនូវយន្តការត្រួតពិនិត្យច្បាស់លាស់ថាពួកគេមិនបង្កបញ្ហាដល់សន្តិសុខជាតិអាមេរិក។
លើសពីនេះទៅទៀត កាលពីថ្ងៃសុក្រ នៅថ្ងៃដែលលោកចេញបម្រាមលើជនអន្តោប្រវេសន៍មកពីប្រទេសកាន់សាសនាអ៊ីស្លាមទាំង ៧ លោកដូណាល់ត្រាំបានផ្តល់បទសម្ភាសន៍ដល់វិទ្យុគ្រិស្ទានមួយ (Christian Broadcasting Network) ថា លោកនឹងធ្វើការលើកលែងដល់អ្នកកាន់គ្រិស្ទសាសនា។ ការហាមឃាត់អ្នកកាន់សាសនាមួយ ហើយលើកលែងដល់អ្នកកាន់សាសនាមួយទៀតបែបនេះ អាចនឹងត្រូវចៅក្រមកំណត់ថាជាការរើសអើងខាងសាសនា ដែលរំលោភលើរដ្ឋធម្មនុញ្ញ។
គេក៏អាចនឹងធ្វើការកត់សម្គាល់ផងដែរទៅលើពាក្យសម្តីរបស់លោករូឌី ជូលីយ៉ានី អតីតអភិបាលក្រុងញូវយ៉ក ហើយបច្ចុប្បន្នជាទីប្រឹក្សារបស់លោកដូណាល់ត្រាំ។ នៅថ្ងៃសៅរ៍ មួយថ្ងៃក្រោយលោកដូណាលត្រាំចុះហត្ថលេខាលើក្រឹត្យហាមជនអន្តោប្រវេសន៍ លោកជូលីយ៉ានីបានប្រាប់ទូរទស្សន៍ Fox News ថា កាលពីដំបូង លោកដូណាល់ត្រាំបានប្រាប់លោកច្បាស់ៗថា គោលដៅ គឺធ្វើយ៉ាងណាហាមអ្នកកាន់សាសនាអ៊ីស្លាម ក៏ប៉ុន្តែ ត្រូវរកវិធីធ្វើយ៉ាងណាឲ្យបម្រាមនេះមានភាពស្របច្បាប់។ ហេតុដូច្នេះហើយបានជាលោករៀបចំក្រុមការងារមួយ ដោយរួមមានទាំងអ្នកជំនាញច្បាប់ផង ដើម្បីសិក្សាលម្អិត ហើយបានសម្រេចមិននិយាយពីសាសនានៅក្នុងក្រឹត្យនេះ។
ទាំងអស់នេះអាចនឹងឲ្យគេទាញសេចក្តីសន្និដ្ឋានបានថា ថ្វីដ្បិតតែពាក្យសម្តីសរសេរនៅក្នុងក្រឹត្យមិននិយាយដល់សាសនា ដើម្បីកុំឲ្យផ្ទុយនឹងរដ្ឋធម្មនុញ្ញ ក៏ប៉ុន្តែ ចេតនា និងស្មារតីពិតប្រាកដនៃក្រឹត្យនេះ គឺហាមឃាត់អ្នកកាន់សាសនាអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ