អាមេរិក៖លោកអូបាម៉ាចេញមុខប្រតិកម្មនឹងក្រឹត្យរបស់លោកត្រាំ តែលោកត្រាំមិនឈឺក្បាល
ចុះផ្សាយនៅថ្ងៃ៖
ស្តាប់ - ០៦:០៨
នៅសហរដ្ឋអាមេរិក ក្រឹត្យស្តីពីជនអន្តោប្រវេសន៍ និងជនភសៀខ្លួនរបស់លោកដូណាល់ ត្រាំកំពុងបន្តក្លាយជាបច្ចុប្បន្នភាពក្តៅគគុក។ ប្រតិកម្មរិះគន់ ទិតៀនមានកាន់តែខ្លាំងឡើងៗ ទាំងនៅលើឆាកអន្តរជាតិ និងនៅផ្ទៃក្នុងអាមេរិក។ លោកអតីតប្រធានាធិបតីអូបាម៉ាបានចេញមុខប្រឆាំងនឹងក្រឹត្យរបស់លោកត្រាំដែលលោកគិតថា ផ្ទុយនឹងគោលការណ៍លទ្ធិប្រជាធិបតេយ្យ និងតម្លៃរបស់អាមេរិក។ តែទោះជាយ៉ាងនេះក្តី លោកដូណាល់ ត្រាំមិនខ្ចីយកត្រចៀកស្តាប់ និងបន្តរក្សាជំហររបស់ខ្លួនដោយអះអាងជាថ្មីថា ក្រឹត្យរបស់លោកគ្មានការរើសអើង និងគ្មានការប្រឆាំងនឹងអ្នកកាន់សាសនាអ៊ីស្លាមទេ។
អន្តរាគមន៍របស់លោកអតីតប្រធានាធិបតីបារ៉ាក់ អូបាម៉ាទាក់ទងនឹងក្រឹត្យរបស់លោកត្រាំស្តីពីជនអន្តោប្រវេសន៍ និងជនភៀសខ្លួនមិនមែនជារឿងចំឡែកទេ មិនចំឡែកព្រោះលោកបារ៉ាក់ អូបាម៉ាធ្លាប់បានបញ្ជាក់ជាផ្លូវការរួចហើយថា លោកនឹងចូលខ្លួនបញ្ចេញមតិយោបល់ក្នុងរឿងនយោបាយ និងបញ្ហាជាតិ ប្រសិនបើលោកយល់ឃើញថា មានបញ្ហាមួយចំនួនកំពុងកើតឡើងផ្ទុយនឹងគោលការណ៍លទ្ធិប្រជាធិបេត្យ និងតម្លៃជាសារវន្តរបស់អាមេរិក។ នៅក្នុងសន្និសីទកាសែតចុងក្រោយកាលពីថ្ងៃទី១៨ មករាកន្លងទៅ ពោល២ថ្ងៃមុននឹងការផ្ទេរតំណែងទៅឲ្យលោកដូណាល់ ត្រាំ លោកអូបាម៉ាបានដាក់ចេញនូវលក្ខខណ្ឌមួយចំនួនដែលលោកត្រូវបញ្ចេញប្រតិកម្ម រួមមាន ការរើសអើង ឧបសគ្គផ្សេងៗទាក់ទងនឹងសិទ្ធិបោះឆ្នោត ឬមួយក៏គំនិតចង់បណ្តេញកូនក្មេងដែលបានធំដឹងក្តីលើទឹកដីអាមេរិកជាដើម។
សម្រាប់លោកអូបាម៉ា ក្រឹត្យរបស់លោកត្រាំស្តីពីជនអន្តោប្រវេសន៍ និងជនភៀសខ្លួនពិតជាមានលក្ខណៈរើសអើង និងប្រកាន់ពូជសាសន៍។ ប្រតិកម្មរបស់លោកអូបាម៉ាត្រូវបានធ្វើឡើងតាមរយៈអ្នកនាំពាក្យរបស់លោក គឺលោក Kevin Lewis នៅក្នុងសេចក្តីប្រកាសព័ត៌មានមួយ។ នៅក្នុងសេចក្តីប្រកាសព័ត៌មាននោះ លោកអូបាម៉ាមិនបានប្រតិកម្មផ្ទាល់លើក្រឹត្យរបស់លោកត្រាំ ហើយក៏មិនបាននិយាយចំឈ្មោះលោកត្រាំដែរ តែចូលរួមលើកទឹកចិត្តពលរដ្ឋអាមេរិកដែលបានក្រោកឈរធ្វើបាតុកម្មការពារលទ្ធិប្រជាធិបតេយ្យ។ សេចក្តីប្រកាសព័ត៌មានដដែលបានបញ្ជាក់ថា លោកអូបាម៉ាមិនយល់ស្របទាល់តែសោះពីការរើសអើងមនុស្សដោយផ្អែកលើជំនឿ និងសាសនារបស់គេម្នាក់ៗ។
តើរឿងរ៉ាវទាក់ទងនឹងក្រឹត្យរបស់លោកត្រាំអាចនឹងបញ្ចប់នៅពេលណា និងយ៉ាងដូចម្តេច?
រឿងរ៉ាវទាក់ទងនឹងក្រឹត្យរបស់លោកត្រាំស្តីពីជនអន្តោប្រវេសន៍ និងជនភៀសខ្លួនកំពុងទទួលរងការប្រឆាំងកាន់តែខ្លាំងឡើងៗនៅលើឆាកអន្តរជាតិ និងនៅផ្ទៃក្នុងអាមេរិក។ នៅថ្ងៃចន្ទ ទី៣០ មករា ពោលទន្ទឹមគ្នានឹងប្រតិកម្មរបស់លោកអូបាម៉ា គេឃើញមានមន្រ្តីការទូតអាមេរិកជាច្រើននាក់បានបង្ហោះមតិប្រឆាំងនឹងក្រឹត្យរបស់លោកត្រាំតាមរយៈ « កាណាល់ប្រឆាំង » នៅផ្ទៃក្នុងក្រសួងការបរទេស។ « កាណាល់ប្រឆាំង » នេះជាមធ្យោបាយទាក់ទងមួយនៅផ្ទៃក្នុងក្រសួងការបរទេសអាមេរិកដែលមិនមានបញ្ចេញឈ្មោះ ឬអត្តសញ្ញាណរបស់រូបមន្រ្តីការទូតប្រឆាំងណាម្នាក់ទេ។
ក្រសួងការបរទេសមិនបានផ្តល់ព័ត៌មានលំអិតទាក់ទងនឹងអត្ថន័យរបស់សារ ចំនួនមន្រ្តីការទូតដែលប្រឆាំង ឬមួយចំនួនអ្នកគាំទ្រទេ។ សូមជម្រាបជូនថា « កាណាល់ប្រឆាំង » នៅផ្ទៃក្នុងក្រសួងការបរទេសនេះត្រូវបានបង្កើតឡើងកាលពីឆ្នាំ ១៩៧១ ក្នុងសម័យសង្រ្គាមវៀតណាមដើម្បីឆ្លើយតបនឹងពាក្យរិះគន់របស់មន្រ្តីការទូតចំពោះនយោបាយការបរទេសអាមេរិក។ ទន្ទឹមនឹងការប្រឆាំងពីឥស្សរជននយោបាយ ក្រឹត្យរបស់លោកត្រាំមួយនេះក៏កំពុងទទួលរងការប្តឹងទៅតុលាការសហព័ន្ធពីរដ្ឋ និងមេធាវីមួយចំនួនដែរ។ ជាក់ស្តែងនាចុងសប្តាហ៍កន្លងទៅ ចៅក្រមនៅញូយ៉ក និងវឺយីញ៉ាបានបង្ខំចិត្តឲ្យព្យួរការអនុវត្តន៍ក្រឹត្យលោកត្រាំតាមពាក្យបណ្តឹងរបស់សមាគមន៍សិទ្ធិមនុស្សជាច្រើន។
នៅថ្ងៃចន្ទ ទី៣០ មករាដដែល រដ្ឋអំណាចក្នុងទីក្រុងវ៉ាស៊ីតោនបានប្រកាសឲ្យដឹងពីគម្រោងដាក់ពាក្យបណ្តឹងទៅតុលាការសហព័ន្ធប្រឆាំងនឹងក្រឹត្យរបស់លោកដូណាល់ ត្រាំ។ រដ្ឋមន្រ្តីអាមេរិកម្នាក់មកពីគណបក្សប្រជាធិបតេយ្យបានថ្លែងនៅក្នុងសន្និសីទកាសែតថា គ្មាននរណាអាចអង្គុយលើច្បាប់បានឡើយ ទោះបីជាប្រធានាធិបតីក៏ដោយ និងថានៅតុលាការ អ្នកឈ្នះមិនមែនជាមនុស្សដែលនិយាយស្រែកខ្លាំងៗទេ តែគឺច្បាប់រដ្ឋធម្មនុញ្ញ។ គេមិនដឹងថា តើរឿងរ៉ាវមួយនេះនឹងចប់នៅពេលណាទេ អ្វីដែលគេដឹង មានផ្លូវពីរដែលអាចលុបក្រឹត្យរបស់លោកត្រាំបាន ទី១ គឺការសម្រេចរបស់តុលាការកំពូល និងទី២ ការអនុម័តពីសភា។
តែសព្វថ្ងៃនេះ គណបក្សសាធារណរដ្ឋរបស់លោកដូណាល់ ត្រាំកំពុងមានសម្លេងភាគច្រើនទាំងនៅសភា និងព្រឹទ្ធសភា។
លោកដូណាល់ ត្រាំប្រើធម៌ក្តៅចំពោះអ្នកចេញមុខប្រឆាំងក្រឹត្យរបស់លោក
ឆ្លើយតបនឹងការប្រឆាំងពីគ្រប់ទិសទី ពិសេសនៅផ្ទៃក្នុងអាមេរិក លោកដូណាល់ ត្រាំមិនញញើតនឹងប្រើវិធានការធម៌ក្តៅឡើយ។ ជាក់ស្តែង លោកត្រាំបានដកតំណែងលោកស្រីសាលី យ៉េត (Sally Yates) ពីរដ្ឋមន្រ្តីស្តីទីនៃក្រសួងយុត្តិធម៌។ លោកស្រីយ៉េតដែលតែងតាំងក្នុងជំនាន់លោកអូបាម៉ាបានចេញមុខចោទសួរពីភាពស្របច្បាប់នៃក្រឹត្យរបស់លោកដូណាល់ ត្រាំដ៏ចម្រូងចម្រាស។ ការដកតំណែងលោកស្រីយ៉េតត្រូវបានធ្វើឡើងតាមរយៈសេចក្តីប្រកាសព័ត៌មានរបស់សេតវិមានដែលមានខ្លឹមសារថា លោកស្រីយ៉េតបានក្បាត់ក្រសួងយុត្តិធម៌ដោយបដិសេធមិនអនុវត្តតាមក្រឹត្យប្រធានាធិបតីដែលសំដៅការពារពលរដ្ឋអាមេរិក។
ក្រៅពីបញ្ចប់តំណែងរដ្ឋមន្រ្តីស្តីទីក្រសួងយុត្តិធម៌ លោកត្រាំក៏បានប្តូរនាយកស្តីទីទទួលបន្ទុកអន្តោប្រវេសន៍ និងគយដែរ។ ដោយឡែក ការប្រឆាំងរបស់មន្រ្តីការទូតនៅក្រសួងការបរទេសក៏មិនអាចទប់កំហឹងរបស់លោកត្រាំបានដែរ។ អ្នកនាំពាក្យលោកត្រាំបានប្រើសម្តីខ្លាំងៗថា ជម្រើសមានតែពីរគត់ ឬមួយពួកគេទទួលយកក្រឹត្យរបស់ប្រធានាធិបតី ឬមួយពួកគេលាឈប់ពីការងារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ