អ៊ីស្រាអែលចោទអ៊ីរ៉ង់ថានៅពីក្រោយភេរវកម្មលើទេសចរអ៊ីស្រាអែលនៅប៊ុលហ្ការី
ការវាយប្រហារដោយគ្រាប់បែកអត្តឃាត ទៅលើរថយន្តដឹកអ្នកទេសចរអ៊ីស្រាអែល នៅក្នុងប្រទេសប៊ុលហ្ការី កាលពីថ្ងៃពុធ ម្សិលមិញ បានបណ្តាលឲ្យមនុស្សយ៉ាងតិច ៨នាក់ បាត់បង់ជីវិត និងប្រមាណជាង ៣០នាក់ផ្សេងទៀតរងរបួស។ ក្នុងចំណោមអ្នកស្លាប់ ក្រៅពីភេរវជនអត្តឃាត គឺមានជនជាតិអ៊ីស្រាអែល ៦នាក់ និងអ្នកបើកបរជនជាតិប៊ុលហ្ការីម្នាក់។ រដ្ឋាភិបាលអ៊ីស្រាអែលបានចោទអ៊ីរ៉ង់ថាជាអ្នកនៅពីក្រោយការវាយប្រហារភេរវកម្មនេះ ហើយព្រមានថានឹងចាត់វិធានការតបវិញយ៉ាងចាស់ដៃបំផុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
យោងតាមមន្រ្តីរដ្ឋាភិបាលប៊ុលហ្ការី ភេរវជនអត្តឃាត ដែលមានកាន់ប័ណ្ណបើកបរអាមេរិក ហើយដែលទំនងជាប័ណ្ណបើកបរក្លែងក្លាយ បានបំផ្ទុះគ្រាប់បែកនៅក្នុងរថយន្តក្រុងមួយ ដែលដឹកអ្នកទេសចរអ៊ីស្រាអែលចេញពីព្រលានយន្តហោះរបស់ប៊ុលហ្ការី។
ភ្លាមៗ លោកបេនយ៉ាមីន នេតាន់យ៉ាហ៊ូ នាយករដ្ឋមន្រ្តីអ៊ីស្រាអែល បានចេញសេចក្តីថ្លែងការណ៍មួយ ដោយចោទថា អ៊ីរ៉ង់ជាអ្នកនៅពីក្រោយការវាយប្រហារភេរវកម្មនេះ ហើយព្រមានថានឹងធ្វើការតបតវិញយ៉ាងចាស់ដៃបំផុត។ រដ្ឋមន្រ្តីការពារជាតិអ៊ីស្រាអែលវិញ បានគូសបញ្ជាក់ថា ការវាយប្រហារលើអ្នកទេសចរអ៊ីស្រាអែលនៅប៊ុលហ្ការី មានលក្ខណៈស្រដៀងគ្នានឹងការប៉ុនប៉ងវាយប្រហារកន្លងមក ទៅលើគោលដៅអ៊ីស្រាអែល នៅក្នុងប្រទេសថៃ ឥណ្ឌា កេនយ៉ា អាស៊ែបៃហ្សង់ និងកោះស្ហ៊ីប ដែលគេយល់ថាជាស្នាដៃរបស់អ៊ីរ៉ង់។
អ្នកវិភាគជាទូទៅយល់ថា ការវាយប្រហារ និងការប៉ុនប៉ងវាយប្រហារភេរវកម្មទាំងនេះ គឺជាផ្នែកមួយនៃសង្រ្គាមងងឹតរវាងអ៊ីស្រាអែល និងអ៊ីរ៉ង់។ អ៊ីរ៉ង់ទំនងជាចង់សងសឹកតបតនឹងការលបធ្វើឃាតអ្នកវិទ្យាសាស្រ្តនុយក្លេអ៊ែរអ៊ីរ៉ង់ នាពេលកន្លងមក ដែលអ៊ីរ៉ង់ចោទថាជាស្នាដៃរបស់អ៊ីស្រាអែល។
គួរបញ្ជាក់ផងដែរថា ការវាយប្រហារភេរវកម្មនៅប៊ុលហ្ការី កាលពីម្សិលមិញនេះ កើតឡើងនៅចំថ្ងៃខួបគម្រប់ ១៨ឆ្នាំ នៃការវាយប្រហារភេរវកម្មទៅលើសហគមន៍ជនជាតិជ្វីហ្វ ក្នុងប្រទេសអាហ្សង់ទីន កាលពីឆ្នាំ១៩៩៤ ដែលសម្លាប់មនុស្ស ៨៥នាក់ ហើយអ៊ីស្រាអែលចោទថាជាស្នាដៃរបស់អ៊ីរ៉ង់ ប៉ុន្តែ អ៊ីរ៉ង់បដិសេធ។
ជុំវិញការវាយប្រហារភេរវកម្ម នៅប៊ុលហ្ការីម្សិលមិញនេះ រដ្ឋាភិបាលអ៊ីរ៉ង់ក៏បានបដិសេធការចោទប្រកាន់របស់អ៊ីស្រាអែលដែរ។ អ្នកនាំពាក្យរដ្ឋាភិបាលអ៊ីរ៉ង់បានលើកឡើងថា អ៊ីរ៉ង់ធ្លាប់រងគ្រោះដោយភេរវកម្ម ដូច្នេះ អ៊ីរ៉ង់មានជំហរមួយ គឺថ្កោលទោសរាល់ការវាយប្រហារភេរវកម្មទាំងអស់ នៅទូទាំងពិភពលោក។
ប្រមុខដឹកនាំរដ្ឋាភិបាលប៊ុលហ្ការី អាមេរិក បារាំង និងអង់គ្លេសសុទ្ធតែបាននាំគ្នាថ្កោលទោសការវាយប្រហារភេរវកម្មកាលពីម្សិលមិញ។ មេដឹកនាំសហគមន៍អ្នកកាន់សាសន៍អ៊ីស្លាម នៅប៊ុលហ្ការីក៏បានថ្កោលទោសការវាយប្រហារនេះដែរ។ លោកអូបាម៉ាបានសន្យាថានឹងជួយអ៊ីស្រាអែល ក្នុងការស៊ើបអង្កេតវែកមុខរកអ្នកទទួលខុសត្រូវក្នុងការវាយប្រហារនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ