ជម្លោះអ៊ីស្រាអែល-ប៉ាឡេស្ទីន ៖ អ៊ីស្រាអែលខោកផង អង្អែលផង !
ចុះផ្សាយនៅថ្ងៃ៖
ស្តាប់ - ០៤:១៥
ខណៈដែលប្រមុខការទូតអាមេរិក លោក ចន ឃែរី ត្រូវអញ្ជើញមកដល់ជាថ្មីតំបន់ដើមបូព៌ា នៅថ្ងៃពុធស្អែក ដើម្បីទ្រទ្រង់ដំណើរការចរចាសន្តិភាពជាមួយប៉ាឡេស្ទីន អ៊ីស្រាអែលបានបញ្ចេញខ្យល់ត្រជាក់ផង ក្តៅផង ! ជាមួយនឹងការដោះលែងអ្នកទោសប៉ាឡេស្ទីន២៦នាក់ នៅយប់ថ្ងៃចន្ទនេះ រដ្ឋាភិបាលអ៊ីស្រាអែលបានអនុម័តគម្រោងច្បាប់កាត់យកតំបន់ជ្រលងភ្នំហ្ស័កដង់ដែលប៉ាឡេស្ទីនចង់ប្រើជាព្រំប្រទល់នៅពេលបង្កើតរដ្ឋឯករាជ្យ ជាទឹកដីរបស់អ៊ីស្រាអែល។
ថ្ងៃចន្ទទី ៣០ ធ្នូនេះ អ៊ីស្រាអែលត្រូវដោះលែងអ្នកទោសប៉ាឡេស្ទីន ចំនួន២៦នាក់ ស្របតាមគោលការណ៍ចរចាសន្តិភាព ដែលទើបចាប់ផ្តើមឡើងវិញកាលពីរដូវក្តៅ។ ជាការដោះលែងវគ្គទីបី ហើយជាពិសេសប្រព្រឹត្តទៅក្នុងខណៈដែលលោកប្រមុខការទូតអាមេរិក ចន ឃែរី ត្រូវអញ្ជើញមកធ្វើទស្សនកិច្ចមួយជុំនៅតំបន់ដើមបូព៌ា ដើម្បីផ្តល់សន្ទុះដល់ដំណើរការចរចាសន្តិភាពអ៊ីស្រាអែលនិងប៉ាឡេស្ទីនដ៏ផុយស្រួយ ឱ្យដើរទៅមុខ។
លោករដ្ឋមន្ត្រីការបរទេសអាមេរិក ដែលតាំងពីទទួលតំណែងប្រមុខការទូតមកយកវិបត្តិអ៊ីស្រាអ៊ែលជាអាទិភាពចម្បងមួយ និងបានធ្វើដំណើរទៅចុះឡើងអ៊ីស្រាអែល ១០លើកហើយ បើគិតទាំងជើងនេះទៀត។ ការខិតខំប្រឹងប្រែងរបស់លោក ចន ឃែរី មកដល់ត្រឹមណេះ អាចចាត់ទុកមិនខាតបង់ទេ។ ហើយការចរចា ដោយផ្ទាល់រវាងអ៊ីស្រាអែល និងប៉ាឡេស្ទីន ហាក់មានដំណើរការទៅមុខ ព្រោះប្រមុខរដ្ឋាភិបាលអ៊ីស្រាអែល លោក នេតានយ៉ាហ៊ូ បានព្រមព្រៀងឱ្យមានការដោះលែងអ្នកទោសប៉ាឡេស្ទីនចំនួន១០៤នាក់ ជាដំណាក់ៗ ម្តងមួយក្រុមៗ ទៅតាមភាពជឿនលឿននៃការចរចា ឥលូវប្រព្រឹត្តទៅបានបីវគ្គហើយ។
បើក្រលេកមួយភ្លែត ការដោះលែងអ្នកទោសប៉ាឡេស្ទីនល្ងាចមិញ ជាវគ្គទីបី អាចចាត់ទុកថាជាសញ្ញាវិជ្ជមានពិសេស ព្រោះការដោះលែងនេះបានទទួលការព្រមព្រៀង និងសម្រេចពីតុលាការកំពូលផង បើទោះបីគ្រួសារជនរងគ្រោះអ៊ីស្រាអែលមិនពេញចិត្ត គ្រោងនឹងធ្វើបណ្តឹងឧទ្ធរណ៍យ៉ាងណាក៏ដោយ (អ្នកទោសប៉ាឡេស្ទីនសុទ្ធសឹងជាអ្នកបានបង្កភេរវកម្មផ្តាច់ជីវិតបណ្តាអ៊ីស្រាអែល និងកាត់ទោសមុនកិច្ចព្រមព្រមព្រៀងអូស្លូ ឆ្នាំ១៩៩៣)។ ភាគីប៉ាឡេស្ទីនរីករាយ លោកប្រមុខដែនដីប៉ាឡេស្ទីន គ្រោងនឹងទទួលស្វាគមន៍អ្នកទោសនោះដោយផ្ទាល់ផង។
ប៉ុន្តែការដោះលែងអ្នកទោស ដែលរដ្ឋាភិបាលអ៊ីស្រាអែលបានសន្យាធ្វើ និងកំពុងធ្វើ ក្នុងក្របខ័ណ្ឌដំណើរការចរចាសន្តិភាព ផ្តួចផ្តើមដោយសហរដ្ឋអាមេរិក មិនប្រាកដថានឹងនាំការចរចាឱ្យផ្លូវដើររួមគ្នាឡើយ ព្រោះជាមួយនឹងការរៀបចំដោះលែងអ្នកទោស គណៈរដ្ឋមន្ត្រីអ៊ីស្រាអែល ទើបអនុម័តគម្រោងច្បាប់មួយ បញ្ចូលតំបន់ជ្រលងភ្នំហ្ស័កដង់ ជាទឹកដីរបស់អ៊ីស្រាអែល ហើយត្រផមបញ្ជូនគម្រោងច្បាប់នេះទៅកាន់សភាអនុម័តទៀត។ តំបន់ជ្រលងភ្នំហ្ស័កដង់ត្រោយខាងស្តាំ ដែលខណ្ឌចែកទឹកដីអ៊ីស្រាអែល -ប៉ាឡេស្ទីន ពីប្រទេសហ្ស័កដានីដោយទន្លេ ស្ថិតនៅប៉ែកខាងលិចតំបន់ស៊ីហ្ស័កដានី និងដែលប៉ាឡេស្ទីនចង់យកមកធ្វើជាព្រំដែននៅពេលមានរដ្ឋឯករាជ្យ។
សេចក្តីសម្រេចចិត្តរបស់គណៈរដ្ឋមន្ត្រីអ៊ីស្រាអែលនេះ ប្រៀបដូចជាយកសាំងមកចាក់លើភ្លើង ! សូម្បីតែក្នុងជួរអ៊ីស្រាអែល អ្នកដែលមាននិន្នាការមិនតឹងជ្រុល ឬអ្នកកណ្តាលនិយមក៏បានបញ្ចេញប្រតិកម្មយ៉ាងពុះកញ្ជ្រោលដែរ។ ក្រុមកណ្តាលនិយមអ្នកដឹកនាំការចរចាជាមួយប៉ាឡេស្ទីន សន្យាធ្វើយ៉ាងមិនសភាអនុម័តគម្រោងច្បាប់ដាក់តំបន់ជ្រលងភ្នំហ្ស័កដង់ជាទឹកដីអ៊ីស្រាអែល ទោះបីមានកិច្ចព្រមព្រៀងជាមួយប៉ាឡេស្ទីនទៅថ្ងៃក្រោយយ៉ាងណាក៏ដោយ។ គម្រោងច្បាប់នេះ ស្នើឡើងដោយក្រុមស្តាំនិយម Likoud និងក្រុមជាតិនិយមជ្រុល ក្នុងជួររដ្ឋាភិបាលរបស់លោកនេតាន់យ៉ាហ៊ូ។
ចំណែកខាងប៉ាឡេស្ទីនវិញ សេចក្តីប្រកាសនេះ គឺដូចជាការបិទបញ្ចប់កិច្ចខិតខំប្រឹងប្រែងស្វែងរកសន្តិភាព។ លើសពីនេះទៅទៀត វិបត្តិអាចនឹងកាន់តែរីកធំធាត់ខ្លាំងទៅវិញព្រោះប៉ាឡេស្ទីនអាចនឹងជ្រើសរើសការប្តឹងផ្តល់ទៅតុលាការអន្តរជាតិផង។ ហេតុអ្វីប្រធានបទទឹកដីតំបន់នេះរសើបខ្លាំងយ៉ាងនេះ ?! ពីព្រោះដែនដីនេះ ត្រូវបានប៉ាឡេស្ទីន ទាមទារយកមកធ្វើតំបន់ព្រំដែន ខណ្ឌចែកប្រទេសប៉ាឡេស្ទីននាពេលអនាគត ចំណែកអ៊ីស្រាអែល សុំត្រឹមដាក់វត្តមានទ័ពឱ្យឈរជើងក្នុងតំបន់នោះ ក្រោយមានកិច្ចព្រមព្រៀង។ ដោយសារជំហរនេះ ទើបចេះតែធ្វើមានដំណើរការចរចាសន្តិភាពរវាងគ្នាជាបន្តបន្ទាប់មក ពោលគឺអ៊ីស្រាអែលមិនដែលនិយាយសោះឡើយពីការរាប់បញ្ចូលជាទឹកដីខ្លួន ដូចពួកអ្នកស្តាំនិយមអ៊ីស្រាអែលទាមទារនៅពេលនេះទេ។ ប៉ាឡេស្ទីនពិតជាមិនអាចទទួលយកគម្រោងច្បាប់បញ្ចូលតំបន់ជ្រលងភ្នំហ្ស័កដង់ជារបស់អ៊ីស្រាអែលបានឡើយ ហើយពិសេសទៅទៀតនៅប៉ុន្មានខាងមុខនេះ ទំនងជាមានការបញ្ជាក់ព័ត៌មានលើគម្រោងមួយទៀត គឺគម្រោងសាងសង់គេហដ្ឋានចំនួន១៤០០ខ្នងបន្ថែម ក្នុងតំបន់អាណានិគមកិច្ចអ៊ីស្រាអែល។ ទម្រង់ថ្មីមួយបែបទៀត សម្រាប់បង្កហេតុ បង្ករឿងបង្អាក់ការចរចាសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ