ប្រធានរដ្ឋអំណាចប៉ាឡេស្ទីនទាត់ចោលគំរោងអាមេរិកស្តីពីវត្តមានទ័ពអ៊ីស្រាអែល
នៅថ្ងៃសុក្រនេះ ក្នុងដំណើរទស្សនកិច្ចនៅដើមបូព៌ា ប្រមុខការទូតអាមេរិក ចន ឃែររី ហាក់ពិបាកនឹងជួយអោយដំណើរការចរចាសន្តិភាពរវាងអ៊ីស្រាអែល និងប៉ាឡេស្ទីនបានលូតលាស់ទៅមុខណាស់។ នៅថ្ងៃព្រហស្បតិ៍ម្សិលមិញ ប្រធានរដ្ឋអំណាចប៉ាឡេស្ទីន លោកម៉ាមូឌ អាបាស បានទាត់ចោលគំរោងរដ្ឋាភិបាលអាមេរិកស្តីពីវត្តមានទាហានអ៊ីស្រាអែល ក្រោយពេលដែលកិច្ចព្រមព្រៀងសន្តិភាពត្រូវបានសំរេចចេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
នៅថ្ងៃព្រហស្បតិ៍កន្លងទៅ ប្រធានរដ្ឋអំណាចប៉ាឡេស្ទីន លោកម៉ាមូឌ អាបាស បានទាត់ចោលគំរោងរដ្ឋាភិបាលអាមេរិកទាក់ទងនឹងការពន្យារវត្តមានកងទ័ពអ៊ីស្រាអែល នៅស៊ីហ្ស៊កដានី ពេលដែលកិច្ចព្រមព្រៀងសន្តិភាពត្រូវបានសំរេចឡើង។ គំរោងដែលប្រមុខការទូតអាមេរិក ចន ឃែររី បានស្នើឡើងនោះ ចែងពីការធានាសុវត្ថិភាពសន្តិសុខព្រំដែននៃអនាគតរដ្ឋប៉ាឡេស្ទីន។
យោងតាមសារព័ត៌មានអារ៉ាប់ និងសារព័ត៌មានអ៊ីស្រាអែល អាមេរិកបានស្នើអោយមានវត្តមានកងទ័ពអ៊ីស្រាអែល នៅព្រំដែនចន្លោះស៊ីហ្ស៊កដានី និងប្រទេសហ្ស៊កដានី ក្នុងរយៈពេល១៥ឆ្នាំ បើទោះជាកិច្ចព្រមព្រៀងសន្តិភាពរវាងអ៊ីស្រាអែលនិងប៉ាឡេស្ទីន ត្រូវបានសំរេចរួចហើយក្តី។ អាមេរិកក៏មានបំណងបង្ហាញពីកិច្ចព្រមព្រៀងក្របខណ្ឌមួយ សំរាប់ដំណោះស្រាយចុងបញ្ចប់ផងដែរ។
យោងតាមប្រភពប៉ាឡេស្ទីន លោកអាបាសបានទាត់ចោលគំរោងធានាសន្តិសុខស្នើឡើងដោយអាមេរិក ដោយសារតែគំរោងនេះគ្មានចែងពីភាគីទី៣។ គួរបញ្ជាក់ថា ប្រធានរដ្ឋអំណាចប៉ាឡេស្ទីន បានទទួលយកខ្លឹមសារលិខិតរបស់លោក ចេម ជន ដែកជាអតីតទីប្រឹក្សាសន្តិសុខអាមេរិក។ លិខិតលោកចេម ជន គ្រោងអោយមានវត្តមានកងទ័ពភាគីទី៣ នៅព្រំដែនភាគខាងកើតប៉ាឡេស្ទីន។ ពោលអោយចំ ប៉ាឡេស្ទីន បដិសេធវត្តមានកងទ័ពអ៊ីស្រាអែល ប៉ុន្តែ ទទួលយកវត្តមានកងទ័ពអន្តរជាតិ ក្នុងទឹកដីខ្លួន។ អ៊ីស្រាអែលបានទាត់ចោលនូវគោលគំនិតដាក់ពង្រាយកងទ័ពអន្តរជាតិនេះ។
ប្រភពប៉ាឡេស្ទីនដដែលបានលើកឡើងថា ប្រធានរដ្ឋអំណាចប៉ាឡេស្ទីន បានប្រគល់លិខិតមួយច្បាប់ទៅអោយលោក ចន ឃែររី។ លិខិតនោះបង្ហាញពីជំហរប៉ាឡេស្ទីន និងកំណត់ពីបន្ទាត់ហាមឃាត់សំរាប់ប៉ាឡេស្ទីន ពិសេសការមិនទទួលស្គាល់ថាអ៊ីស្រាអែលជារដ្ឋរបស់ជនជាតិហ្ស៊ីហ្វ។ លោកអាបាសបានបញ្ជាក់ឡើងវិញ ពីភាពចាំបាច់ក្នុងការដោះស្រាយអោយបាននូវគ្រប់បញ្ហាជម្លោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ