អ៊ីស្រាអែលប្រកាសព្យួរគម្រោងសាងសង់លំនៅដ្ឋានក្នុងទឹកដីប៉ាឡេស្ទីន
ចុះផ្សាយនៅថ្ងៃ៖
ស្តាប់ - ០៤:០៧
កាលពីថ្ងៃអង្គារម្សិលមិញ រដ្ឋមន្រ្តីទទួលបន្ទុកលំនៅដ្ឋានអ៊ីស្រាអែល បានប្រកាសឲ្យដឹងពីគម្រោងសាងសង់លំនៅដ្ឋានសម្រាប់ជនជាតិជ្វីហ្វ ចំនួន ២ម៉ឺនកន្លែងបន្ថែមទៀត នៅក្នុងទឹកដីប៉ាឡេស្ទីន។ ក៏ប៉ុន្តែ ប៉ុន្មានម៉ោងក្រោយមក លោកបេនយ៉ាមីន នេតាន់យ៉ាហ៊ូ នាយករដ្ឋមន្រ្តីអ៊ីស្រាអែល បានចេញបញ្ជាមួយឲ្យផ្អាកគម្រោងនេះវិញ ក្រោយពីមានប្រតិកម្មពីអាជ្ញាធរប៉ាឡេស្ទីន និងសហរដ្ឋអាមេរិក។
កាលពីថ្ងៃអង្គារម្សិលមិញ ភ្លាមៗក្រោយពីមានការប្រកាសពីគម្រោងសាងសង់លំនៅដ្ឋានជនជាតិជ្វីហ្វ ចំនួន ២ម៉ឺនកន្លែង នៅក្នុងទឹកដីប៉ាឡេស្ទីន លោកម៉ះមូដ អាបាស់ បានព្រមានថា បើសិនជាអ៊ីស្រាអែលមិនលុបចោលគម្រោងនេះវិញទេ ការចរចាសន្តិភាព រវាងអ៊ីស្រាអែល និងប៉ាឡេស្ទីន នឹងត្រូវបញ្ចប់។ អាជ្ញាធរប៉ាឡេស្ទីនក៏បានព្រមានផងដែរថា នឹងដាក់ពាក្យបណ្តឹងទៅក្រុមប្រឹក្សាសន្តិសុខអ.ស.ប ដើម្បីតវ៉ាជំទាស់នឹងការពង្រីកអាណានិគមរបស់អ៊ីស្រាអែល ហើយក្នុងពេលជាមួយគ្នា ប៉ាឡេស្ទីននឹងចាប់ផ្តើមឡើងវិញ នូវនីតិវិធីសុំចូលជាសមាជិកអង្គការអន្តរជាតិមួយចំនួន ដើម្បីទទួលបានភាពស្របច្បាប់ជារដ្ឋឯករាជ្យ ដោយមិនឆ្លងកាត់ការចរចាជាមួយអ៊ីស្រាអែល។
►សូមអាន អ៊ីស្រាអែលនិងប៉ាឡេស្ទីនកំណត់ពេល ៩ខែ ដើម្បីចរចាឲ្យបានកិច្ចព្រមព្រៀង
ពីខាងអាមេរិកវិញ រដ្ឋាភិបាលរបស់លោកអូបាម៉ាក៏បានបញ្ចេញប្រតិកម្មភ្លាមៗដែរ ដោយអ្នកនាំពាក្យក្រសួងការបរទេសអាមេរិកបានលើកឡើងថា អាមេរិកមានការភ្ញាក់ផ្អើលចំពោះការប្រកាសពង្រីកលំនៅដ្ឋានជ្វីហ្វ នៅក្នុងទឹកដីប៉ាឡេស្ទីន ហើយទាមទារឲ្យមានការបកស្រាយពីសំណាក់រដ្ឋាភិបាលអ៊ីស្រាអែលអំពីរឿងនេះ។
សម្រាប់អាមេរិក ការប្រកាសសាងសង់លំនៅដ្ឋានបន្ថែមនៅក្នុងទឹកដីប៉ាឡេស្ទីនកាលពីម្សិលមិញនេះ វាប្រៀបបានដូចជាអ៊ីស្រាអែលកំពុងតែធ្វើផ្គើនអាមេរិក ពីព្រោះថា កាលពីថ្ងៃព្រហស្បតិ៍មុន លោកចន ឃែរី រដ្ឋមន្រ្តីការបរទេសអាមេរិក ទើបនឹងបានប្រាប់ទៅអ៊ីស្រាអែលថា អាមេរិកប្រឆាំងនឹងការសាងសង់លំនៅដ្ឋានជនជាតិជ្វីហ្វនៅក្នុងទឹកដីប៉ាឡេស្ទីន ហើយថា អ៊ីស្រាអែលត្រូវតែជ្រើសរើសថាតើចង់សង់លំនៅដ្ឋានបន្ថែម ឬចង់បានសុខសន្តិភាព?
ប្រឈមមុខនឹងសម្ពាធទាំងនេះហើយបានជាលោកនេតាន់យ៉ាហ៊ូចេញបញ្ជាឲ្យផ្អាកគម្រោងនេះទៅវិញ។
►សូមអាន ប្រវត្តិខ្លីនៃការធ្វើអាណានិគមកិច្ចអ៊ីស្រាអែលលើប៉ាឡេស្ទីន
នៅពេលចេញបទបញ្ជាឲ្យផ្អាកគម្រោងសាងសង់លំនៅដ្ឋាន ក្នុងទឹកដីប៉ាឡេស្ទីន លោកនេតាន់យ៉ាហ៊ូបានបញ្ជាក់ច្បាស់ៗថា ការប្រកាសសាងសង់លំនៅដ្ឋាន នៅក្នុងទឹកដីប៉ាឡេស្ទីន នៅពេលនេះ នឹងនាំឲ្យមានការប្រឈមមុខដាក់គ្នា រវាងអ៊ីស្រាអែល និងសហគមន៍អន្តរជាតិ នៅក្នុងពេលដែលអ៊ីស្រាអែលកំពុងតែបញ្ចុះបញ្ចូលសហគមន៍អន្តរជាតិឲ្យប្រយ័ត្នប្រយែងក្នុងការចរចាជាមួយអ៊ីរ៉ង់។
គួរបញ្ជាក់ថា បច្ចុប្បន្ននេះ អ៊ីស្រាអែលកំពុងតែស្ថិតក្នុងភាពឯកោស្រាប់ ក្នុងសំណុំរឿងនុយក្លេអ៊ែរអ៊ីរ៉ង់ ពីព្រោះ បណ្តាប្រទេសលោកខាងលិច រួមទាំងអាមេរិក ដែលជាសម្ព័ន្ធមិត្តធំបំផុតរបស់អ៊ីស្រាអែលផង កំពុងតែបន្ទន់ជំហរ ក្នុងការចរចាជាមួយអ៊ីរ៉ង់។ មានតែអ៊ីស្រាអែលទេដែលជំទាស់នឹងការចរចានេះ ដោយសារតែអ៊ីស្រាអែលបារម្ភខ្លាចកិច្ចចរចានេះឈានដល់ការចុះកិច្ចព្រមព្រៀង ដែលអាចឲ្យអ៊ីរ៉ង់បន្តកម្មវិធីនុយក្លេអ៊ែរតទៅទៀត។
អ៊ីស្រាអែលកំពុងតែត្រូវការអាមេរិក និងសហគមន៍អន្តរជាតិ ក្នុងការទប់ទល់ជាមួយអ៊ីរ៉ង់។ ដូច្នេះហើយបានជាលោកនេតាន់យ៉ាហ៊ូមិនចង់បង្កើតភាពតានតឹងថ្មីទៀត ក្នុងសំណុំរឿងប៉ាឡេស្ទីន ជាពិសេស អ៊ីស្រាអែលមិនចង់បង្កើតភាពតានតឹងណាមួយថ្មីទៀត ជាមួយនឹងរដ្ឋាភិបាលរបស់លោកអូបាម៉ា។
►សូមអាន អ៊ីស្រាអែលកំពុងបារម្ភពីយុទ្ធសាស្រ្តស្នេហារបស់អ៊ីរ៉ង់ចំពោះសហគមន៍អន្តរជាតិ
គេសង្កេតឃើញថា ចាប់តាំងពីលោកហាសាន់ រ៉ូហានី បានជាប់ឆ្នោតជាប្រធានាធិបតីអ៊ីរ៉ង់មក រដ្ឋាភិបាលរបស់លោកអូបាម៉ាបានបង្ហាញនូវជំហរទន់ភ្លន់ច្រើន ចំពោះអ៊ីរ៉ង់។ លោកអូបាម៉ាបានផ្តល់អាទិភាពខ្ពស់ទៅលើការចរចាតាមផ្លូវទូត ដើម្បីដោះស្រាយវិបត្តិនុយក្លេអ៊ែរអ៊ីរ៉ង់ ហើយត្រៀមខ្លួនក្នុងការបន្ធូរបន្ថយទណ្ឌកម្មលើអ៊ីរ៉ង់ ប្រសិនបើការចរចាក្នុងសំណុំរឿងអ៊ីរ៉ង់មានភាពជឿនលឿនទៅមុខ។
ការចរចា កាលពីចុងសប្តាហ៍មុន រវាងអ៊ីរ៉ង់ និងមហាអំណាចទាំង ៦ គឺសមាជិកអចិន្រ្តៃយ៍ទាំង ៥នៃក្រុមប្រឹក្សាសន្តិសុខ (អាមេរិក អង់គ្លេស បារាំង ចិន និងរុស្ស៊ី) បូកនឹងអាល្លឺម៉ង់ ត្រូវទទួលបរាជ័យ ក៏ប៉ុន្តែ គេគ្រោងនឹងបើកកិច្ចចរចាជាថ្មីទៀត នៅថ្ងៃទី២០វិច្ឆិកាខាងមុខ នៅទីក្រុងហ្សឺណែវ ប្រទេសស៊្វីស។
►សូមអាន ការចរចាស្តីពីនុយក្លេអ៊ែរអ៊ីរ៉ង់ត្រូវបរាជ័យជាថ្មី
កាលពីថ្ងៃអង្គារម្សិលមិញនេះ រដ្ឋាភិបាលរបស់លោកអូបាម៉ាបានទាមទារឲ្យសភាអាមេរិកផ្អាករាល់គម្រោងអនុម័តទណ្ឌកម្មណាមួយថ្មីទៀតទៅលើអ៊ីរ៉ង់ ដោយបានព្រមានថា ប្រសិនបើសភាអនុម័តទណ្ឌកម្មបន្ថែមទៅលើអ៊ីរ៉ង់ ដំណោះស្រាយតាមផ្លូវទូតជាមួយអ៊ីរ៉ង់អាចនឹងត្រូវកាត់ផ្តាច់ ហើយវាអាចនឹងរុញច្រានអាមេរិកឲ្យធ្លាក់ទៅក្នុងសង្រ្គាមជាមួយនឹងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ