ក្រុមហាម៉ាសដែលចុះថយកម្លាំង យល់ព្រមទទួលបទឈប់បាញ់មនុស្សធម៌ ដែលស្នើឡើងដោយអេហ្ស៊ីប
ចុះផ្សាយនៅថ្ងៃ៖
ស្តាប់ - ០៧:៣៤
នៅថ្ងៃអង្គារ ទី ៥ សីហា ទ័ពជើងគោកអ៊ីស្រាអែលត្រូវបានដកចេញអស់ពី តំបន់ហ្កាហ្សា។ អ៊ីស្រាអែល និងក្រុមអ៊ីស្លាមហាម៉ាស ប៉ាឡេស្ទីនបានប្រកាសយល់ព្រមធ្វើបទឈប់បាញ់មនុស្សធម៌រយៈពេល៧២ម៉ោងដែលស្នើឡើងដោយអេហ្ស៊ីប កាលពីល្ងាចថ្ងៃចន្ទ ទី ៤ សីហា។ ទីក្រុងវ៉ាស៊ីនតោន និងអង្គការសហប្រជាជាតិបានអបអរដំណឹងនេះ និងបានស្នើឲ្យភាគីជម្លោះទាំងពីរចរចាដើម្បីធានាសន្តិភាពរយៈពេលវែង។ បទឈប់បាញ់មនុស្សធម៌ធ្លាប់បានបរាជ័យ ម្តងជា ពីរដង។ កាលពី៥ថ្ងៃមុន ភាគីទាំងពីរក៏បានព្រមព្រៀងគ្នាបង្កើតបទឈប់បាញ់ ប៉ុន្តែ បទឈប់បាញ់ត្រូវគេរំលោភ នៅតែប៉ុន្មានម៉ោងក្រោយ ចូលជាធរមាន ដោយទាំងភាគីអ៊ីស្រាអែល និងក្រុមហាម៉ាសប៉ាឡេស្ទីនបានចោទដាក់គ្នាទៅវិញ ទៅមក ថា ជាអ្នកបាញ់ រំលោភបទឈប់បាញ់។
បទឈប់បាញ់ដែលស្នើឡើងដោយមេដឹកនាំអេហ្ស៊ីប ត្រូវបានភាគីអ៊ីស្រាអែល និងក្រុមហាម៉ាសដែលគ្រប់គ្រងតំបន់ហ្កាហ្សា ប្រកាសទទួល និងចូលជាធរមាន នៅថ្ងៃអង្គារ។ ប៉ុន្តែ សួរថា តើបទឈប់បាញ់នៅថ្ងៃនេះ អាចមានរយៈពេលវែង គ្រប់បីថ្ងៃដែរឬទេនោះ គឺគ្មាននរណាដឹងច្បាស់ទេ សូម្បីភាគីអ៊ីស្រាអែល ឬក្រុមហាម៉ាស។ ដូចលើកមុនៗ ភាគីទាំងសងខាងបានបញ្ជាក់ជំហររឹងមាំរៀងៗខ្លួនថា ពួកគេនឹងប្រឆាំងតបវិញ បើសិនមានការវាយប្រហារពីភាគីជម្លោះ។
បទឈប់បាញ់កាលពីថ្ងៃសុក្រទី ១ សីហាត្រូវបានរំលោភ បន្ទាប់ពីអ៊ីស្រាអែល បានបើកការវាយប្រហារទៅលើក្រុមហាម៉ាស ដែលអ៊ីស្រាអែលចោទថា បានបាញ់រ៉ុកកែត និងបានចាប់ខ្លួនទាហានម្នាក់របស់ខ្លួន។
បទឈប់បាញ់មនុស្សធម៌រវាងអ៊ីស្រាអែល និងក្រុមហាម៉ាសនៅតែមានលក្ខណៈផុយស្រួយ ព្រោះថា គូបដិបក្សទាំងពីរនៅតែមិនទុកចិត្តគ្នា។ លើកនេះ អ៊ីស្រាអែលបានប្រកាសដកទ័ពចេញតំបន់ហ្កាហ្សាមែន ប៉ុន្តែ អ៊ីស្រាអែលនៅតែបន្តពង្រាយទ័ពថ្មើរជើងរបស់ខ្លួន នៅតាមព្រំដែនអ៊ីស្រាអែលជាមួយតំបន់ហ្កាហ្សា ពោលគឺត្រៀមវាយបកវិញ ក្នុងករណីក្រុមហាម៉ាសរំលោភបទឈប់បាញ់។
នៅប៉ុន្មាននាទីមុនបទឈប់បាញ់ចូលជាធរមាន ក៏ក្រុមហាម៉ាសឆ្លៀតបាញ់រ៉ុកកែត ទៅលើទីក្រុងតែលអាវីវ របស់អ៊ីស្រាអែល។ អ៊ីស្រាអែលដែលប្រើយន្តហោះចម្បាំងវាយប្រហារតបវិញភ្លាម។
ក្រុមហាម៉ាសព្រមទទួលយកបទឈប់បាញ់ដែលខ្លួនធ្លាប់រុញច្រានចោល កាលពី បីសប្តាហ៍មុន
កាលពីថ្ងៃទី ១៥ កក្កដា ពោលគឺនៅមួយសប្តាហ៍ក្រោយអ៊ីស្រាអែលបើកការវាយប្រហារទ័ពអាកាសទៅលើតំបន់ហ្កាហ្សា អេហ៊្សីបបានចូលធ្វើអាជ្ញាកណ្តាលសម្របសម្រួលឲ្យមានបទឈប់បាញ់មួយជាបន្ទាន់ ដើម្បីប្រយោជន៍អាយុជីវិតរបស់ប្រជាជនប៉ាឡេស្ទីន។ ប៉ុន្តែ កាលណោះ ក្រុមហាម៉ាស និងដៃគូរបស់ខ្លួន គឺក្រុមអ៊ីស្លាមជីហាតនៅប៉ាឡេស្ទីនបានរុញច្រានចោល ព្រោះគេអាងថា បទឈប់បាញ់ធ្វើឡើងដោយគ្មានដាក់បញ្ចូលរាល់ការទាមទាររបស់ក្រុមហាម៉ាស។ ក្រុមហាម៉ាសបានទាមទារថា ដើម្បីបង្កើតបទឈប់បាញ់ អ៊ីស្រាអែលត្រូវដកបម្រាម ដែលអ៊ីស្រាអែលធ្លាប់បានប្រើដើម្បីបិទខ្ទប់តំបន់ហ្កាហ្សា តាំងពីឆ្នាំ ២០០៦។ ទីពីរគឺអ៊ីស្រាអែលត្រូវដោះលែងអ្នកទោសប៉ាឡេស្ទីន។
កាលពីបីសប្តាហ៍មុន នៅមួយអាទិត្យ ក្រោយអ៊ីស្រាអែលបើកការវាយប្រហារ ក្រុមហាម៉ាសបានសំដី ហ៊ានរុញច្រានចោលបទឈប់បាញ់ ដែលគ្មានលក្ខខណ្ឌ ព្រោះតែក្រុមនេះ នៅមានកម្លាំងប្រយុទ្ធនៅឡើយ។ ប៉ុន្តែ នៅមួយខែក្រោយរងការវាយប្រហារយ៉ាងចាស់ដៃពីអ៊ីស្រាអែល ក្រុមហាម៉ាសបានចុះទ្រោមខ្លួន ខូចខាតទាំងកម្លាំងទ័ព ហេដ្ឋារចនាសម្ព័ន្ធ និងបាត់បង់ជីវិតប្រជាជនប៉ាឡេស្ទីន ដែលរហូតមកដល់ពេលនេះត្រូវគេស្រង់ឃើញច្រើនជាង ១៨០០នាក់។
នៅភាគីអ៊ីស្រាអែលវិញ នៅមួយខែក្រោយប្រតិបត្តិការសឹក គាស់រំលើងរូងក្រោមដីនៅក្នុងតំបន់ហ្កាហ្សា កងទ័ពអ៊ីស្រាអែលបានបង្ហាញមុខក្នុងនាមជាអ្នកឈ្នះ។ ដោយឯកតោភាគី គឺនៅមុនពេលប្រកាសទទួលយកបទឈប់បាញ់ទៅទៀត អ៊ីស្រាអែលបានសម្រេចដកទ័ពជើងគោកចេញពីតំបន់ហ្កាហ្សា នោះក៏ដោយមកពីអ៊ីស្រាអែលបានសម្រេចគោលដៅ របស់ខ្លួន ក្នុងការបំផ្លាញរូងក្រោមដីរបស់ក្រុមហាម៉ាស។ តាមទាហានអ៊ីស្រាអែល នៅក្នុងរយៈពេលមួយខែ ទ័ពអ៊ីស្រាអែលបានបំផ្លាញរូងក្រោមដីរបស់ក្រុមហាម៉ាសជាង៣០ បំផ្លាញមីស៊ីលជាង ៣ពាន់ដើម និងបានសម្លាប់ភេរវករ ប្រមាណ ៩០០នាក់។ ជាមួយនឹងជ័យជំនះរបស់ខ្លួន អ៊ីស្រាអែលបានទទួលយកបទឈប់បាញ់ស្នើដោយអេហ្ស៊ីប ដោយគ្មានអល់អែក គឺខុសពីក្រុមហាម៉ាសដែលចូលមកចរចាក្នុងនាមជាអ្នកចាញ់។
គេនៅតែមើលមិនឃើញច្រកផ្លូវរកសន្តិភាពឲ្យប៉ាឡេស្ទីន អ៊ីស្រាអែល
តាំងពីនៅមុនពេល គណៈប្រតិភូអ៊ីស្រាអែលចេញដំណើរទៅចរចានៅថ្ងៃនេះ នៅក្រុងគែរ ភាគីអ៊ីស្រាអែលបានបញ្ជាក់ជំហររបស់ខ្លួនរួចហើយ ប្រឆាំងមិនទទួលយកការទាមទាររបស់ក្រុមហាម៉ាស។ ក្រុមហាម៉ាសបានទាមទារឲ្យអ៊ីស្រាអែលលើកបម្រាមបិទខ្ទប់ ទៅលើតំបន់ហ្កាហ្សា និងដោះលែងអ្នកទោសប៉ាឡេស្ទីនដែលជាក្រុមសកម្មជនរបស់ខ្លួន។ អ៊ីស្រាអែលមិនអាចទទួលយកការទាមទាររបស់ក្រុមហាម៉ាស ដោយខ្លាចថា ការបើកច្រក លែងបិទខ្ទប់ទៅលើតំបន់ហ្កាហ្សា នឹងធ្វើឲ្យមានចលនាប្រដាប់អាវុធ ដែលចិញ្ចឹមចិត្តមានអារិភាព បាញ់គ្រាប់រ៉ុកកែតទៅលើអ៊ីស្រាអែល។
រដ្ឋាភិបាលអ៊ីស្រាអែលវិញចង់ឲ្យអេហ្ស៊ីបជាអ្នកទទួលខុសត្រូវលើរឿងបើកច្រកហ្កាហ្សា ដែលនៅជាប់ជាមួយព្រំដែនអេហ្ស៊ីប ត្រង់តំបន់ស៊ីណៃ។ អេហ្ស៊ីបពិបាកនឹងទទួលយកសំណើនេះ ព្រោះអេហ្ស៊ីបដែលមិនចង់ឲ្យ ក្រុមភាតរអ៊ីស្លាម ដែលជាសត្រូវរបស់ខ្លួន ប៉ុន្តែ ជាអ្នកគាំទ្រ ក្រុមហាម៉ាសប្រើច្រកនេះ ដើម្បីបង្កើតកម្លាំងវាយប្រហារលើអំណាចរបស់ខ្លួន។ មួយវិញទៀត ក្នុងហេតុផលសន្តិសុខផ្ទាល់ខ្លួន អ៊ីស្រាអែល ចង់ឲ្យតំបន់ហ្កាហ្សា គ្មានអាវុធ គ្មានចលនាប្រដាប់អាវុធ ដែលសំណើនេះត្រូវក្រុមហាម៉ាសបដិសេធ រុញច្រានចោលទាំងស្រុង។
នៅតំបន់ហ្កាហ្សា បើទោះបីជាក្រុមហាម៉ាសធ្លាក់ចុះខ្សោយ ប៉ុន្តែ ក្រុមនេះនៅតែមានការគាំទ្រពីប្រជាជនប៉ាឡេស្ទីន។ ប្រជាជនប៉ាឡេស្ទីនខ្លះមិនខ្លាចនឹងគាំទ្រឲ្យក្រុមហាម៉ាសបាញ់គ្រាប់រ៉ុកកែតទៅលើទឹកដី អ៊ីស្រាអែល ដើម្បីបង្ហាញពីការទាមទារ មិនពេញចិត្តនឹងនយោបាយបិទខ្ទប់របស់អ៊ីស្រាអែល។ នៅហ្កាហ្សា ក្រុមហាម៉ាសមានបណ្តាញចាក់ចូលជ្រៅទៅក្នុងគ្រួសារប៉ាឡេស្ទីន។
ការវាយប្រហាររបស់អ៊ីស្រាអែល ធ្វើឲ្យកម្លាំងប្រដាប់អាវុធរបស់ក្រុមហាម៉ាសចុះខ្សោយ ប៉ុន្តែ ដោយសារវានឹងធ្វើចលនាស្អប់អ៊ីស្រាអែលមួយនេះ នឹងមានប្រជាប្រិយភាពកាន់តែខ្លាំង ក្នុងចំណោមប្រជាជនប៉ាឡេស្ទីន។ ក្រុមហាម៉ាសមិនពិបាកនឹងប្រមូលយុវជនប៉ាឡេស្ទីនឲ្យចូលរួមនៅក្នុងចលនារបស់ខ្លួនដើម្បីប្រឆាំងនឹងអ៊ីស្រាអែលទេ។ ដោយសារតែការទាមទារសុទ្ធតែមិនអាចទទួលយកបានពីភាគីទាំងសងខាង គេពិបាកនឹងជឿថា សន្តិភាពនឹងអាចកើតមាននៅដើមបូព៌ា ជាពិសេស រវាងអ៊ីស្រាអែល និងប្រជាជនប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ