អ៊ីស្រាអែល-ប៉ាឡេស្ទីន ៖ កិច្ចព្រមព្រៀងឈប់បាញ់បឋម៧២ម៉ោងស្លាប់មុនកើត !
ចុះផ្សាយនៅថ្ងៃ៖
ស្តាប់ - ០៦:២៦
បទឈប់បាញ់មនុស្សធម៌ ៧២ម៉ោង បានចូលជាធរមាន នៅព្រឹកថ្ងៃសុក្រទី ១សីហា វេលាម៉ោង ៥ភ្លឺម៉ោងសកល នៅតំបន់ហ្កាហ្សា។ គិតក្នុងរយៈពេល២៤ថ្ងៃ នៃការប្រយុទ្ធគ្នារវាងអ៊ីស្រាអែលនិងចលនាហាម៉ាសប៉ាឡេស្ទីនមក នេះគឺជាលើកទីមួយ ដែលភាគីជម្លោះ អ៊ីស្រាអែល និងហាម៉ាស បានព្រមព្រៀងគ្នាឈប់បាញ់យ៉ាងដូច្នេះ។ ការឈប់បាញ់ ស្នើឡើងដោយសហរដ្ឋអាមេរិក និងអង្គការសហប្រជាជាតិនេះ មានបន្តអមដោយការចរចា ដើម្បីឈានដល់ការព្រមព្រៀងឈប់បាញ់យូរអង្វែង បិទបញ្ចប់ភាពស្អប់ខ្ពើមគ្នា។ កិច្ចពិភាក្សានឹងត្រូវចាប់ផ្តើម និងប្រព្រឹត្តទៅនៅទីក្រុងគែរ ប្រទេសអេហ្ស៊ីប នៅថ្ងៃសុក្រនេះ តែទំនងជាត្រូវលើកពេលទៅវិញ ហើយហេតុមានការរំលោភបទឈប់បាញ់។
បន្ទាប់ពីប្រយុទ្ធគ្នាអស់២៥ថ្ងៃ បទឈប់បាញ់មនុស្សធម៌បីថ្ងៃ បានចាប់ផ្តើមហើយនៅតំបន់ដើមបូព៌ា។ ភាគីជម្លោះទាំងពីរ អ៊ីស្រាអែល និងហាម៉ាស បានព្រមព្រៀងទទួលយកសំណើរួមគ្នារបស់អគ្គលេខាធិការអង្គការសហប្រជាជាតិ លោក បានគីមូន និងលោក ចន ឃែរី រដ្ឋមន្ត្រីការបរទេសអាមេរិក នៅអាធ្រាត្រយប់មិញ។ ហើយគឺលោក ចន ឃែរី ផ្ទាល់តែម្តងជាអ្នកប្រកាសបទឈប់បាញ់៧២ម៉ោងនេះ ពីប្រទេសឥណ្ឌា។
សម្រាកឈប់បាញ់បីថ្ងៃ
ការសម្រាកប្រយុទ្ធបីថ្ងៃ ដើម្បីបុព្វហេតុមនុស្សធម៌ គឺជាឱកាសដែលជនស៊ីវិលអាចចេញស្វែងរកស្បៀងអាហារផង និងជាឱកាសសម្រាប់មន្ទីរពេទ្យជម្លៀសអ្នករបួស និងរកថ្នាំសង្កូវមកបន្ថែម។
ប៉ុន្តែបើតាមសេចក្តីថ្លែងការណ៍របស់អគ្គលេខាធិការអង្គការសហប្រជាជាតិ និងប្រមុខការទូតអាមេរិក ក្នុងរយៈពេលសម្រាកឈប់បាញ់៧២ម៉ោងនេះ ទាហានអ៊ីស្រាអែល មិនបានដកទ័ពចេញពីទីតាំងប្រយុទ្ធទេ គឺស្ថិតនៅឈរជើងក្នុងតំបន់ហ្កាហ្សាដដែល។ មិនតែប៉ុណ្ណោះ កងកម្លាំងអ៊ីស្រាអែល នៅតែបន្តប្រតិបត្តិការសមរភូមិក្រោយរហូត ពោលគឺបន្តវាយប្រហារកម្ទេចរូងក្រោមដីដែលពួកហាម៉ាស បានជីករូងសំដៅអ៊ីស្រាអែល។
រូងក្រោមដីប្រតិបត្តិការគ្មានថ្ងៃសម្រាក
រូងក្រោមដីនេះ មិនងាយរក និងមិនអាចមើលឃើញពីខាងអ៊ីស្រាអែលទេ ព្រោះវានៅក្រោមដី ហេតុដូច្នេះហើយបានជាទាហានអ៊ីស្រាអែល ត្រូវតែរុករកនៅក្នុងតំបន់ហ្កាហ្សា។ យោធាអ៊ីស្រាអែល បានបង្ហាញថាមានរូងខ្លះ មានច្រក-គេចោះរន្ធចេញចូល ពីក្នុងផ្ទះ ក្នុងវិហារ ក្នុងស្ថានីយ៍រថភ្លើង ... ទាហានអ៊ីស្រាអែល ត្រូវបន្តរុករកច្រកចូលរូងទាំងនោះ នៅតាមតំបន់ជាប់ព្រំប្រទល់ជាមួយអ៊ីស្រាអែល ពោលគឺពីភាគខាងជើង ដល់ភាគខាងលិចតំបន់ហ្កាហ្សា ត្រង់កន្លែងដែលរថក្រោះអ៊ីស្រាអែលទៅដល់។ ការរុករកប្រភពរូង អាចប្រើរយៈពេលពីរបីថ្ងៃ បន្ទាប់មកទើបទាហានដកទ័ពចេញ ដោយមានន័យថាប្រតិបត្តិការ “របងការពារ” នៅតំបន់ហ្កាហ្សារបស់អ៊ីស្រាអែលចប់។ ទន្ទឹមគ្នានេះ អ៊ីស្រាអែលក៏បើកប្រតិបត្តិការឆែកឆេរស្វែងរកអាវុធលាក់ នៅក្នុងតំបន់ដែលទាហានអ៊ីស្រាអែលវាយលុកដល់។
ក្រុមហាម៉ាស និងក្រុមយុទ្ធជនផ្សេងទៀតរបស់ប៉ាឡេស្ទីន ហាក់ទទួលយកផែនការនេះ។ ព្រោះម្យ៉ាងពួកគេហាក់ទន់ដៃ ក្រោយពីការវាយប្រហារយ៉ាងសន្ធាប់រយៈពេល២៤ម៉ោងចុងក្រោយនេះ។ ប៉ុន្តែគ្រប់ភាគី ទាំងអ៊ីស្រាអែល ទាំងប៉ាឡេស្ទីន ហាម៉ាស សុទ្ធតែបានព្រមានគ្នាទៅវិញទៅមក ថាប្រសិនបើខាងណាហ៊ានវាយមុន នឹងមានការវាយបកវិញភ្លាម។
យ៉ាងណាក៏ដោយ ក៏ការផ្អាកបាញ់គ្នាលើកនេះ មានរយៈពេលយូរបំផុត តាំងពីជម្លោះប្រដាប់អាវុធអ៊ីស្រាអែល-ហាម៉ាសបានផ្ទុះឡើងនៅថ្ងៃទី៨កក្កដា២០១៤ និងក៏មានលក្ខណៈផុយស្រួយបំផុតដែរ។ មុនបទឈប់បាញ់ចូលជាធរមាន ការប្រយុទ្ធគ្នាយ៉ាងសន្ធោសន្ធៅ មានបន្តរហូតដល់នាទីចុងក្រោយ ពេញមួយយប់ និងដល់ពេលព្រហាមថ្ងៃនេះតែម្តង ខាងអ៊ីស្រាអែល ស្លាប់ទាហាន៥នាក់ ខាងប៉ាឡេស្ទីន ១៤នាក់។
បទឈប់បាញ់ ចូលជាធរមានមិនបានប៉ុន្មានម៉ោងផង ស្នូរកាំភ្លើងបានលាន់ឡើងជាថ្មី ខាងប៉ាឡេស្ទីនចោទថា គ្រាប់ផ្លោងអ៊ីស្រាអែលបានសម្លាប់មនុស្សអស់ប្រមាណ៤០នាក់ តែខាងប្រភពអ៊ីស្រាអែលថាទាហានហាម៉ាសនិងក្រុមប្រដាប់អាវុធប៉ាឡេស្ទីនផ្សេងទៀតជាអ្នកចាប់ផ្តើមមុន។
កិច្ចចរចាឈប់បាញ់យូរអង្វែងនៅអេហ្ស៊ីប
ការឈប់បាញ់បីថ្ងៃនេះ គឺគ្រាន់តែជាការព្រមព្រៀងបឋមប៉ុណ្ណោះ។ ប្រមុខការទូតអាមេរិក ក៏បានប្រកាសរួចហើយ ថាការផ្អាកបាញ់នេះ មិនមែនជាដំណោះស្រាយទេ តែជាឱកាសល្អ ដែលគួរឆក់ឱ្យបានក្នុងការផ្តើមចរចាឈប់បាញ់ គ្មាននរណាអាចបង្ខំភាគីបក្សដិបក្សនេះបានឡើយ។ ក្រុងគែរ ត្រូវធ្វើជាម្ចាស់ផ្ទះទទួលប្រតិភូអ៊ីស្រាអែល និងប៉ាឡេស្ទីន នៅថ្ងៃនេះ ដើម្បីចាប់ផ្តើមកិច្ចចរចា ក្រែងបានសម្រេចកិច្ចព្រមព្រៀងឈប់បាញ់មួយ យូរអង្វែងជាងពេលនេះ។
សូមបញ្ជាក់ថាកាលពីមួយសប្តាហ៍មុន ភាគីជម្លោះបានច្រានចោលគំនិតផ្តួចផ្តើមឈប់បាញ់របស់ប្រមុខការទូតអាមេរិក។ ប៉ុន្តែមួយអាទិត្យក្រោយ អ៊ីស្រាអែលបានព្រមទទួលយកសំណើរបស់លោកចន ឃែរី និងលោក បាន គីមូន អគ្គលេខាធិការអង្គការសហប្រជាជាតិ។ សំណើឈប់បាញ់ ដោយគ្មានលក្ខខណ្ឌ។ ក្រុមហាម៉ាសក៏មិនទាមទារឱ្យអ៊ីស្រាអែលលើកការបិទខ្ទប់តំបន់ហ្កាហ្សាសិន មុននឹងទទួលយកបទឈប់បាញ់ដែរ។
បើមើលត្រឹមចំណុចពីរនេះ គេអាចសង្ឃឹមរកឃើញកិច្ចព្រមព្រៀងយូរអង្វែងបាន។ ប៉ុន្តែ ជំហររបស់ភាគីជម្លោះទាំងពីរ ផ្ទុយស្រឡះគ្នាទាំងស្រុង ជាហេតុធ្វើឱ្យគេពិបាកយល់ និងមើលមិនយល់ថាតើធ្វើដូចម្តេចអាចរកកិច្ចព្រមព្រៀងបញ្ចប់វិបត្តិបាន។ ខាងផ្ទៃក្នុងរដ្ឋាភិបាលអ៊ីស្រាអែលផ្ទាល់ក៏គ្មានការព្រមព្រៀងគ្នា។ បើតាមកាសែត Maariv លោកនាយករដ្ឋមន្ត្រី និងរដ្ឋមន្ត្រីការបរទេសអ៊ីស្រាអែល មិនស្តីរកគ្នា តាំងពីប្រតិបត្តិការយោធាចាប់ផ្តើមមក។
ចំណែករបស់សហគមន៍អន្តរជាតិ
ជម្លោះដើមបូព៌ានេះ គ្មានថ្ងៃដោះស្រាយ តាមផ្លូវយោធាទេ ! គឺមានតែតាមផ្លូវការទូត និងនយោបាយ។ សង្គ្រាមនៅហ្កាហ្សាបានផ្ទុះឡើងបួនដងរួចមកហើយ ស្ទើរជារាល់ពីរឬបីឆ្នាំម្តង។ ជារៀងរាល់លើកតែងមានមហន្តរាយធ្ងន់ធ្ងរណាស់ មនុស្សស្លាប់រាប់រយ -រាប់ពាន់នាក់ របួសរាប់មិនអស់ ហ្កាហ្សាគ្មានទឹកគ្មានភ្លើង ... ការចរចាម្តងជាពីរដង បានជួបតែបរាជ័យ ! ការចរចាត្រឹមរកកិច្ចព្រមព្រៀងឈប់បាញ់ពិតជាមិនគ្រប់គ្រាន់ឡើយ គឺត្រូវការ កិច្ចព្រមព្រៀងសន្តិភាព។
អ្នកវិភាគជាច្រើនយល់ថា វិបត្តិអ៊ីស្រាអែល-ប៉ាឡេស្ទីន អូសបន្លាយ ក៏ព្រោះសហគមន៍អន្តរជាតិទាំងមូលខ្វះឆន្ទៈ និងភាពមុះមុតដាច់ខាត ក្នុងការជំរុញឱ្យប្រជាជាតិពីរនេះទទួលស្គាល់គ្នា និងរស់ក្បែរគ្នា។ មិនដឹងថាតើការទទួលស្គាល់ប៉ាឡេស្ទីនជារដ្ឋឯករាជ្យមួយពេញលេញ ជាសមាជិកប្រទេសក្នុងលោកនឹងគេឯង ពីសំណាក់អង្គការសហប្រជាជាតិ និងការទទួលស្គាល់វត្តមាន និងរដ្ឋអ៊ីស្រាអែល ពីសំណាក់ប្រទេសក្នុងពិភពអ៊ីស្លាម អាចជាដំណោះស្រាយនាំដល់សន្តិភាពយូរអង្វែងឬយ៉ាងណាទេ ប៉ុន្តែមុននឹងឈានដល់ដំណាក់កាលនោះ គេត្រូវការពេលវេលា និងការលះបង់ច្រើន ពីគ្រប់ភាគី និងពីសហគមន៍អន្តរជាតិទាំងមូលតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ