ជប៉ុនពង្រឹងមូលដ្ឋានទ័ពនៅលើកោះដែលស្ថិតនៅក្បែរចិន និងប្រជុំកោះសេនកាគូ
ចុះផ្សាយនៅថ្ងៃ៖
ស្តាប់ - ០៩:០១
កងទ័ពជប៉ុនបានពង្រីកវិស័យការពាររបស់ខ្លួនកាន់តែខ្លាំងនៅចុងសប្តាហ៍នេះ។ បន្ទាប់ពីសម្ពោធសាងសង់ស្ថានីយ៍រ៉ាដាយោធា នៅលើកោះយ៉ូណាហ្គូនី កាលពីថ្ងៃសៅរ៍ ក្រសួងការពារជប៉ុន នៅថ្ងៃអាទិត្យនេះបានបញ្ជូនយន្តហោះរ៉ាដាឲ្យទៅប្រចាំការនៅមូលដ្ឋានទ័ព នៅទីក្រុងណាហា ដែលស្ថិតនៅក្នុងកោះអូគីណាវ៉ា។ ជប៉ុនកំពុងពង្រឹងទ័ពរបស់ខ្លួន បន្ទាប់ពីសង្កេតឃើញចិនបង្កើនថវិកាយោធា និងបញ្ជូនកប៉ាល់ទៅក្បែរប្រជុំកោះសេនកាគូ ដែលប្រទេសទាំងពីរកំពុងឈ្លោះដណ្តើមគ្នា។ កាលពីដើមសប្តាហ៍នេះ ប្រធានាធិបតីចិនបានបញ្ជាឲ្យកងទ័ពការពារជាតិចិនបង្កើនសមត្ថភាព នៅផ្នែកដែនអាកាស និងអវកាស។
រដ្ឋមន្រ្តីជប៉ុនបានប្តេជ្ញា កាលពីថ្ងៃម្សិលមិញថា រដ្ឋាភិបាលជប៉ុននឹងការពាររាល់បណ្តាកោះរបស់ជប៉ុន បើទោះបីជាកោះនោះដាច់ស្រយាលក៏ដោយ។ តាមរដ្ឋមន្រ្តីជប៉ុន បើអាចទៅរួច ទៅថ្ងៃមុខ ជប៉ុនគ្រោងនឹងបង្កើនវត្តមានទ័ពរបស់ខ្លួន កាន់តែច្រើន នៅតាមកោះ ដែលស្ថិតនៅភាគនិរតីប្រទេស គឺក្បែរទៅរកទឹកដីចិន។ នៅក្នុងយុទ្ធសាស្រ្តពង្រឹងផ្នែកការពាររបស់ខ្លួន ជប៉ុនផ្តោត ទៅលើការដំឡើងប្រព័ន្ធរ៉ាដា នៅលើកោះ ខិតទៅរកចិន ដើម្បីតាមដានត្រួតពិនិត្យចរាចរណ៍ផ្លូវទឹក និងដែនអាកាស ដែលចិនពេលនេះក៏កំពុងបង្កើនសមត្ថភាព និងវត្តមានទ័ពរបស់ខ្លួនដែរ។
កាលពីថ្ងៃសៅរ៍ រដ្ឋមន្រ្តីការពារជប៉ុនបានទៅសម្ពោធសាងសង់ស្ថានីយ៍ រ៉ាដាយោធា នៅលើកោះយ៉ូណាហ្គូនី ដែលជាដីកោះដាច់ស្រយាលពីជប៉ុន ប៉ុន្តែ ស្ថិតនៅក្បែរកោះតៃវ៉ាន់ និងស្ថិតនៅប្រមាណតែ ១៥០គីឡូម៉ែត្រពីប្រជុំកោះសេនកាគូ ដែលជប៉ុនកំពុងឈ្លោះ ដណ្តើមជាមួយចិន។ ពីពេលនេះ ដល់ឆ្នាំ២០១៦ ទាហានជប៉ុនប្រមាណ១៥០នាក់នឹងត្រូវបញ្ជូនឲ្យទៅប្រចាំការនៅស្ថានីយ៍ រ៉ាដា លើកោះ យ៉ូណាហ្គូនី ដែលរហូតមកដល់ពេលនេះ ត្រូវការពារដោយប៉ូលិសតែពីរនាក់គត់។
តាមអ្នកជំនាញផ្នែកយោធាជប៉ុន ជប៉ុនកំពុងពង្រីកផ្នែកត្រួតពិនិត្យយោធា របស់ខ្លួន ឲ្យកាន់តែមានប្រសិទ្ធិភាព នៅតំបន់ដែលក្បែរទៅរកទឹកដីចិន។ ប្រព័ន្ធរ៉ាដារបស់ជប៉ុននឹងអាចចាប់បានរាល់សញ្ញា ទីតាំងរបស់មីស៊ីល និងរាល់ចលនាសកម្មភាពរបស់កងទ័ពចិន។ នៅក្នុងមួយឆ្នាំចុងក្រោយ នេះ គឺគ្មានសឹងលោះថ្ងៃ ដែលកប៉ាល់ល្បាតជប៉ុន ឧស្សាហ៍ជួបប្រទះ ឬ ដេញកប៉ាល់យោធាចិន ដែលបើកឆ្វែលចូលបើកចូលទៅជិតប្រជុំកោះ សេនកាគូដែលជប៉ុនគ្រប់គ្រង និងទិញជាសម្បតិ្តរបស់ជាតិជប៉ុន។
កាលពីថ្ងៃអាទិត្យ ក្រសួងការពារជាតិជប៉ុនទើបបញ្ជូនយន្តហោះប្រភេទតាមដានត្រួតពិនិត្យ E 2C early waning plane ឲ្យទៅប្រចាំការ នៅលើមូលដ្ឋានទ័ពនៅទីក្រុងណាហា ដែលស្ថិតនៅភាគខាងត្បូង កោះអូគីណាវ៉ា និងដែលស្ថិតទៅក្បែរកោះ យ៉ូណាហ្គូនី។ អង្គភាពយន្តហោះរ៉ាដា នឹងការពារដីគោក ទឹក និងអាកាសរបស់ជប៉ុន។ នេះបើតាមការបញ្ជាក់របស់រដ្ឋមន្រ្តីការពារជាតិជប៉ុន។
យន្តហោះ បួនគ្រឿងដែលក្រសួងការពារជប៉ុនបញ្ជូនទៅ ថ្ងៃនេះ ទៅកាន់ភាគខាងត្បូងកោះអូគីណាវ៉ា ជាប្រភេទយន្តហោះរ៉ាដា ដែលមានតួនាទីចាប់យកសញ្ញារាល់វត្តមានយន្តហោះ ឬការចរាចរណ៍ នៅលើផ្លូវទឹក។ ជប៉ុនបានទិញយន្តហោះប្រភេទនេះចំនួន១៣គ្រឿងពីអាមេរិក និងដាក់ឲ្យប្រចាំការ នៅភាគខាងជើងជប៉ុន គឺក្បែរទៅរកទឹកដីរុស្ស៊ី បន្ទាប់ពី ប្រព័ន្ធរ៉ាដាលើដីរបស់ជប៉ុន ធ្លាប់ធ្លោះធ្លោយ មិនអាចចាប់សញ្ញារបស់យន្តហោះរុស្ស៊ី ក្នុងទសវត្សរ៍ ឆ្នាំ ១៩៧៦។
ក្នុងមួយឆ្នាំចុងក្រោយនេះ គឺគិតរហូតដល់ខែមីនា ជប៉ុនបានបង្កើនការហោះហើរយន្តហោះចម្បាំងរបស់ខ្លួនដល់ទៅ ៤១៥ដង គឺច្រើន ជាងកាលពីឆ្នាំមួយឆ្នាំមុន ដែលមានត្រឹមតែ៣០៦លើកតែប៉ុណ្ណោះ។ ជប៉ុនបានបង្កើនយន្តហោះយោធាឲ្យហោះឆ្វែលនៅលើដែនអាកាស ក៏ដោយសារតែជប៉ុនចាប់បានសញ្ញាយន្តហោះគ្មានមនុស្សបើករបស់ចិន កាន់តែញយដង នៅក្នុងដែនអាកាសរបស់ជប៉ុន។ ម្យ៉ាងទៀត ជប៉ុនចាប់ផ្តើមត្រួតពិនិត្យតាមដានកាន់តែខ្លាំង ក្នុងដែនអាកាសរបស់ខ្លួន ចាប់តាំងពីចិនបានបង្កើតតំបន់ការពារដែនអាកាស កាលពីខែវិច្ចិកាឆ្នាំមុន ដែលជប៉ុនបានចោទថា បានរំលោភលើដែនអាកាសរបស់ជប៉ុន។
លោកអូបាម៉ាទៅជប៉ុន នៅថ្ងៃទី ២២មេសា
សំណង់ស្ថានីយ៍រ៉ាដា យោធានៅលើកោះជប៉ុន ក្បែរទៅរកចិន ធ្វើឡើង នៅបួនថ្ងៃមុនដំណើរទស្សនកិច្ចរបស់លោកប្រធានាធិបតីបារ៉ាក់អូបាម៉ា នៅជប៉ុន។ ជាដំណើរទស្សនកិច្ចលើកទីមួយ របស់ប្រធានាធិបតីអាមេរិក ក្នុងទឹកដីជប៉ុន ក្នុងរយៈពេល១៨ឆ្នាំចុងក្រោយនេះ។ ទស្សនកិច្ចរបស់លោកអូបាម៉ានៅជប៉ុន ធ្វើឡើង ដើម្បីបញ្ជាក់កាន់តែច្បាស់ ពីការគាំទ្ររបស់អាមេរិក សម្រាប់ជប៉ុន ដែលជាសម្ព័ន្ធមិត្ត។ នៅក្នុងកិច្ចព្រមព្រៀងសន្តិភាពចុះក្រោយសង្រ្គាមលោកលើកទីពីរ អាមេរិក បានសន្យាជួយការពារសន្តិសុខដល់ជប៉ុន ដោយដាច់ខាត។
នៅក្នុងដំណើរទស្សនកិច្ចរបស់ខ្លួននៅ ទីក្រុងតូក្យូ កាលពីដើមខែនេះ រដ្ឋមន្រ្តីការពារជាតិអាមេរិកបាននិយាយប្រាប់ទៅសមភាគីរបស់លោកថា អាមេរិកអាចនឹងបញ្ជូននាវាចម្បាំងពីរគ្រឿងបន្ថែមទៀត ប្រភេទនាវាពិឃាត ទៅជប៉ុន។
ចិនវិញបានបន្ថែមថវិកាការពារជាតិ មិនឈប់។ លោកប្រធានាធិបតីចិន នៅដើមសប្តាហ៍នេះ បានបញ្ជាឲ្យក្រសួងការពារជាតិធ្វើការពង្រឹងសមត្ថភាពបន្ថែម នៅផ្នែកដែនអាកាស និងអវកាស។ កប៉ាល់ចម្បាំងរបស់ចិនបានតម្រង់រួចហើយ គ្រាប់មីស៊ីលរបស់ខ្លួន សំដៅនាវាពិឃាតរបស់ជប៉ុន។
ជប៉ុនចាប់បានសញ្ញាយន្តហោះទម្លាក់គ្រាប់បែករុស្ស៊ីនៅក្បែរកោះអូគីណាវ៉ា
ក្រសួងការពារជាតិជប៉ុនអះអាងថា គេចាប់បានសញ្ញាយន្តហោះទម្លាក់គ្រាប់បែករបស់រុស្ស៊ី ដែលហោះជាច្រើនដងចូលមកជិតដីកោះរបស់ជប៉ុន។ តាមក្រសួងការពារជាតិជប៉ុន វាជារឿងមិនធម្មតា ដែលយន្តហោះទម្លាក់គ្រាប់បែករបស់រុស្ស៊ី ដល់ទៅ៦គ្រឿង បានហោះទៅឆ្វែលក្បែរកោះអូគីណាវ៉ា ដែលស្ថិតនៅភាគខាងត្បូងជប៉ុន។ វត្តមានយន្តហោះទម្លាក់គ្រាប់បែករុស្ស៊ីនៅមហាសមុទ្រប៉ាស៊ីហ្វិក មិនដែលធ្លាប់មានទេ នោះបើទោះបីនៅក្នុងសម័យសង្រ្គាមត្រជាក់ក៏ដោយ។
កាលពីថ្ងៃសុក្រ ទី ១៨មេសា ក្រសួងការពារជាតិរុស្ស៊ីបានប្រកាសថា ពីពេលនេះ ដល់ឆ្នាំ ២០១៦ រុស្ស៊ីនឹងបំពាក់សព្វាវុធដល់ប្រជុំកោះ គូរីល ដែលរុស្ស៊ីបានចងភ្ជាប់ទៅក្នុងទឹកដីរបស់ខ្លួន នៅក្រោយជប៉ុនចាញ់សង្រ្គាមលោកលើកទីពីរ។ ជប៉ុនបានទាមទារដីកោះបួនពីរុស្ស៊ី ប៉ុន្តែ រុស្ស៊ីបដិសេធដោយសារតែប្រជុំកោះនោះសម្បូរធនធានរ៉ែក្រោមដី។
សម្រាប់ទីក្រុងម៉ូស្គូ កោះទាំង៣០នៅក្នុងប្រជុំកោះ ជាកោះយុទ្ធសាស្រ្តរបស់រុស្ស៊ី។ នៅក្នុងមួយសប្តាហ៍ចុងក្រោយនេះ យន្តហោះចម្បាំងរបស់រុស្ស៊ីឧស្សាហ៍ហោះចូលទៅក្នុងតំបន់ការពារដែនអាកាសរបស់ជប៉ុន។
រុស្ស៊ីប្រកាសបំពាក់អាវុធនៅលើប្រជុំកោះគូរីល ដែលរុស្ស៊ីឈ្លោះទាមទារជាមួយជប៉ុន ព្រោះរុស្ស៊ីចង់ដាក់ទណ្ឌកម្មជប៉ុន ដែលស្ថិតនៅខាងភាគីអាមេរិក ក្នុងរឿងវិបត្តិអ៊ុយក្រែន។ នៅមុនវិបត្តិអ៊ុយក្រែន ជប៉ុនធ្លាប់បានខិតទៅរករុស្ស៊ី ដើម្បីរកទិញហ្គាស និងប្រេងពីរុស្ស៊ីមកផ្គត់ផ្គង់តម្រូវការក្នុងស្រុក បន្ទាប់ពីរោងចក្រអគ្គិសនី ដើរដោយនុយក្លេអ៊ែរត្រូវបិទ និងខូចខាតដោយសាររលកយក្សស៊ូណាមី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ