អង្គការរដ្ឋអ៊ីស្លាម ៖ ឃាតករជីហាតអាចជាជនជាតិបារាំង មេកើយធំជាអង់គ្លេស
ចុះផ្សាយនៅថ្ងៃ៖
ស្តាប់ - ០៥:៥៩
នៅថ្ងៃអាទិត្យទី ១៦ វិច្ឆិកា ២០១៤ អង្គការរដ្ឋអ៊ីស្លាមបានផ្សាយក្នុងទំព័រវិបសៃត៍ជីហាតបង្ហាញពីសកម្មភាពសម្លាប់កាត់ក ជនជាតិអាមេរិក Peter Kassig ដោយអះអាងថាជាការសងសឹកនឹងសហរដ្ឋអាមេរិកដែលបានបញ្ជូនទីប្រឹក្សាយោធា៣០០០នាក់ទៅបង្ហាត់ទាហានអ៊ីរ៉ាក់។ បន្ទាប់ពីបានផ្ទៀងផ្ទាត់ព័ត៌មាន សហរដ្ឋអាមេរិកបានបញ្ជាក់ បុគ្គលិកមនុស្សធម៌ពិតជាបានស្លាប់មែន។ ប៉ុន្តែអ្វីដែលគួរឱ្យកត់សម្គាល់ខ្លាំងនៅលើកនេះ គឺឃាតករជីហាតជាមនុស្សក្នុងបញ្ជីរបស់ភ្នាក់ងារសន្តិសុខ និងទំនងជារងរបួសកាលពីប៉ុន្មានថ្ងៃមុន ក្នុងប្រតិបត្តិការបាញ់រះផ្លូវអាកាសរបស់ទ័ពអាមេរិកនៅអ៊ីរ៉ាក់។ ម្នាក់នោះទំនងជាមានសញ្ជាតិអង់គ្លេស និងពីរនាក់ផ្សេងទៀតជាជនជាតិបារាំង។
រដ្ឋមន្ត្រីក្រសួងមហាផ្ទៃបារាំង បានបញ្ជាក់ថាពិតជាមានជនជាតិបារាំងពីរនាក់ក្នុងចំណោមឃាតករជីហាតដែលបានកាត់កចំណាប់ខ្មាំងអាមេរិកម្សិលមិញមែន និងកំពុងតែសិក្សាអំពីប្រវត្តិរបស់ជនជីហាតទាំងពីរនាក់នោះ។
ឃាតករជីហាតបារាំង ជានរណា ?
ជីហាតបារាំងម្នាក់ មានឈ្មោះ ក្នុងអង្គការរដ្ឋអ៊ីស្លាម ថា Abu Abdallah al Faransi និងមានឈ្មោះ(ស៊ីវិល)ពិត Maxime។ សព្វថ្ងៃមានអាយុប្រមាណជា២២ឆ្នាំ និងដើមកំណើតកើតជានៅតំបន់ Normandie ប៉ែកខាងលិចប្រទេសបារាំង។ យុវជនបារាំងរូបនេះ បានប្តូរសាសនា ទៅជឿលើស៊ុបលើអ៊ីស្លាម នៅអាយុ១៧ឆ្នាំ និងបានចូលទៅបំរើអង្គការរដ្ឋអ៊ីស្លាម កាលពីប្រមាណជាងមួយឆ្នាំមុន នៅស៊ីរី ហើយចេញមុខចេញមាត់ខ្លាំងលើប្រព័ន្ធសង្គម មានជាអាទិ៍ប្រព័ន្ធហ្វេសប៊ូក ជាមួយនឹងរូបថតប្រូហ្វាយ កាន់កាំភ្លើងផង។ ដោយសារបណ្តាញនេះ ទើបភ្នាក់ងារសន្តិសុខបារាំងអាចកំណត់អត្តសញ្ញាណបាន។
ភាពសង្ស័យមាននៅជុំវិញបុគ្គលជីហាតបារាំងទីពីរ។ ឃាតករជីហាតបារាំងទាំងពីរ និងជីហាតអឺរ៉ុបផ្សេងទៀត សុទ្ធតែបានបង្ហាញមុខក្នុងវីដេអូកាត់កចំណាប់ខ្មាំងអាមេរិក។ ក្រុមការងារកំពុងតែពិនិត្យពិច័យ ស្វែងរកអត្តសញ្ញាណនៅឡើយ។ អាជ្ញាធរបារាំងបដិសេធមិនអត្ថាធិប្បាយអ្វីនៅពេលនេះទេ។
“ជីហាឌី ចន” មកលងអង់គ្លេសជាថ្មី
ឃាតករជីហាតអង់គ្លេសនេះ ជាមនុស្សដែលភ្នាក់ងារសន្តិសុខស្គាល់ ច្បាស់គួរសម និងត្រូវបានសារព័ត៌មានអង់គ្លេសប្រសិទ្ធិនាមថា “Jihadi John » និងជាអ្នកធ្វើឃាតចំណាប់ខ្មាំងបួននាក់មុន។ ការលេចមុខជនជីហាតម្នាក់នេះ កំពុងតែធ្វើអង់គ្លេសភ្ញាក់ផ្អើលយ៉ាងខ្លាំង ពីព្រោះនៅព្រឹកមិញនេះតែម្តង កាសែត Mail on Sunday បានអះអាងថាជីហាឌី ចន បានត្រូវរបួស ក្នុងពេលកងទ័ពអាមេរិកចេញធ្វើប្រតិបត្តិការផ្លូវអាកាសនៅអ៊ីរ៉ាក់។ ស្លៀកពាក់ខ្មៅ បិទមុខ មានស្រោមកាំភ្លើងខ្លីនៅនឹងដៃឆ្វេង ជនជីហាតនេះលេចមុខជាច្រើនដងក្នុងវីដេអូ និយាយអង់គ្លេសបែបអ្នកក្រុងឡុងដ៍ ប្រកាសកាត់កចំណាប់ខ្មាំងអាមេរិក និងគំរាមលោកអូបាម៉ាផង លោកដេវីត កាមឺរោនផង ថាអង្គការរដ្ឋអ៊ីស្លាមនឹងទៅសម្លាប់ពលរដ្ឋអាមេរិកនិងអង់គ្លេសដល់ក្នុងប្រទេសតែម្តង។ ហើយគឺរូប ជីហាឌីចននេះឯងជាអ្នកឈរនៅកណ្តាលជួរជនជីហាតដែលត្រៀមកាត់កទាហានស៊ីរី១៨នាក់ទៀត។
ក៏ប៉ុន្តែ វីដេអូបង្ហាញឆាកឈុតធ្វើឃាតមនុស្សដ៏ឃោរឃៅនេះគ្មានបញ្ជាក់ពីថ្ងៃខែថតទេ។ វាអាចថតមុនប្រតិបត្តិការផ្លូវអាកាសដែលវាយដៅលើនិងចំពេលពួកជីហាតរដ្ឋអ៊ីស្លាមកំពុងប្រជុំគ្នា កាលពីថ្ងៃទី ៨ វិច្ឆិកា នៅតំបន់ជាប់ព្រំប្រទល់ស៊ីរី។ ហើយបើតាមកាសែត អង់គ្លេសដដែល មានគិលានុបដ្ឋាកយិកាម្នាក់បានព្យាបាលរបួសឱ្យបុរសជីហាតម្នាក់ មានឈ្មោះទាហានថា ចន អាយុខ្ទង់ ២៨ ទៅ៣១ឆ្នាំ មានតួនាទីខ្ពស់ក្នុងរង្វង់អង្គការរដ្ឋអ៊ីស្លាម មិនដូចយុទ្ធជនអឺរ៉ុបផ្សេងទៀតទេ។
សារទៅកាន់ពលរដ្ឋស៊ីរី ?
កម្មវត្ថុទីដំបូងរបស់អង្គការរដ្ឋអ៊ីស្លាមដែលធ្វើការផ្សព្វផ្សាយវីដេអូ គឺគ្មានអ្វីក្រៅពីចង់ឃោសនាព័ត៌មាន សំឡុតបំភ័យសត្រូវ ជាពិសេសក្រុមបស្ចឹមលោក និងដើម្បីអូសទាញយុវជនក្មេងៗចូលធ្វើជាយុទ្ធជនបំរើជីហាតទេ។ វីដេអូចុងក្រោយដែលទើបបង្ហាញនៅថ្ងៃម្សិលមិញ ធ្វើឡើងក្នុងទិសតែមួយនេះឯង តែអាចខុសបន្តិច ដោយលើកនេះពួកជីហាតទំនងចង់ផ្ចង់សម្រួចទិសទៅទាក់ទាញពលរដ្ឋក្នុងតំបន់ថែមទៀត មិនមែនត្រឹមតែមតិអន្តរជាតិទេ។
ខុសពីវីដេអូកាត់កចំណាប់ខ្មាំងបស្ចឹមលោកមុនៗ វីដេអូ១៥នាទីម្សិលមិញ បង្ហាញច្រើនពីសកម្មភាពអារកទាហាន និងនាយទាហាន របស់រដ្ឋាភិបាលស៊ីរី ចំនួន១៨នាក់។ បើតាមអ្នកសង្កេតការណ៍ អង្គការរដ្ឋអ៊ីស្លាម ចង់បង្ហាញអំពីកម្លាំងប្រឈមមួយទៀត ដែលមិនមែនជាក្រុមកំពុងប្រយុទ្ធប្រឆាំងនឹងរបបលោកបាស្ហាអាល់អាសាដ។ ប៉ុន្មានខែចុងក្រោយនេះ ក្រុមមាននិន្នាការជីហាតស៊ីរីរាប់ពាន់នាក់បានចុះចូលបំរើក្នុងជួរអង្គការរដ្ឋអ៊ីស្លាម។ ភ្នាក់ងារស៊ើបការណ៍សម្ងាត់អាមេរិក សេអ៊ីអា ប៉ាន់ស្មានថាអង្គការជីហាតមានកម្លាំងប្រយុទ្ធដល់ទៅបីម៉ឺននាក់នៅស៊ីរីនិងអ៊ីរ៉ាក់។
ដើម្បីទាក់ទាញយុវជនលោកខាងលិច ត្រូវប្រើអ៊ីនធ័រនែត និងប្រព័ន្ធសង្គម ដែលពួកជីហាតរដ្ឋអ៊ីស្លាម មានសមត្ថភាពខ្ពស់ដែរក្នុងវិស័យនេះ ហើយចំពោះពលរដ្ឋក្នុងតំបន់ដែលតែងរងគ្រោះជួបវិបត្តិសហគមន៍សាសនា គឺមានតែសម្លុតឱ្យការព្រមចូលបំរើជីហាតទេ ទើបរួចពីគ្រោះភ័យសម្លាប់រង្គាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ