រដ្ឋាភិបាលក្រុងបាងកកចង់បង្កើតឲ្យមានឡើងវិញនូវកាតព្វកិច្ចប៉ូលិស
នៅក្នុងប្រទេសថៃ រដ្ឋាភិបាលកំពុងសិក្សាពីការបង្កើតឲ្យមានឡើងវិញនូវកាតព្វកិច្ចប៉ូលិសសម្រាប់ស្ថាប័នប៉ូលិស។ ស្ថាប័នប៉ូលិសដែលត្រូវបានគេចាត់ទុកជាស្ថាប័នមួយមានទំនោរខ្លំាងទៅរកលោកអតីតនាយករដ្ឋមន្រ្តីថៃថាក់ស៊ីនធ្លាក់ពីអំណាចដោយរដ្ឋប្រហារយោធាកាលពីឆ្នំា ២០០៦។ ដោយឡែកនៅថ្ងៃចន្ទ ទី៣ វិច្ឆិកា លោកនាយករដ្ឋមន្រ្តី ឧត្តមសេនីយប្រាយុទ្ធ ចាន់អូចាបានព្រមានមធ្យោបាយឃោសនាមហាជនក្នុងស្រុកកុំសូវសរសេរព័ត៌មានណាដែលនិយាយច្រើនពីលោកថាក់ស៊ីន។
ចុះផ្សាយនៅថ្ងៃ៖
ស្តាប់ - ០២:១១
អ្នកនំាពាក្យរបស់ស្ថាប័នប៉ូលិសបានថ្លែងឲ្យដឹងថាជាគោលការណ៍ លោកនាយករដ្ឋមន្រ្តី ឧត្តមសេនីយប្រាយុទ្ធ ចាន់អូចាបានយល់ព្រមដាក់ឲ្យមានឡើងវិញនូវកាតព្វកិច្ចប៉ូលិសដូចជាកាតព្វកិច្ចយោធាសម្រាប់យុវជនថៃរាប់ពាន់នាក់ដែលមានអាយុចាប់ពី ២១ឆ្នំា។ ចំណែកឧត្តមសេនីយឯកប្រាវុធ ថាវនស៊ីរីបានបញ្ជាក់ពីកង្វះមន្រ្តីប៉ូលិសនៅក្នុងប្រទេសមួយដែលកំពុងមានកម្លំាងប៉ូលិសចំនួន ២៣ម៉ឺននាក់។ បើផែនការថ្មីនេះចូលជាធរមាន យុវជនដែលជាប់កាតព្វកិច្ចប៉ូលិសនឹងទទួលបានប្រាក់ខែប្រមាណជា ២០០អឺរ៉ូក្នុងមួយខែ។ គួររម្លឹកជូនថា អស់រយៈពេលប្រមាណជា ១០ឆ្នំាមកហើយដែលថៃបានបិទបញ្ចប់កាតព្វកិច្ចប៉ូលិស។ ការប្រកាសពីបំណងចង់បញ្ចូលកាតព្វកិច្ចប៉ូលិសនៅក្នុងស្ថាប័នប៉ូលិសពេលនេះបានធ្វើឡើង បន្ទាប់ពីរបបសឹកបានធ្វើការជម្រុះមន្រ្តីស៊ីវិល និងប៉ូលិសណាដែលជិតស្និទ្ធនឹងលោកអតីតនាយករដ្ឋមន្រ្តីថាក់ស៊ីន។ ចូរកុំភ្លេចថា មុននឹងក្លាយជាមហាសេដ្ឋី និងនាយករដ្ឋមន្រ្តីដ៏មានប្រជាប្រិយភាពខ្លំាងនៅក្នុងចំណោមប្រជារាស្រ្តថៃទូទៅ លោកថាក់ស៊ីនក៏ជាមន្រ្តីប៉ូលិសម្នាក់ដែរ។
នៅក្នុងប្រទេសថៃ ប្រជារាស្រ្តមិនសូវឲ្យតម្លៃស្ថាប័នប៉ូលិសដូចស្ថាប័នយោធាទេ ព្រោះសម្រាប់ពួកគេ ស្ថាប័នប៉ូលិសជានិមិត្តរូបនៃអំពើពុករលួយ និងការស៊ីសំណូកសូកប៉ាន់។ ថ្មីៗនេះ ស្ថាប័នប៉ូលិសបានទទួលរងការរិះគន់ទិតៀនខ្លំាងនៅក្នុងរឿងស៊ើបអង្កេតជុំវិញការស្លាប់អ្នកទេសចរណ៍ជនជាតិអង់គ្លេសពីរនាក់នៅប៉ែកខាងត្បូងប្រទេស។ មួយវិញទៀត ស្ថាប័នប៉ូលិសត្រូវបានស្ថាប័នយោធាចាត់ទុកជាដែនអំណាចការពារ គំាទ្រលោកថាក់ស៊ីន។ តែលោកមេប៉ូលិសថ្មីដែលស្និទនឹងរបបសឹកបានចេញមុខប្តេជ្ញាកំចាត់អំពើពុករលួយនៅគ្រប់ជាន់ថ្នាក់។ ទន្ទឹមគ្នានេះ លោកនាយករដ្ឋមន្រ្តី ឧត្តមសេនីយប្រាយុទ្ធ ចាន់អូចាបានព្រមានមធ្យោបាយឃោសនាមហាជនក្នុងស្រុកកុំសូវសរសេរព័ត៌មានណាដែលនិយាយច្រើនពីលោកថាក់ស៊ីន។ « កុំផ្តល់ព័ត៌មានណាដែលទាក់ទងនឹងលោកថាក់ស៊ីន ព្រោះគ្រប់គ្នាបានដឹងរួចហើយថា គាត់បានរំលោភច្បាប់ ដោយបានរត់គេចពីសំណាញ់តុលាការ » នេះជាការលើកឡើករបស់លោកចាន់អូចា។ គួរជម្រាបជូនថា របបសឹកកំពុងធ្វើអ្វីៗគ្រប់បែបយ៉ាងដើម្បីកាច់បំបាក់គ្រួសារត្រកូលថាក់ស៊ីន ពិសេសការវិលត្រឡប់ចូលឆាកនយោបាយរបស់លោកថាក់ស៊ីនតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ