ប្រមុខការទូតអាមេរិកចន ឃែររី ចុះទៅដើមបូព៌ាជាថ្មី មុនបន្តទៅអាស៊ីអាគ្នេយ៍
នៅល្ងាចថ្ងៃពុធម្សិលមិញ ប្រមុខការទូតអាមេរិកចន ឃែររី បានចេញដំណើរទៅទស្សនកិច្ចនៅដើមបូព៌ាសាជាថ្មីម្តងទៀត មុនបន្តដំណើរទៅវៀតណាម និងហ្វីលីពីន។ នៅដើមបូព៌ា លោកចន ឃែររី មានបេសកកម្មធ្វើយ៉ាងណា ដើម្បីអោយដំណើរការចរចាសន្តិភាពរវាងអ៊ីស្រាអែល និងប៉ាឡេស្ទីន បានលូតលាស់ទៅមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ទស្សនកិច្ចរបស់រដ្ឋមន្ត្រីការបរទេសអាមេរិក ចន ឃែររី នៅអ៊ីស្រាអែល និងតំបន់ស៊ីហ្ស៊កដានី គឺជាទស្សនកិច្ចទី៩ហើយ គិតចាប់ពីខែមិនាដើមឆ្នាំមក។ ហើយថ្មីៗនេះ លោកចន ឃែររី ទើបតែបានចុះទៅទីនោះ មិនដល់មួយសប្តាហ៍ផង។
នៅអ៊ីស្រាអែល ប្រមុខការទូតអាមេរិកជួបជាមួយ ប្រធានាធិបតី ស្ហ៊ីមន ពែររេស និងនាយករដ្ឋមន្ត្រី បេនយ៉ាមីន នេតានីញ៉ាហ៊ូ។ លោកឃែររី ក៏ជួបពិភាក្សាជាមួយប្រធានរដ្ឋអំណាចប៉ាឡេស្ទីន ម៉ាមូដ អាបាសផងដែរ។ ជំនួបទាំងនេះមានទិសដៅអោយដំណើរការចរចាសន្តិភាពរវាងអ៊ីស្រាអែល និងប៉ាឡេស្ទីន បានលូតលាស់ទៅមុខ។ អាមេរិកចង់អោយភាគីទាំងពីរសំរេចបានកិច្ចព្រមព្រៀងចុងក្រោយមួយ។ អាមេរិកមិនចង់ឃើញដំណោះស្រាយបែបយ៉ាងបណ្តោះអាសន្ននោះឡើយ។ នៅហ្សេរុយសាឡិម និងរ៉ាម៉ាឡា កាលពីសប្តាហ៍មុន លោក ចន ឃែររី បានពិភាក្សាជាមួយអ្នកដឹកនាំនានា អំពីសុវត្ថិភាពសន្តិសុខអ៊ីស្រាអែល ករណីដែលរដ្ឋប៉ាឡេស្ទីន ត្រូវបានបង្កើតឡើង។
មុននឹងចេញដំណើរមកដើមបូព៌ា នៅថ្ងៃពុធកន្លងមក ប្រមុខការទូតអាមេរិកបានបង្ហាញក្តីសង្ឃឹមខ្ពស់។ លោកបានទាត់ចោលនូវភាពទុទិដ្ឋនិយមរបស់អ្នកជំនាញអ៊ីស្រាអែល និងប៉ាឡេស្ទីន ដែលធ្លាប់បានលើកឡើងថា ជម្លោះអ៊ីស្រាអែល-ប៉ាឡេស្ទីន គឺជាជម្លោះស្មុគស្មាញ និងកកស្ទះជ្រុលហួស។ គួររំលឹកថា នៅដើមសប្តាហ៍នេះ ភាគីចរចាប៉ាឡេស្ទីនបានទាត់ចោលសំណូមពររបស់លោកឃែររី ស្តីពីសុវត្ថិភាពសន្តិសុខ។យោងតាមប៉ាឡេស្ទីន លោកចន ឃែររី ចង់អោយយោធាអ៊ីស្រាអែលមានវត្តមាន១០ឆ្នាំ នៅជ្រលងភ្នំ Jourdain នៅស៊ីសហ្ស៊កដានី។
នៅថ្ងៃសុក្រនេះ លោកឃែររីធ្វើទស្សនកិច្ចនៅក្រុងអាម៉ាន់ ប្រទេសហ្ស៊កដានី រួចលោកនឹងចេញដំណើរទៅវៀតណាម និងហ្វីលីពីនបន្តទៀត។ ប្រមុខការទូតអាមេរិក ធ្លាប់បានធ្វើការប្រយុទ្ធនៅវៀតណាម ពីឆ្នាំ១៩៦៧ ដល់ឆ្នាំ១៩៧០ កាលណោះលោកជាមេបញ្ជាការនាវាល្បាតមួយគ្រឿង។
នៅហ្វីលីពីនវិញ លោកឃែររី នឹងចុះទៅក្រុងម៉ានីល និងតាក្លូបង់ ដែលបានរងគ្រោះដោយព្យុះសង្ឃរាហៃយ៉ាន កាលពីដើមខែវិច្ឆិកា។ ប្រមុខការទូតអាមេរិកនឹងបានឃើញពីការប្រឹងប្រែងកសាងតំបន់រងគ្រោះហ្វីលីពីនឡើងវិញ។ អាមេរិកបានជួយផ្នែកហិរញ្ញវត្ថុហ្វីលីពីនយ៉ាងសន្ធឹកសន្ធាប់ ដើម្បីស្រោចស្រង់តំបន់រងគ្រោះដោយព្យុះហៃយ៉ាននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ