លោកចន ឃែរី៖« កិច្ចព្រមព្រៀងសន្តិភាពរវាងអ៊ីស្រាអែល និងប៉ាឡេស្ទីនស្ថិតមិនឆ្ងាយទេ »
លោករដ្ឋមន្រ្តីការបរទេសអាមេរិកចន ឃែរីទើបបានបិទបញ្ចប់ទស្សនកិច្ចនៅក្នុងតំបន់ដើមបូព៌ា។ គោលដៅនៃទស្សនកិច្ច គឺដើម្បីបន្តស្វែងរកកិច្ចព្រមព្រៀងសន្តិភាពឲ្យអ៊ីស្រាអែល និងប៉ាឡេស្ទីន។ បន្ទាប់ពីបានជួបដាច់ដោយឡែកពីគ្នាជាមួយលោកនាយករដ្ឋមន្រ្តីអ៊ីស្រាអែលបេនយ៉ាមីន នេតានយ៉ាហ៊ូ និងប្រមុខរដ្ឋអំណាចប៉ាឡេស្ទីនម៉ាមូត អាប៉ាស់មក លោកចន ឃែរីបានថ្លែងដោយថា កិច្ចព្រមព្រៀងសន្តិភាពរវាងអ៊ីស្រាអែល និងប៉ាឡេស្ទីនស្ថិតនៅមិនឆ្ងាយប៉ុន្មានទេ។
ចុះផ្សាយនៅថ្ងៃ៖
ស្តាប់ - ០១:៥៩
គិតតំាងពីខែមីនាមក នេះជាដំណើរទស្សនកិច្ចលើកទី៨ របស់លោកប្រមុខការទូតអាមេរិកចន ឃែរីទៅកាន់តំបន់ដើមបូព៌ា។ គោលដៅរបស់លោកចន ឃែរី គឺស្វែងរកសន្តិភាពឲ្យអ៊ីស្រាអែល និងប៉ាឡេស្ទីន ពិសេសបង្កើតរដ្ឋប៉ាឡេស្ទីនមួយរស់ក្បែររដ្ឋអ៊ីស្រាអែលដោយសុខក្សេមក្សាន្ត។ កាលពីកិច្ចចរចាលើកទី១ នាដំណាច់ខែកក្កដាកន្លងទៅ លោកចន ឃែរីបានប្តេជ្ញារួចហើយថា លោកនឹងរកឲ្យបាននូវកិច្ចព្រមព្រៀងសន្តិភាពរវាងអ៊ីស្រាអែល និងប៉ាឡេស្ទីនក្នុងរយៈពេល ៩ខែ។
នៅក្នុងជំនួបដាច់ដោយឡែកពីគ្នាជាមួយលោកនាយករដ្ឋមន្រ្តីអ៊ីស្រាអែលបេនយ៉ាមីន នេតានយ៉ាហ៊ូ និងលោកប្រមុខរដ្ឋអំណាចប៉ាឡេស្ទីនម៉ាមូត អាប៉ាស់ លោកឃែរីបានលើកឡើងយ៉ាងច្រើន និងលំអិតអំពីបញ្ហាសន្តិសុខក្នុងតំបន់ ក៏ដូចជាសន្តិសុខសម្រាប់រដ្ឋអ៊ីស្រាអែល និងអនាគតរដ្ឋប៉ាឡេស្ទីន។ លោកចន ឃែរីបានផ្តល់គំនិត និងសំណើឲ្យដល់ភាគីអ៊ីស្រាអែល និងប៉ាឡេស្ទីនអំពីបញ្ហាសន្តិសុខនៅក្នុងតំបន់ស៊ីហ្ស៊កដានីក្នុងករណីបង្កើតរដ្ឋប៉ាឡេស្ទីន។
ដោយឡែក ថ្លែងជាមួយក្រុមអ្នកកាសែតដែលធ្វើដំណើរជាមួយលោកក្នុងពេលចាកចេញពីទឹកដីអ៊ីស្រាអែលឆ្ពោះទៅកាន់សហរដ្ឋអាមេរិកវិញ លោកចន ឃែរីបានអះអាងដោយសុទិដ្ឋិនិយមថា ពន្លឺនៃសន្តិភាព ភាពសម្បូររុងរឿង និងសន្តិសុខដែលប្រជាជនក្នុងតំបន់កំពុងទន្ទឹងរង់ចំាហាក់ដូចជាកាន់តែភ្លឺឡើងៗហើយ។ យោងតាមលោកចន ឃែរី ទំាងលោកប្រមុខរដ្ឋាភិបាលអ៊ីស្រាអែល ក៏ដូចជាលោកប្រមុខរដ្ឋអំណាចប៉ាឡេស្ទីន សុទ្ធតែបានបង្ហាញចេញនូវកម្មវត្ថុរួមតែមួយដូចគ្នា នោះគឺការចង់បានរដ្ឋពីរសម្រាប់ប្រជាជនទំាងពីរ រស់ក្បែរគ្នាដោយសន្តិភាព និងភាពសម្បូររងរឿង។
តែលោកប្រមុខការទូតអាមេរិកបានព្រមានទុកជាមុនថា បើគ្មានសន្តិសុខទេ នោះក៏គ្មានសន្តិភាព និងភាពសម្បូររុងរឿងដែរ និងថា អាមេរិកគំាទ្រតែកិច្ចព្រមព្រៀងណាដែលអាចធានាសន្តិសុខដល់ប្រជាជនទំាងពីរ អ៊ីស្រាអែល និងប៉ាឡេស្ទីន។ ទន្ទឹមគ្នានេះ លោកចន ឃែរីក៏បានអំពាវនាវឲ្យភាគីទំាងពីរដើរតាមផ្លូវត្រួសត្រាយដោយលោកអតីតប្រធានាធិបតីអាហ្រ្វិកខាងត្បូងនែលសុន ម៉ង់ដេឡាដែលទើបទទួលអនិច្ចកម្មកាលពីយប់ថ្ងៃព្រហស្បតិ៍ ទី៥ ធ្នូកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ