កូរ៉េខាងត្បូងរកឃើញអ្នកស្លាប់ទី៧ ដោយសារជំងឺ MERS
មរណភាពនៃមនុស្សទី៧ ដោយសារជំងឺផ្លូវដង្ហើមមជ្ឈឹមបូព៌ានៅកូរ៉េខាងត្បូង ត្រូវបានបញ្ជាក់អះអាងនៅថ្ងៃអង្គារនេះតែម្ដង។ កូរ៉េខាងត្បូង ដែលរងការវាយប្រហារពីជំងឺ MERS តាំងពីថ្ងៃទី២០ខែឧសភាកន្លងមកនោះ បានបង្ហាញពីក្ដីព្រួយបារម្ភយ៉ាងខ្លាំងចំពោះការរីករាតត្បាតនៃជំងឺ MERS។ បារម្ភខ្លាំង ព្រោះតែចំនួនអ្នកស្លាប់ និងអ្នកឆ្លងជំងឺដ៏កាចសាហាវនេះ បានកើនឡើងគួរឲ្យកត់សម្គាល់។
ចុះផ្សាយនៅថ្ងៃ៖
ស្តាប់ - ០២:០៣
អ្នកស្លាប់ទី៧ ដោយសារជំងឺ MERS គឺស្ត្រីវ័យ៦៨ឆ្នាំម្នាក់ ដែលមានទំនាក់ទំនងជាមួយអ្នកជំងឺ MERS នៅមន្ទីរពេទ្យក្នុងក្រុងសេអ៊ូល តាំងពី ថ្ងៃទី២៧ និង ២៨ឧសភា មកម្ល៉េះ។ នេះបើតាមការឲ្យដឹងពីក្រសួងសុខាភិបាលកូរ៉េខាងត្បូង។ បើតាមប្រភពដដែល អ្នកស្លាប់ទាំង៧ដោយសារជំងឺ MERS គឺសុទ្ធតែមានបញ្ហាសុខភាព មុននឹងឆ្លងមេរោគ MERS។ ដោយឡែក សម្រាប់ករណីស្លាប់ទី៧ ចុងក្រោយនេះ អ្នកជំងឺមានជំងឺបេះដូងជាប់ខ្លួនរួចទៅហើយ មុននឹងឆ្លងមេរោគផ្លូវដង្ហើម រហូតដល់ស្លាប់នាពេលនេះ។
គិតត្រឹមថ្ងៃអង្គារ ទី០៩ខែមិថុនានេះ ករណីឆ្លងជំងឺ MERS សរុបមានចំនួន៩៥ករណី។ ក្នុងនោះ ករណីឆ្លងថ្មីនៅថ្ងៃទី០៩មិថុនា មានចំនួន៨ករណី និងនៅថ្ងៃទី០៨ខែមិថុនា មានចំនួន២៣ករណី។ ចំនួននេះ បានកើនឡើងយ៉ាងឆាប់រហ័ស បើប្រៀបធៀបទៅនឹងរយៈពេលពីសប្ដាហ៍កន្លងទៅ ដែលមានករណីឆ្លងតែ៤ប៉ុណ្ណោះ។
សូមរម្លឹកថា វត្តមានមេរោគផ្លូវដង្ហើមមជ្ឈិមបូព៌ា MERS ក្នុងទឹកដីកូរ៉េខាងត្បូង ត្រូវបានរកឃើញដំបូងកាលពីថ្ងៃទី២០ខែឧសភា បន្ទាប់ពីបុរសកូរ៉េខាងត្បូងម្នាក់ត្រឡប់ពីប្រទេសអារ៉ាប៊ីសាអូឌីតវិញ។ អារ៉ាប៊ីសាអូឌីតដែលជាប្រភពកំណើតនៃមេរោគនេះ មានអ្នកចម្លងចៀសស្លាប់មិនរួចជាង ៤០០នាក់គិតតំាងពីឆ្នំា ២០១២ ហើយកូរ៉េខាងត្បូង គឺជាទឹកដីដែលបានឆ្លងមេរោគ MERS ខ្លំាងជាង បន្ទាប់ពីអារ៉ាប៊ីសាអូឌីត។
កូរ៉េខាងត្បូង បានបង្ហាញពីក្ដីព្រួយបារម្ភយ៉ាងខ្លាំងចំពោះការរីករាតត្បាតនៃជំងឺ MERS ដោយបានចាត់វិធានការតឹងរ៉ឹងមួយចំនួន ពិសេសបិទទ្វារសាលារៀនជាង២ពាន់កន្លែង។ ជាងនេះទៅទៀត មនុស្សជាង២ពាន់៥រយនាក់ផ្សេងទៀត ត្រូវបានដាក់ឲ្យស្ថិតនៅដាច់ដោយឡែក ដោយមានការតាមដានពីការវិវត្តនៃសុខភាពយ៉ាងយកចិត្តទុកដាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ