ការវាយប្រហារនៅគុនមីងជាសញ្ញាបង្ហាញពីការវិវឌ្ឍនៃអំពើហិង្សានៅស៊ីងជាំង
ចុះផ្សាយនៅថ្ងៃ៖
ស្តាប់ - ០៣:៥៦
កាលពីថ្ងៃសៅរ៍ មនុស្សមួយក្រុម មានគ្នា ៨នាក់ បានចូលចាក់សម្លាប់មនុស្សដោយឥតរើសមុខ នៅក្នុងស្ថានីយ៍រថភ្លើង ក្នុងខេត្តគុនមីង ប្រទេសចិន។ មនុស្ស ២៩នាក់ត្រូវបាត់បង់ជីវិត និងជាងមួយរយនាក់ផ្សេងទៀតត្រូវរងរបួស នៅក្នុងហេតុការណ៍ ដែលអាជ្ញាធរចិនចាត់ទុកថាជាការវាយប្រហារភេរវកម្ម ដោយក្រុមផ្តាច់ទឹកដីស៊ីងជាំង។ ការវាយប្រហារនេះ ប្រសិនបើវាពិតជាទង្វើរបស់ក្រុមអ៊ុយហ្គួមែន វាគឺជាសញ្ញាបង្ហាញឲ្យឃើញកាន់តែច្បាស់អំពីការឆ្លងរាលដាលនៃអំពើហិង្សា ចេញពីស៊ីងជាំង ទៅកាន់តំបន់ផ្សេងទៀត នៅក្នុងប្រទេសចិន។
ការវាយប្រហារនៅគុនមីង កាលពីថ្ងៃសៅរ៍ ត្រូវបានអាជ្ញាធរចិនចាត់ទុកថា “ជាអំពើភេរវកម្ម”។
សហរដ្ឋអាមេរិកពីដំបូងបានចៀសវាងមិនប្រើពាក្យ “ភេរវកម្ម” ក៏ប៉ុន្តែ ក្រោយពីមានការរិះគន់យ៉ាងខ្លាំងក្លាពីសំណាក់បណ្តាញសារព័ត៌មានរដ្ឋចិន អ្នកនាំពាក្យក្រសួងការបរទេសអាមេរិកបានទទួលស្គាល់ កាលពីថ្ងៃចន្ទថា អំពើហិង្សានៅគុនមីង “មានទ្រង់ទ្រាយជាការវាយប្រហារភេរវកម្ម ដែលធ្វើឡើងទៅលើសាធារណជនជាទូទៅដោយឥតរើសមុខ”។
អ្នកជំនាញខាងភេរវកម្ម នៅវិទ្យាស្ថានស្រាវជ្រាវ Griffith Asia ដែលមានមូលដ្ឋាននៅក្នុងប្រទេសអូស្រ្តាលី ក៏បានលើកឡើងស្រដៀងគ្នានេះដែរថា គេមិនអាចបដិសេធបានទេថា អ្វីដែលបានកើតឡើងនៅគុនមីង គឺជាអំពើភេរវកម្ម ដែលធ្វើឡើងក្នុងគោលដៅបំភិតបំភ័យសាធារណជនចិន។
សម្រាប់អាជ្ញាធរចិន អំពើភេរវកម្មនៅគុនមីងនេះ គឺជាស្នារដៃរបស់ក្រុមទាមទារផ្តាច់ទឹកដីនៅតំបន់ស៊ីងជាំង។
គួររំឭកឡើងវិញថា តំបន់ស៊ីងជាំង គឺជាតំបន់ស្វយ័តស្ថិតនៅប៉ែកពាយ័ព្យប្រទេសចិន ជាប់នឹងតំបន់អាស៊ីកណ្តាល ហើយមានប្រជាជនដើមភាគច្រើនជាជនជាតិអ៊ុយហ្គួ កាន់សាសនាអ៊ីស្លាម មានភាសា វប្បធម៌ និងទំនៀមទម្លាប់ប្រពៃណីខុសពីជនជាតិហានរបស់ចិន។
អំពើបះបោររបស់ពួកអ៊ុយហ្គួនៅស៊ីងជាំងបានចាប់ផ្ទុះឡើង កាលពីឆ្នាំ២០០៩ ដែលបណ្តាលឲ្យមនុស្សរាប់រយនាក់ត្រូវបាត់បង់ជីវិត។ អាជ្ញាធរក្រុងប៉េកាំងតែងតែចោទប្រកាន់ក្រុមបះបោរអ៊ុយហ្គួថាជាក្រុមទាមទារផ្តាច់ទឹកដី ក៏ប៉ុន្តែ តាមការសង្កេតជាទូទៅ អំពើបះបោររបស់ពួកអ៊ុយហ្គួមិនមែនធ្វើឡើងក្នុងគោលដៅផ្តាច់ទឹកដីនោះទេ តែជាការបះបោរដោយមកពីមូលហេតុសេដ្ឋកិច្ច និងសង្គម។
ជាទូទៅ គេសង្កេតឃើញថា ចាប់តាំងពីឆ្នាំ២០០៩មក អំពើហិង្សារបស់ពួកអ៊ុយហ្គួកើតមានឡើងតែនៅក្នុងតំបន់ស៊ីងជាំងតែប៉ុណ្ណោះ ហើយការវាយប្រហារច្រើនតែកើតមានឡើង ដោយសំដៅទៅលើអាជ្ញាធរតំបន់ស៊ីងជាំង ដូចជា ទីស្នាក់ការប៉ូលិស ជាដើម។
ការវាយប្រហារនៅស្ថានីយ៍រថភ្លើងគុនមីង កាលពីថ្ងៃសៅរ៍ គឺជាការវាយប្រហារទៅលើជនស៊ីវិលដោយឥតរើសមុខ ធ្វើឡើងនៅក្នុងស្ថានីយ៍រថភ្លើង នៅក្នុងទីប្រជុំជនដ៏ធំមួយ ស្ថិតនៅក្រៅតំបន់ស៊ីងជាំង ហើយបណ្តាលឲ្យមនុស្សស្លាប់រហូតដល់ទៅ២៩នាក់ និងរបួសជាងមួយរយនាក់។ ទាំងនេះ គឺជាការបង្ហាញឲ្យឃើញអំពីការវិវឌ្ឍដ៏សំខាន់មួយ នៃអំពើហិង្សារបស់ពួកអ៊ុយហ្គួ ដែលកំពុងតែរាលដាលចេញពីតំបន់ស៊ីងជាំង ទៅកាន់កន្លែងផ្សេងៗទៀត ក្នុងប្រទេសចិន។
គួររំឭកឡើងវិញថា កាលពីខែតុលាឆ្នាំ២០១៣កន្លងទៅនេះ ការវាយប្រហារអត្តឃាតមួយក៏ធ្លាប់បានកើតមានឡើងម្តងរួចមកហើយដែរ នៅក្នុងទីក្រុងប៉េកាំង ដែលអាជ្ញាធរចិនដាក់ការទទួលខុសត្រូវទៅលើពួកអ៊ុយហ្គួ។
ការវាយប្រហារនៅគុនមីង កាលពីថ្ងៃសៅរ៍ ក៏ត្រូវបានអ្នកជំនាញខាងភេរវកម្មចាប់អារម្មណ៍ផងដែរ នៅត្រង់ថា វាជាការវាយប្រហារ ដែលចាំបាច់តម្រូវឲ្យមានការរៀបចំផែនការទុកជាមុនយ៉ាងម៉ត់ចត់ ហើយការវាយប្រហារនេះត្រូវបានធ្វើឡើងដោយមនុស្សច្រើននាក់ ដែលដឹងខ្លួនជាមុនថាពួកគេផ្ទាល់ក៏អាចនឹងត្រូវស្លាប់ក្នុងការវាយប្រហារនេះដែរ។ ទាំងនេះ សុទ្ធសឹងជាលក្ខណៈសម្គាល់នៃអំពើភេរវកម្មអ៊ីស្លាមជ្រុលនិយម តាមបែបជីហាដ (Jihad)។
សាស្រ្តាចារ្យម្នាក់ នៅសកលវិទ្យាសិង្ហបុរី ដែលធ្វើការសិក្សាលើចលនាភេរវកម្មនៅអាស៊ី បានលើកឡើងថា ការវាយប្រហារនៅគុនមីងបង្ហាញថា ចលនាភេរវកម្មនៅចិនកំពុងតែស្គាល់នូវការវិវឌ្ឍដ៏សំខាន់មួយ គឺភេរវជនផ្តោតទៅលើការវាយប្រហារភេរវកម្ម ដែលមិនសូវចំណាយលុយច្រើន តែអាចមានឥទ្ធិពលច្រើន ក្នុងការទាក់ទាញសាធារណមតិឲ្យចាប់អារម្មណ៍ទៅនឹងការទាមទាររបស់ពួកគេ។ ពួកអ៊ុយហ្គួក៏បានបង្ហាញឲ្យឃើញផងដែរថា ពួកគេមានលទ្ធភាព ក្នុងការរៀបចំការវាយប្រហារ នៅគ្រប់ទីកន្លែង ដោយរាប់ទាំងទីតាំង ដែលនៅក្រៅតំបន់ស៊ីងជាំង ដែលជាមូលដ្ឋានរបស់ពួកគេ។
នយោបាយតឹងរ៉ឹងរបស់អាជ្ញាធរចិន ដែលបង្រ្កាបទៅលើពួកអ៊ុយហ្គួ នៅក្នុងតំបន់ស៊ីងជាំង ដែលកើតមានកាន់តែខ្លាំង ចាប់តាំងពីឆ្នាំ២០០៩មក អាចជាមូលហេតុចម្បងមួយ ដែលជំរុញឲ្យមានដំណើរវិវឌ្ឍនៃអំពើភេរវកម្មរបស់ពួកអ៊ុយហ្គួនៅពេលនេះ។ ពួកអ៊ុយហ្គួជាច្រើនបានរត់គេចពីការបង្រ្កាបរបស់អាជ្ញាធរ ហើយភៀសខ្លួនទៅកាន់ប្រទេសជិតខាង ដែលខ្លះបានរត់ភៀសខ្លួនរហូតទៅដល់ប៉ាគីស្ថាន និងអាហ្វហ្កានីស្ថាន ដែលជាសម្បុករបស់ក្រុមភេរវជនអ៊ីស្លាមជ្រុលនិយម។ នៅទីនោះ ពួកអ៊ុយហ្គួខ្លះចាប់ផ្តើមធ្លាក់ចូលទៅក្នុងគំនិតជ្រុលនិយម ហើយចាប់ដៃសហការជាមួយក្រុមតាលីបង់ ឬអាល់កៃដា ដើម្បីត្រឡប់មករៀបចំការវាយប្រហារភេរវកម្ម នៅក្នុងប្រទេសចិនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ