ប៉ូលិសចិនបាញ់ស្លាប់៨នាក់នៅស៊ីងជាំង ក្នុងពេលវាយប្រហារស្នងការប៉ូលិស
ប៉ូលិសស៊ីងជាំង ដែនដីភាគខាងលិចប្រទេសចិន បានបាញ់សម្លាប់មនុស្សយ៉ាងហោចណាស់៨នាក់ ដែលបានវាយលុក នៅថ្ងៃចន្ទទី ៣០ធ្នូនេះ ចូលស្នងការដ្ឋានប៉ូលិស ប្រដាប់ដោយ កាំបិទពូថៅនឹងដៃ អាវុធ និង បានគ្រប់គ្រាប់បែកដុតបំផ្លាញរថយន្តប៉ូលិសទៀត។ នេះបើតាមប្រភពព័ត៌មានផ្លូវការរបស់រដ្ឋាភិបាលស្វយ័តស៊ីងជាំង។
ចុះផ្សាយនៅថ្ងៃ៖
“ម៉ោង៦និង៣០នាទី គត់ ព្រឹកថ្ងៃចន្ទនេះ ជនពាល៩នាក់ កាន់កាំបិតនឹងដៃ នាំគ្នាសម្រុកចូលស្នងការប៉ូលិស រួចគប់គ្រាប់ផ្ទុះ” ទើបប៉ូលិសសម្រេចប្រើវិធានការធ្ងន់បាញ់តបវិញ ស្លាប់ជនដៃដល់៨នាក់ និងចាប់ខ្លួនបានម្នាក់” ! នេះជាការផ្សព្វផ្សាយក្នុងសេចក្តីជូនដំណឹងរបស់រដ្ឋាភិបាលយ៉ាងខ្លី ដែលមិនបានបញ្ជាក់អំពីស្ថានភាពរងគ្រោះក្នុងចំណោម ភ្នាក់ងារប៉ូលិសទេ។
កាលពីពីរសប្តាហ៍មុន អាជ្ញាធរតំបន់ស៊ីងជាំងនេះ ក៏ធ្លាប់បានជូនដំណឹងថា ប៉ូលិសបានបាញ់កម្ចាត់មនុស្សឱ្យស្លាប់១៤នាក់ បន្ទាប់ពីមានការប៉ះទង្គិចគ្នាជាមួយប៉ូលិសក្បែរក្រុង កាសហ្ការ ស្លាប់ប៉ូលិស២នាក់។ ក៏ប៉ុន្តែព័ត៌មាននេះត្រូវបានបដិសេធច្រានចោលដោយក្រុមជនជាតិអ៊ុយហ្គួរ និងបកស្រាយថា គឺក្រុមប៉ូលិសបានតម្រង់ទិសវាយប្រហារយ៉ាងងងុលលើក្រុមគ្រួសារមួយដែលកំពុងជួបប្រជុំគ្នារៀបចំពិធីអាពាហ៍ពិពាហ៍កូន។
ក្នុងក្រុងដដែលនៃតំបន់ស៊ីងជាំងនេះ កាលពីខែវិច្ឆិកាកន្លងទៅ ក៏ធ្លាប់មានកើតហេតុក្រុមមនុស្សកាន់កាំបិទពូថៅ ស្ទុះទៅវាយលុកប៉ូលិសបង្កឱ្យមានស្លាប់១១នាក់ ក្នុងនោះពីរនាក់ជាកងកម្លាំងរក្សាសន្តិសុខ។ នេះបើតាមប្រភពព័ត៌មានផ្លូវការរបស់អាជ្ញាធរ។
អាជ្ញាធរចិនដែលតែងចោទប្រកាន់ក្រុមជ្រុលនិយមអ៊ុយហ្គួរ កាន់សាសនាអ៊ីស្លាម មានដើមកំណើតនិងភាសាតួកគី ជាពួកភេរវនិយម ចង់បង្កសង្គ្រាមសាសនា ដោយលេសអ៊ីស្លាម។ តែសម្រាប់សហគមន៍និរទេសខ្លួន ឬក្រុមអ្នកការពារសិទ្ធិមនុស្ស អ៊ុយហ្គួរ ប៉ូលិសចិនតែងរើសអើងប្រើអំណាចគាបសង្កត់បំបិទសេរីភាពសាសនាវប្បធម៌លើសហគមន៍នេះ។
វិធានការ និងការពង្រឹងសន្តិសុខបានរឹតបន្តឹងមួយកំរិតទៀតជុំវិញតំបន់ស្វយ័តស៊ីនជាំង តាំងពីមានផ្ទុះភេរវកម្មអត្តឃាត នៅទីលានធានអាន់មៀន កណ្តាលទីក្រុងប៉េកាំង កាលពីខែតុលាដែលបង្កឡើងដោយជនជាតិអ៊ុយហ្គួរបីនាក់។ ក្រៅពីនោះអំពើហិង្សាតែអង្រួនតំបន់ស៊ីនជាំងនេះ ព្រោះតែភាពមិនចុះសម្រុងនឹងគ្នារវាងជនជាតិចិនភាគច្រើន ជាហាន និងពួកដើមអ៊ុយហ្គួរ ជាអ្នកភាគតិច។ អំពើហិង្សាខ្លាំងបំផុតផ្ទុះឡើងនៅកណ្តាលរដ្ឋធានីអ៊ូរ៉ុមជី កាលពីឆ្នាំ២០០៩។ កាលណោះមានស្លាប់ប្រមាណ២០០នាក់ និងរបួសជាង១៦០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ