កូតឌីវ័រ៖ បេសកកម្មការទូតចុងក្រោយមុនឈានទៅប្រើកម្លាំងទ័ព?
ប្រមុខដឹកនាំមកពីអាហ្វ្រិកចំនួន ៣រូប ត្រូវទៅដល់ប្រទេសកូតឌីវ័រ នៅថ្ងៃអង្គារ ២៨ ធ្នូ ២០១០នេះ ដើម្បីព្យាយាមបញ្ចុះបញ្ចូលលោកឡូរ៉ង់ បាក់បូ ឲ្យចុះចេញពីអំណាចតាមសម្រួល ចៀសវាងកុំឲ្យគេបណ្តេញដោយកម្លាំងទ័ព។ អ្នកវិភាគខ្លះយល់ថា នេះ គឺជាបេសកកម្មការទូតចុងក្រោយ មុននឹងឈានទៅប្រើកម្លាំងទ័ពបណ្តេញលោកបាក់បូ។
ចុះផ្សាយនៅថ្ងៃ៖
បទវិភាគរបស់ សេង ឌីណា
សហគមន៍សេដ្ឋកិច្ចអាហ្វ្រិកខាងលិច ហៅកាត់តាមភាសាបារាំងថា CEDEAO បានព្រមានរួចហើយថា នឹងបញ្ជូនទ័ពទៅបណ្តេញលោកបាក់បូ ប្រសិនបើគាត់មិនព្រមចុះចេញពីអំណាចដោយខ្លួនឯងទេនោះ។ មុននឹងសម្រេចប្រើកម្លាំងទ័ព CEDEAO បានសម្រេចបញ្ជូនឥស្សរជន ៣រូប គឺប្រធានាធិបតីបេណាំង (Bénin) សៀរ៉ាឡេអូន (Sierra Léon) និងកាប់វែរត៍ (Cap Vert) ទៅកូតឌីវ័រ ដើម្បីបំពេញបេសកកម្មការទូត ជាឱកាសចុងក្រោយ ក្នុងការបញ្ចុះបញ្ចូលលោកបាក់បូឲ្យចុះចេញពីតំណែង។
CEDEAO ធ្លាប់បានប្រកាសរួចហើយថា លោកបាក់បូដាច់ខាតត្រូវតែប្រគល់អំណាចទៅឲ្យលោកវាត់តារ៉ា ដែលជាប្រធានាធិបតីជាប់ឆ្នោតថ្មី ទទួលស្គាល់ដោយសហគមន៍អន្តរជាតិ។ ការសម្របសម្រួលណាមួយផ្សេង ដូចជា ការបង្កើតរដ្ឋាភិបាលរួបរួមជាតិ ជាដើម គឺជារឿងដែលមិនត្រូវយកមកជជែកជាមួយលោកបាក់បូនោះទេ។
ចំណែកលោកបាក់បូវិញ បើទោះជាទទួលរងនូវសម្ពាធពីគ្រប់ទិសទីក៏ដោយ ក៏នៅតែប្រកាន់ជំហរដដែល គឺមិនព្រមចុះចេញពីអំណាចជាដាច់ខាត ហើយថែមទាំងបានព្រមានទៀតថា ការបណ្តេញរូបលោកពីអំណាច ដោយកម្លាំងទ័ព អាចនឹងបង្កឲ្យមានសង្រ្គាមស៊ីវិល នៅកូតឌីវ័រ។
រដ្ឋាភិបាលបារាំងបានប្រកាសឈប់ទទួលស្គាល់ឯកអគ្គរដ្ឋទូតកូតឌីវ័រ ប្រចាំក្រុងប៉ារីស ហើយកំពុងពិចារណាទទួលស្គាល់ឯកអគ្គរដ្ឋទូតថ្មី ដែលតែងតាំងដោយលោកវាត់តារ៉ា។ កាលពីថ្ងៃចន្ទ ម្សិលមិញ អ្នកគាំទ្រលោកវាត់តារ៉ាមួយក្រុមបានចូលកាន់កាប់ស្ថានឯកអគ្គរដ្ឋទូត កូតឌីវ័រ នៅប៉ារីស។ ប៉ុន្តែ ក្រោយមកបានដកចេញទៅវិញ។
នៅក្នុងបទសម្ភាសន៍មួយ ជាមួយកាសែតបារាំង លោកបាក់បូបានចោទចំៗថា ផែនការប្រើកម្លាំងទ័ពបណ្តេញរូបគាត់ចេញពីអំណាច គឺធ្វើឡើងទៅតាមការរៀបចំរបស់បារាំង និងសហរដ្ឋអាមេរិក។ លោកបាក់បូ កំពុងប្រើយុទ្ធសាស្រ្តមួយ ដោយចង់បង្វែរជម្លោះបោះឆ្នោត ទៅជាជម្លោះរវាងប្រជាជនកូតឌីវ័រ និងប្រទេសលោកខាងលិច ដែលប្រជាជនកូតឌីវ័រតែងតែចាត់ទុកថាជាមហាអំណាចអាណានិគមនិយម។
ទោះជាយ៉ាងណាក៏ដោយ នៅពេលនេះ អ្នកដែលចេញមុខប្រឆាំងនឹងលោកបាក់បូខ្លាំងជាងគេ គឺបណ្តាប្រទេសមកពីអាហ្វ្រិក។ បណ្តាប្រមុខដឹកនាំប្រទេសនៅអាហ្វ្រិកស្ទើរតែទាំងអស់ សុទ្ធតែបានទទួលស្គាល់លោកវាត់តារ៉ាជាប្រធានាធិបតីស្របច្បាប់របស់ កូតឌីវ័រ ហើយបានទាមទារលោកបាក់បូឲ្យចុះចេញពីអំណាច។ លើសពីនេះទៅទៀត អ្នកដែលគំរាមប្រើកម្លាំងទ័ពបណ្តេញលោកបាក់បូពីអំណាច គឺ CEDEAO ដែលជាប្រទេសជិតខាងរបស់កូតឌីវ័រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ