បក្សកាន់អំណាចនៅតែរក្សាជំហរថា ករណីលោកសម រង្ស៊ី ជារឿងតុលាការ
ទោះបីជាមានការព្យាយាមពីសំណាក់គណបក្សប្រឆាំងក្នុងស្វះស្វែងរកកិច្ចចរចាដើម្បីបើកច្រកឲ្យលោកសម រង្ស៊ីចូលស្រុកវិញយ៉ាងណាក៏ដោយ ក៏គណបក្សកាន់អំណាចនៅតែរក្សាជំហរម៉ឺងម៉ាត់ដដែលថា នេះជារឿងរបស់តុលាការ។ ជំហរនេះត្រូវបានអ្នកនាំពាក្យរដ្ឋាភិបាល លោក ខៀវ កាញារីទ្ធ បញ្ជាក់ជាថ្មីទៀតនៅថ្ងៃសៅរ៍នេះ នៅពេលដែលក្រុមអ្នកកាសែតចោទសួរអំពីសំណុំរឿងលោកសម រង្ស៊ី។ យ៉ាងណាក៏ដោយ លោកសម រង្ស៊ី នៅតែសង្ឃឹមថា លោកអាចវិលមកធ្វើនយោបាយវិញនៅមុនការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
ទោះបីជាការបោះឆ្នោតខែកក្កដា ឆ្នាំ ២០១៣ កាន់តែខិតចូលមកដល់ក៏ដោយ ក៏នៅមិនទាន់មានសញ្ញាណាមួយដែលបង្ហាញថា មេដឹកនាំបក្សប្រឆាំង លោកសម រង្ស៊ី អាចវិលត្រឡប់ចូលស្រុកវិញបាននៅឡើយ។ គណបក្សកាន់អំណាចនៅតែរក្សាជំហរដដែល គឺករណីលោក សម រង្ស៊ី ជារឿងរបស់តុលាការ។ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាលបានបញ្ជាក់នៅថ្ងៃនេះថា ការចរចាខាងនយោបាយយឺតពេលទៅហើយនៅក្រោយពេលដែលតុលាការសម្រេចក្តីរួចហើយ។ បើយោងតាមអ្នកនាំពាក្យរដ្ឋាភិបាល ការគំរាមធ្វើពហិការមិនចូលរួមការបោះឆ្នោតពីសំណាក់បក្សប្រឆាំងដោយភ្ជាប់លក្ខខណ្ឌនៃវត្តមានរបស់លោកសម រង្ស៊ីនោះ គឺជាការខាតបង់មួយសម្រាប់ពួកគេ។
លោកសម រង្ស៊ីដែលបច្ចុប្បន្នជាប្រធានគណបក្សសង្គ្រោះជាតិបានរត់ភៀសខ្លួនទៅឯបរទេសរយៈពេល៣ឆ្នាំមកហើយ បន្ទាប់ពីលោកបានដកតម្រុយបង្គោលព្រំដែនកម្ពុជា វៀតណាមក្នុងខេត្តស្វាយរៀងកាលពីចុងខែតុលា ឆ្នាំ ២០០៩ ។ សំណុំរឿងដកតម្រុយបង្គោលព្រំដែន និងសំណុំរឿងផ្សព្វផ្សាយផែនទីក្លែងក្លាយដែលរដ្ឋាភិបាលបានប្តឹង បានធ្វើឲ្យមេដឹកនាំបក្សប្រឆាំងធំជាងគេនៅកម្ពុជាជាប់ទោសដោយកំបាំងមុខជាង១០ឆ្នាំក្នុងពន្ធនាគារ។ ទាំងការស្វែងរកកិច្ចអន្តរាគមន៍ពីសហគមន៍អន្តរជាតិ ទាំងកិច្ចខិតខំរកដំណោះស្រាយផ្ទៃក្នុងជាមួយគណបក្សកាន់អំណាចនៅតែមិនទាន់បានទទួលលទ្ធផលនៅឡើយ។
យ៉ាងណាក៏ដោយ លោកសម រង្ស៊ីនៅតែមិនទាន់អស់សង្ឃឹមទេ។ ក្នុងបទសម្ភាសន៍ជាមួយវិទ្យុបារាំងអន្តរជាតិកាលពីថ្ងៃសៅរ៍សប្តាហ៍មុន មេដឹកនាំបក្សប្រឆាំងរូបនេះនៅតែសង្ឃឹមថា ក្រោមការជំរុញពីសហគមន៍អន្តរជាតិ ដំណោះស្រាយនយោបាយមួយនឹងអាចរកឃើញនៅមុនការបោះឆ្នោត ដែលអនុញ្ញាតឲ្យរូបលោកវិលមកប្រឡូកក្នុងឆាកនយោបាយឡើងវិញ។ ប៉ុន្តែ រហូតមកទល់ពេលនេះ មិនត្រឹមតែគ្មានពន្លឺសម្រាប់ដំណោះស្រាយនយោបាយប៉ុណ្ណោះទេ ប៉ុន្តែលោកសម រង្ស៊ីត្រូវបានលុបឈ្មោះចេញពីបញ្ជីបោះឆ្នោតបាត់ទៅហើយ។ ការលុបឈ្មោះលោកសម រង្ស៊ី ត្រូវបានក្រុមប្រឹក្សាធម្មនុញ្ញសម្រេចទុកជាបានការ និងបិទផ្លូវតវ៉ា។ នេះជាស្ថានទម្ងន់ថ្មីមួយទៀតសម្រាប់ជីវិតនយោបាយលោកសម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ