សាលាក្តីខ្មែរក្រហមទទួលស្គាល់អំពីអនាគតមិនច្បាស់លាស់ ព្រោះវិបត្តិថវិកា
សាលាក្តីកាត់ទោសអតីតមេដឹកនាំខ្មែរក្រហមបានប្រកាសនៅចុងសប្តាហ៍នេះថា អនាគតរបស់សាលាក្តីនេះស្ថិតក្នុងភាពមិនច្បាស់លាស់ឡើយដោយសារតែវិបត្តិថវិកាដ៏ធ្ងន់ធ្ងរដែលមិនអាចដោះស្រាយបាន និងភាពចាស់ជរារបស់ជនជាប់ចោទ។ នៅក្នុងស្ថានភាពមិនច្បាស់លាស់នេះ អង្គជំនុំជម្រះសាលាដំបូងបានសម្រេចបំបែកនីតិវិធីសំណុំរឿង០០២ ជាផ្នែកតូចៗដែលអាចអនុញ្ញាតខ្លួនចេញសាលក្រមខ្លះ ខណៈដែលជនជាប់ចោទនៅមានកាយសម្បទារនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
សាលាក្តីខ្មែរក្រហមទទួលស្គាល់ថា បញ្ហាថវិកាធ្ងន់ធ្ងរដែលកំពុងកើតឡើងកំពុងធ្វើឲ្យអនាគតរបស់សាលាក្តីនេះមានភាពមិនច្បាស់លាស់។ យោងតាមសេចក្តីប្រកាសព័ត៌មានដែលចេញផ្សាយនៅចុងសប្តាហ៍នេះ អង្គជំនុំជម្រះសាលាដំបូងបានស្នើឲ្យការិយាល័យរដ្ឋបាលសុំការបញ្ជាក់ពីភាគីដែលបានព្រមព្រៀងបង្កើតតុលាការខ្មែរក្រហមឲ្យធានាអំពីថវិកាដើម្បីអាចឲ្យអង្គជំនុំជម្រះបញ្ចប់សំណុំរឿង ០០២។ ប៉ុន្តែ រហូតមកទល់នឹងពេលនេះ នៅមិនទាន់មានការឆ្លើយតបណាមួយទៅនឹងសំណើនេះឡើយ។
ភាពមិនប្រាកដប្រជានៃស្ថិរភាពថវិកា និងបញ្ហាសុខភាពរបស់ជនជាប់ចោទ មិនអនុញ្ញាតឲ្យមានសវនាការវែងដើម្បីស្តាប់គ្រប់អង្គហេតុទាំងអស់បានទេ។ នេះបើយោងតាមសេចក្តីប្រកាសព័ត៌មានដដែល។នេះគឺជាហេតុផលដែលអង្គជំនុំជម្រះសាលាដំបូងនៃសាលាក្តីខ្មែរក្រហមបានសម្រេចថានឹងបំបែកដំណើរការនីតិវិធីសំណុំរឿង០០២ ជាផ្នែកតូចៗដើម្បីពន្លឿនការកាត់ក្តី។ សំណុំរឿង០០២ ផ្នែកទី១នឹងត្រូវកំហិតត្រឹមឧក្រិដ្ឋកម្មប្រឆាំងមនុស្សជាតិទាក់ទងនឹងការជម្លៀសប្រជាជនដោយបង្ខំនិងការសម្លាប់ទាហាននៃរបបសាធារណរដ្ឋខ្មែរភ្លាមៗក្រោយខ្មែរក្រហមឡើងកាន់អំណាចនៅក្នុងឆ្នាំ១៩៧៥ តែប៉ុណ្ណោះ។
ការសម្រេចបំបែកនីតិវិធីនេះត្រូវបានអង្គជំនុំជម្រះសាលាដំបូងពន្យល់ថា ដោយសារតែជនជាប់ចោទទំនងជាមិនអាចមានសម្បទារគ្រប់គ្រាន់ដើម្បីចូលរួមសវនាការរហូតដល់ពេលចេញសាលក្រមស្ថាពរទាក់ទងនឹងការចោទប្រកាន់ទាំងអស់ទៅលើពួកគេនោះឡើយ។ ម្យ៉ាងទៀត ប្រសិនបើគ្មានសាលក្រមណាមួយទាល់តែសោះសម្រាប់សំណុំរឿង០០២ទេនោះ ជនរងគ្រោះនិងសាធារណជនទូទៅច្បាស់ជានឹងអស់សង្ឃឹមយ៉ាងខ្លាំងជាមិនខាន។
គួរបញ្ជាក់ថា ភាគីជាតិនៃសាលាក្តីខ្មែរក្រហមគ្មានថវិកាសម្រាប់បើកឲ្យបុគ្គលិកទៀតឡើយចាប់តាំងពីដើមឆ្នាំ ២០១៣ មកម្ល៉េះ។ ថវិកាដែលអាចដោះស្រាយបញ្ហាកូដកម្មរបស់បុគ្គលិកបាននៅពេលនេះគឺជាថវិការបស់ភាគីអន្តរជាតិឲ្យខ្ចីបណ្តោះអាសន្នតែប៉ុណ្ណោះ។ ចំណែកឯជនជាប់ចោទសំណុំរឿង ០០២ ដែលនៅសលស់តែពីរនាក់ គឺ នួន ជា និងខៀវ សំផន ក៏កំពុងមានបញ្ហាសុខភាព និងភាពចាស់ជរាយ៉ាងខ្លាំងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ