សវនាការលើសំណុំរឿង០០២ចាប់ផ្តើមឡើងវិញនៅថ្ងៃចន្ទនេះ
បន្ទាប់ពីផ្អាកសវនាការជាបណ្តោះអាសន្នកាលពីថ្ងៃទី៤មីនារហូតដល់ព្រឹកថ្ងៃចន្ទទី៨មេសានេះ អង្គជំនុំជម្រះសាលាដំបូង របស់តុលាការខ្មែរក្រហម បានចាប់ផ្តើមសវនាការឡើងវិញ លើសំណុំរឿង០០២។ សវនាការនៅព្រឹកនេះ ជាការបន្តស្តាប់សក្ខីកម្មរបស់សាក្សីម្នាក់ទៀត ជាអតីតកងទ័ពខ្មែរក្រហម លោក ឆោម សែ។
ចុះផ្សាយនៅថ្ងៃ៖
ស្តាប់ - ០២:៣២
អតីតទាហានខ្មែរក្រហម លោក ឆោម សែ និងជាអតីតប្រធានមន្ទីរសន្តិសុខអូរកន្សែង បានចូលរួមជាមួយកងទ័ពខ្មែរក្រហម វាយដណ្តើមបានទីក្រុងភ្នំពេញ នាថ្ងៃទី១៧ ខែមេសា ឆ្នាំ១៩៧៥។
ក្នុងសវនាការ នៅសាលាក្តីខ្មែរក្រហម នៅថ្ងៃចន្ទនេះ សាក្សី លោក ឆោម សែ បានបន្តឆ្លើយនឹងសំណួររបស់ភាគីសហព្រះរាជអាជ្ញា និងសំណួររបស់ភាគីសហមេធាវីនាំមុខ ដែលការពារជនរងគ្រោះ ជុំវិញស្ថានការណ៍ជម្លៀសប្រជាជនកម្ពុជា ចេញពីទីក្រុងភ្នំពេញ។
នៅរយៈពេលពេញមួយថ្ងៃនេះ អង្គសវនាការ បានស្តាប់ និងសាកសួរបញ្ចប់លើសាក្សី លោក ឆោម សែ។ នៅព្រឹកថ្ងៃអង្គារស្អែក អង្គសវនាការសាលាក្តីខ្មែរក្រហម នឹងចូលដល់សាក្សីថ្មីម្នាក់ទៀត។
សវនាការលើសំណុំរឿង០០២ នៅព្រឹកថ្ងៃចន្ទនេះ បានធ្វើឡើងក្រោយពីបានផ្អាកដំណើរការ កាលពីថ្ងៃទី៤ ខែមីនា ឆ្នាំ២០១៣ ដោយសារតែបញ្ហាសុខភាពរបស់ជនជាប់ចោទ និងបញ្ហាបុគ្គលិកជាតិ ផ្នែកបកប្រែភាសា បានធ្វើពិហការ មិនចូលបំពេញការងារ ព្រោះមិនបានបើកប្រាក់ខែ។
ក្នុងសវនាការនៅព្រឹកមិញ លោកចៅក្រម និល ណុន ប្រធានអង្គជំនុំជម្រះសាលាដំបូង របស់សាលាក្តីខ្មែរក្រហម បានប្រកាសទៅកាន់គ្រប់ភាគីថា អង្គជំនុំជម្រះ បានសំរេចតម្កល់សេចក្តីសម្រេចរបស់ខ្លួន ក្នុងការបំបែកសំណុំរឿង០០២/០១ ដើម្បីជំរុញដំណើរការសវនាការ ឲ្យចប់ បានឆាប់រហ័ស តាមដែលអាចធ្វើទៅបាន។
ក៏ប៉ុន្តែតាមលោកចៅក្រម ដំណើរការកាត់ទោសអតីតមេខ្មែរក្រហម ចាស់ជរា ក្នុងសំណុំរឿង០០២ ដែលនៅសល់ជនជាប់ចោទតែពីររូប គឺលោក នួនជា និងលោក ខៀវសំផន ដំណើរការទៅបាន អាស្រ័យលើបញ្ហាប្រាក់បៀវត្សរ៍បុគ្គលិកជាតិ ដែលកន្លងមក បញ្ហាថវិកានេះ បានធ្វើឲ្យបុគ្គលិកជាតិ បាក់ទឹកចិត្ត ក្នុងការបំពេញការងារ ព្រោះមិនបានបើកប្រាក់ខែ។
ក្នុងសវនាការនៅព្រឹកថ្ងៃទី៨មេសានេះ លោក នួនជា មិនត្រូវបានគេនាំខ្លួន មកចូលរួមសវនាការទេ ដោយសារតែលោកចៅក្រម និល ណុន បានប្រកាសថា លោកនួនជា ត្រូវបានគ្រូពេទ្យ បញ្ជាក់ថា មានជំងឺឈឺចុករោយ ហើយវិលមុខ។ លោក នួនជា មិនអាចអង្គុយយូរបាន។ ដូច្នេះលោកនួនជា ត្រូវបន្តតាមដានសវនាការពីចម្ងាយ នៅបន្ទប់សោតទស្សន៍ ដែលស្ថិតនៅខាងក្រោមបន្ទប់សវនាការ ក្រោមការតាមដានពីក្រុមគ្រូពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ