លោកប្រធានាធិបតី Basescu អាចនឹងត្រូវគេទម្លាក់ចេញពីមុខតំណែងនៅថ្ងៃសុក្រនេះ
សភារូម៉ានីត្រូវសម្រេចនៅថ្ងៃសុក្រទី៦កក្កដាឆ្នាំ២០១២នេះថា តើគេត្រូវទម្លាក់លោក Traian Basescu ចេញពីមុខតំណែងប្រធានាធិបតីរូម៉ានីឬយ៉ាងណា? ទាំងនេះពីរឆ្នាំកន្លះមុនការបញ្ចប់អាណត្តិប្រធានាធិបតីរបស់លោក។ សម្ព័ន្ធភាពនៃបក្សកណ្តាលនិយមលំអៀងឆ្វេងដែលបានឡើងមកកាន់អំណាចមិនទាន់ទាំងបានពីរខែផង បន្ទាប់ពីមានការផ្តួលរំលំរដ្ឋាភិបាលកណ្តាលនិយមលំអៀងស្តាំ ឥឡូវនេះចង់ធ្វើការទម្លាក់លោកប្រធានាធិបតី Basescu ដែលចេញពីបក្សកណ្តាលនិយមលំអៀងស្តាំដូចគ្នាអ៊ីចឹងដែរ។ ក៏ប៉ុន្តែ វិធីនិងទង្វើរបស់បក្សសង្គមនិយមនិងសេរីនិយមរូម៉ានីបានធ្វើឲ្យគេកើតមានក្តីបារម្ភ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
ថ្ងៃសុក្រទី៦កក្កដាឆ្នាំ២០១២នេះប្រហែលអាចជានាទីចុងក្រោយរបស់ លោក Traian Basescu ក្នុងការកាន់កាប់មុខតំណែងជាប្រធានាធិបតីរូម៉ានី ដោយហេតុថាសភារូម៉ានីកំពុងរៀបចំធ្វើការ ទម្លាក់លោក Traian Basescu ចេញពីមុខតំណែងប្រធានាធិបតីនៅមុនដំណាច់សប្តាហ៍នេះ។ ដូច្នេះ ការបោះឆ្នោតធ្វើប្រជាមតិមួយនឹងត្រូវគេរៀបចំឲ្យមានក្នុងរយៈពេល៣០ថ្ងៃ។ ប៉ុន្តែការស្ទាបស្ទង់មតិជាច្រើនបានបង្ហាញឲ្យដឹងថា លោក Traian Basescu នឹងគ្មានលទ្ធភាពយកជ័យជំនះបានឡើយ។
សម្រាប់អ្នកប្រឆាំងនឹង លោក Traian Basescu ប្រធានាធិបតីរូម៉ានីបច្ចុប្បន្ននេះបានរំលោភលើរដ្ឋធម្មនុញ្ញ ដោយបានប៉ុនប៉ងធ្វើការក្តោបក្តាប់អំណាចហួសហេតុនារយៈពេលប៉ុន្មានឆ្នាំចុងក្រោយនេះ។ ការចោទប្រកាន់នេះបានត្រូវបដិសេធច្រានចោលដោយអ្នកគាំទ្រប្រធានាធិបតីរូម៉ានីបច្ចុប្បន្ន។ ផ្ទុយទៅវិញ ពួកអ្នកស្តាំនិយមបានចោទក្រុមសម្ព័ន្ធភាពកណ្តាលនិយមលំអៀរឆ្វេងថា ជាអ្នករំលោភច្បាប់។
គួរបញ្ជាក់ថា ជិតមួយសប្តាហ៍ហើយដែលសម្ព័ន្ធភាពសង្គមនិយមនិងសេរីនិយមរូម៉ានី បានខិតខំធ្វើការកែប្រែច្បាប់ ដើម្បីជាការងាយស្រួលក្នុងការទម្លាក់ប្រមុខរដ្ឋចេញពីមុខតំណែង។
ស្ថានភាពនយោបាយនៅក្នុងប្រទេសរូម៉ានីនេះបានបណ្តាលឲ្យសហរដ្ឋអាមេរិកនិងគណៈកម្មការអឺរ៉ុប ហើយនិងរដ្ឋធានីនៃប្រទេសអឺរ៉ុបដទៃទៀតកើតមានក្តីបារម្ភនិងតាមឃ្លាំមើលការវិវឌ្ឍន៍នៃស្ថានការណ៍នយោបាយនៅទីក្រុងប៊ុយការ៉េសយ៉ាងដិតដល់ក្រៃលែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ