ការងារវាស់វែងព្រំដែនបើកច្រកស្ទឹងបត់ចប់មុនកំណត់
ក្រុមការងារវាស់វែងព្រំដែនដើម្បីបើកច្រកព្រំដែនស្ទឹងបត់បានបញ្ចប់ការងាររបស់ខ្លួនហើយ។ ហើយភាគីកម្ពុជានិងថៃគ្រោងចុះហត្ថលេខាស្តីពីលទ្ធផលនៃការងារវាស់វែងព្រំដែននេះនៅចុងខែមេសានេះ។ ទេសរដ្ឋមន្ត្រីទទួលបន្ទុកកិច្ចការព្រំដែន លោក វ៉ា គីមហុងបានអះអាងថា ការងារបើកច្រកព្រំដែនស្ទឹងបត់កំពុងដំណើរការយ៉ាងល្អ។
ចុះផ្សាយនៅថ្ងៃ៖
ស្តាប់ - ០១:២៦
តាំងពីថ្ងៃទី៥ខែមិនាមកក្រុមការងារចម្រុះកម្ពុជាថៃ បានចាប់ផ្តើមធ្វើការងារបើកច្រកព្រំដែនស្ទឹងបត់ក្នុងខេត្តបន្ទាយមានជ័យរបស់កម្ពុជាដែលឈមជាមួយខេត្តស្រះកែវរបស់ថៃ។ រដ្ឋាភិបាលកម្ពុជា និងថៃបានសម្រេចបង្កើតច្រកព្រំដែនអន្តរជាតិស្ទឹងបត់នេះសម្រាប់ការផ្លាស់ប្តូរទំនិញ ដោយទុកច្រកអន្តរជាតិប៉ោយប៉ែតជាច្រកទេសចរណ៍។ ទេសរដ្ឋមន្ត្រីទទួលបន្ទុកកិច្ចការព្រំដែន លោក វ៉ា គីមហុងបានប្រាប់វិទ្យុបារាំងអន្តរជាតិនៅល្ងាចថ្ងៃអង្គារនេះថា ក្រុមការងារវាស់វែងព្រំដែនបានបញ្ចប់ការងាររបស់ខ្លួនហើយ។ ហើយថា ភាគីកម្ពុជាថៃគ្រោងនឹងចុះហត្ថលេខានៅចុងខែមេសានេះ លើឯកសារស្តីពីលទ្ធផលនៃការងារវាស់វែងព្រំដែននេះ។ លោកវ៉ា គីមហុងបញ្ជាក់ថា ការងារបោសសំអាតមីនក៏ត្រូវបានបញ្ចប់រួចរាល់ហើយដែរ។
ទន្ទឹមនឹងការអះអាងថា ការងារបើកច្រកព្រំដែនស្ទឹងបត់នេះ រហូតដល់ពេលនេះកំពុងប្រព្រឹត្តិទៅយ៉ាងល្អនោះ លោកទេសរដ្ឋមន្ត្រីបញ្ជាក់ថា ក្រុមការងារទាំងពីរបានធ្វើការចប់មុនផែនការដែលត្រូវបានគ្រោងទុកសម្រាប់៦០ថ្ងៃនោះ។ ក្រោយពីបញ្ចប់ការងារវាស់វែងព្រំដែននេះ ការងារបន្ទាប់នោះ គឺកំណត់ទីតាំងច្រកទ្វារព្រំដែន និងការសាងសង់ស្ពានឆ្លងកាត់ស្ទឹងស៊ីសុផុននៅចន្លោះច្រកទ្វារទាំងពីរ។ គួរបញ្ជាក់ថា ក្រោយពីបញ្ចប់ការងារវាស់វែងព្រំដែនច្រកស្ទឹងបត់នេះហើយ ក្រុមការងារនេះនឹងចាប់ផ្តើមការងារស្វែងរកបង្គោលព្រំដែននៅច្រកជាំសាង៉ាមក្នុងស្រុកអន្លង់វែង ដែលនេះគឺជាការងារបន្តនៃការស្វែងរកបង្គោលព្រំដែនចាស់របស់កម្ពុជាថៃសល់ពីសម័យបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ