ពួកឧទ្ទាមគ្រោងចាក់គ្រឹះប្រជាធិបតេយ្យនៅលីប៊ី ក្រោយសករាជកាដាហ្វី
ទ័ពឧទ្ទាមប្រឆាំងនឹងរបបកាដាហ្វីនៅលីប៊ី កំពុងមានសង្ឃឹមកាន់តែខ្លាំងថានឹងអាចរំដោះរដ្ឋធានីទ្រីប៉ូលីបាន នាពេលឆាប់ៗខាងមុខនេះ។ នៅក្នុងបរិបទបែបនេះ ពួកគេបានផ្សព្វផ្សាយផែនទីចង្អុលផ្លូវមួយថ្មីកាលពីថ្ងៃពុធទី១៧សីហាម្សិលមិញ ដើម្បីរៀបចំចាក់គ្រឹះប្រជាធិបតេយ្យនៅលីប៊ី ក្រោយសករាជកាដាហ្វី។
ចុះផ្សាយនៅថ្ងៃ៖
ស្តាប់ - ០១:២៨
តាមរយៈឯកសារមួយដែលមានកម្រាស់ជាងដប់ទំព័រ ក្រុមប្រឹក្សាអន្តរកាលជាតិCNT ដែលតំណាងទ័ពព្រៃលីប៊ី បានលាតត្រដាងឲ្យដឹងនូវផែនការរបស់គេ ក្រោយពីរំដោះប្រទេសហើយ។ យោងទៅតាមឯកសារនោះ CNTនឹងរើទីតាំងពីទីក្រុងBenghazi ទៅទីក្រុងទ្រីប៉ូលី។ រួចហើយ ក្នុងអំឡុងពេលយ៉ាងយូរ៣០ថ្ងៃ ក្រុមប្រឹក្សានឹងតែងតាំងរដ្ឋាភិបាលស្តីទីមួយ។ រដ្ឋាភិបាលនេះ នឹងមានពេលតែប្រាំបីខែប៉ុណ្ណោះ ដើម្បីរៀបចំបោះឆ្នោតជ្រើសរើសតំណាងរាស្ត្រចំនួន២០០នាក់សម្រាប់រដ្ឋសភាជាតិមួយ។ គឺនៅពេលនោះហើយ ដែលក្រុមប្រឹក្សាអន្តរកាលជាតិCNT នឹងត្រូវរំលាយចោល ដើម្បីទុកភារកិច្ចឲ្យរដ្ឋសភាជាតិថ្មីបោះឆ្នោតតែងតាំងនាយករដ្ឋមន្ត្រីនៃប្រទេស។ នៅទីបញ្ចប់ រដ្ឋាភិបាលថ្មីនឹងត្រូវបង្ហាញខ្លួននៅចំពោះមុខអ្នកតំណាងរាស្រ្ត ដើម្បីទទួលទំនុកទុកចិត្តពីរដ្ឋសភាជាតិ។
ផែនទីចង្អុលផ្លូវនិងចង្អុលទិសប្រជាធិបតេយ្យរបស់CNTត្រូវបានផ្សព្វផ្សាយ ជួនចំពេលមួយដែលពួកទ័ពឧទ្ទាមកំពុងមានប្រៀបខ្លាំងនៅលើសមរភូមិ។ ប៉ុន្មានថ្ងៃចុងក្រោយនេះ ទ័ពឧទ្ទាមបានប្រឹងប្រែងផ្តាច់ផ្លូវនិងច្រកចេញចូលជុំវិញទីក្រុងទ្រីប៉ូលី។ គោលដៅគឺខ្ទប់កុំឲ្យការដឹងជញ្ជូនស្បៀងអាហារនិងប្រេងសាំងទៅក្នុងរដ្ឋធានីអាចប្រព្រឹត្តទៅបាន។ ទន្ទឹមនេះ កាលពីម្សិលមិញ ទ័ពឧទ្ទាមបានបើកការវាយលុកទៅលើទីក្រុងZawiyah ដើម្បីដណ្តើមយករោងច័ក្រចម្រាញ់ប្រេងកាតឲ្យបានមកវិញ។ ក្នុងពេលនេះ ទីក្រុងZawiyah បន្តឋិតនៅក្រោមការបាញ់ផ្លោងរបស់ទ័ពកាដាហ្វី ប៉ុន្តែពួកឧទ្ទាមកាន់កាប់ទីក្រុងបានមួយផ្នែកធំ។ នេះបើយោងទៅតាមប្រភពព័ត៌មានស្និទ្ធនឹងពួកឧទ្ទាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ