ហ្វ្រង់ស័រ ហូឡង់ទៅចិនដើម្បីរឹតចំណងទំនាក់ទំនងសេដ្ឋកិច្ចនិងនយោបាយ
លោកប្រធានាធិបតីបារាំង ហ្វ្រង់ស័រ ហូឡង់ បានធ្វើដំណើរទៅដល់ប្រទេសចិន នៅថ្ងៃព្រហស្បតិ៍នេះ នៅក្នុងដំណើរទស្សនកិច្ចរយៈពេល ២ថ្ងៃ ក្នុងគោលដៅជាអាទិភាពចំនួន ២ គឺរឹតបន្តឹងទំនាក់ទំនងផ្នែកនយោបាយ និងស្វះស្វែងឲ្យចិនបើកចំហទីផ្សារ សម្រាប់លក់ទំនិញបារាំង។ ចំណែកបញ្ហាសិទ្ធិមនុស្ស ដែលធ្លាប់តែជារឿងចម្រូងចម្រាសនោះ លោកប្រធានាធិបតីបារាំងទំនងជានឹងមិនលើកយកមកធ្វើជារឿងសំខាន់នោះទេ។
ចុះផ្សាយនៅថ្ងៃ៖
ស្តាប់ - ០២:២៦
លោកហ្វ្រង់ស័រ ហូឡង់ គឺជាប្រមុខរដ្ឋនៃប្រទេសលោកខាងលិចទីមួយ ដែលលោកស៊ី ជីនពីង ប្រធានាធិបតីថ្មីរបស់ចិន ទទួលស្វាគមន៍ នៅក្នុងទីក្រុងប៉េកាំង។ នៅក្នុងដំណើរទស្សនកិច្ច ២ថ្ងៃនេះ លោកហ្វ្រង់ស័រ ហូឡង់ និងលោកស៊ី ជីនពីង គ្រោងនឹងជួបគ្នា រហូតដល់ទៅ ៣លើក។
គេនៅចាំបានថា នៅក្នុងអំឡុងយុទ្ធនាការឃោសនាបោះឆ្នោតប្រធានាធិបតី កាលពីឆ្នាំទៅមិញ លោកហ្វ្រង់ស័រ ហូឡង់ បានរិះគន់ចិនយ៉ាងច្រើន ជាពិសេស ជុំវិញការដែលរដ្ឋាភិបាលចិនធ្វើអន្តរាគមន៍ ដើម្បីទប់លុយយ័នមិនឲ្យឡើងថ្លៃ និងវិធានការជាច្រើនផ្សេងទៀត ដែលអាជ្ញាធរចិនបានដាក់ចេញ ដើម្បីព្យាយាមរារាំងមិនឲ្យទំនិញបរទេស ចូលមកប្រកួតប្រជែងជាមួយទំនិញចិន នៅក្នុងទីផ្សារក្នុងស្រុកចិន។
នៅក្រោយពេលឡើងកាន់តំណែងជាប្រធានាធិបតី លោកហ្វ្រង់ស័រ ហូឡង់ ប្រាកដជាបានមើលឃើញច្បាស់ អំពីសារៈសំខាន់ ដែលមិនអាចខ្វះបាន នៃទំនាក់ទំនងបារាំង-ចិន។ សារៈសំខាន់ នៃដំណើរទស្សនកិច្ចរបស់លោកហូឡង់ ទៅកាន់ប្រទេសចិន នៅពេលនេះ ត្រូវបានបង្ហាញឲ្យឃើញយ៉ាងច្បាស់ តាមរយៈ គណៈប្រតិភូ ដែលអមដំណើររបស់លោក គឺរួមមានរដ្ឋមន្រ្តីយ៉ាងតិច ៨រូប និងប្រធានក្រុមហ៊ុនបារាំង រហូតដល់ទៅប្រមាណជា ៦០នាក់។
សម្រាប់លោកហូឡង់ ការបង្កើនទំនាក់ទំនងនយោបាយ និងសេដ្ឋកិច្ចជាមួយចិន គឺជាអាទិភាពដ៏ចម្បងបំផុត ពីព្រោះថា បារាំងមានទំនាក់ទំនងពាណិជ្ជកម្មជាមួយចិនតិចតួចណាស់ បើធៀបនឹងប្រទេសមហាអំណាចលោកខាងលិចផ្សេងទៀត ដូចជា អាល្លឺម៉ង់ជាដើម។ ការដោះដូរពាណិជ្ជកម្មរវាងចិន និងបារាំង គឺមានតែប្រមាណតែជាង ១%ប៉ុណ្ណោះ នៃពាណិជ្ជកម្មក្រៅប្រទេសរបស់ចិន ក្នុងពេលដែលការដោះដូរពាណិជ្ជកម្មចិន-អាល្លឺម៉ង់ មានដល់ទៅ ៥%។ ជាងនេះទៅទៀត នៅក្នុងការដោះដូរពាណិជ្ជកម្មជាមួយចិននេះ បារាំងក៏នៅមានការយឺតយ៉ាវខ្លាំងដែរ ពោលគឺ បារាំងនាំទំនិញចេញទៅលក់នៅចិន តិចជាងការនាំចូលទំនិញពីចិន រហូតដល់ទៅ ២៦ពាន់លានអឺរ៉ូ ក្នុងមួយឆ្នាំៗ។
នៅក្នុងពេលដែលសេដ្ឋកិច្ចរបស់បារាំងកំពុងតែត្រដរខ្យល់ ដូចជាពេលបច្ចុប្បន្ននេះ ការស្វះស្វែងឲ្យចិនបើកចំហទីផ្សារ ដើម្បីលក់ទំនិញបារាំង គឺជាអាទិភាពដ៏ចម្បងមួយរបស់រដ្ឋាភិបាលលោកហ្វ្រង់ស័រ ហូឡង់។
នៅក្នុងដំណើរទស្សនកិច្ច នៅពេលនេះ ក្រៅពីការព្យាយាមស្វែងយល់គ្នាជាមួយនឹងមេដឹកនាំចិន ដើម្បីរឹតចំណងទាក់ទងគ្នា សម្រាប់រយៈពេលវែង លោកហ្វ្រង់ស័រ ហូឡង់ និងគណៈប្រតិភូអមដំណើរ ក៏នឹងព្យាយាមផងដែរ ដើម្បីសម្រេចឲ្យបាននូវកិច្ចសន្យាមួយចំនួន ជាពិសេស ការលក់យន្តហោះប្រភេទ Airbus 320 និងកិច្ចសន្យាក្នុងវិស័យនុយក្លេអ៊ែរស៊ីវិល។
ចំណែករឿងគោរពសិទ្ធិមនុស្ស នៅចិនវិញ រដ្ឋមន្រ្តីក្រសួងការបរទេសបារាំងបានអះអាង កាលពីមុនចេញដំណើរទៅចិនថា លោកហ្រ្វង់ស័រ ហូឡង់ ប្រាកដជានឹងលើកយករឿងនេះទៅជជែកជាមួយមេដឹកនាំចិន ក៏ប៉ុន្តែ លោកប្រមុខការទូតបារាំងក៏បានបង្ហើបឲ្យដឹងផងដែរថា ការលើកឡើងពីបញ្ហាសិទ្ធិមនុស្សនេះ លោកប្រធានាធិបតីបារាំងនឹងធ្វើដោយប្រយ័ត្នប្រយែង ដើម្បីចៀសវាងកុំឲ្យចិនអាក់អន់ចិត្ត ដែលអាចនាំឲ្យខូចទំនាក់ទំនងរវាងប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ